قازاق ءتىلىن دامىتۋعا 200 ميلليون بولگەن كىم؟

«Lancaster Group» اكتسيونەرلەرى — بەرىك قانيەۆ، گاۋحار قاپپاروۆا جانە يۋري پاك «Qazaq Tili Endowment» قورىنا 200 ملن تەڭگە ءبولۋ تۋرالى شەشىم قابىلدادى. بۇل تۋرالى «قازاق ءتىلى» قوعامىنىڭ ءباسپاسوز قىزمەتى ءمالىم ەتتى.
«بۇل — قازاق ءتىلىن قولداۋ قورىنا باعىتتالعان ەڭ قوماقتى سوما»، — دەلىنگەن حابارلامادا.
«قازاق ءتىلى» قوعامىنىڭ ەنداۋمەنت قورى 2023 جىلى مەملەكەتتىك ءتىلدى دامىتۋ مەن قولداۋ ماقساتىندا جۇيەلى جانە تۇراقتى جۇمىسقا قاجەت قارجىلىق نەگىز قالىپتاستىرۋ ءۇشىن قۇرىلعان. ءبىرىنشى بولىپ بۇل باستامانى قازاقستان پرەزيدەنتى قاسىم-جومارت توقاەۆ قولداپ، 7 ملن تەڭگە كولەمىندە جارنا اۋدارعان ەدى. مەملەكەت باسشىسىنىڭ بۇل باستاماسىن بەلگىلى قازاقستاندىق كاسىپكەرلەر مەن قازاق ءتىلىنىڭ جاناشىرلارى جالعاستىردى.
ەنداۋمەنت قوردىڭ باستى ماقساتى — ەلىمىزدەگى مەملەكەتتىك ءتىلدى دامىتۋ جانە قولداۋ باعىتىندا جۇمىس ىستەيتىن ەڭ ءىرى قوعامدىق ۇيىم — «قازاق ءتىلى» قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ. ەنداۋمەنت قورىنىڭ ەرەكشەلىگى بار، وندا جينالعان قاراجاتتىڭ ءوزى جۇمسالمايدى. تەك قوردىڭ ينۆەستيتسيالىق قىزمەتىنەن تۇسكەن تابىسى عانا «قازاق ءتىلى» قوعامىنىڭ جارعىلىق مىندەتتەرىن جۇزەگە اسىرۋعا جۇمسالادى. Qazaq Tili Endowment قورى تاۋەلسىز قامقورشىلار كەڭەسىنە باعىنادى. قامقورشىلار كەڭەسى قۇرامىندا بەدەلدى قوعام قايراتكەرلەرى، كاسىپكەرلەر مەن ءىرى دەمەۋشىلەر بار.
قوردىق جاريا ەسەبى مەن دەمەۋشىلەر ءتىزىمى www.til.kz سايتىندا جاريالانادى. Lancaster Group اۋداراتىن قارجىعا دەيىن قور ەسەپشوتىندا 503 669 299 تەڭگە بولدى. «قازاق ءتىلى» قوعامىنىڭ پرەزيدەنتى راۋان كەنجەحانۇلىنىڭ ايتۋىنشا، 2024 جىلى Qazaq Tili Endowment قورىنىڭ ۇستەمە تابىسى 75 ملن تەڭگەنى قۇرادى. وسى قاراجات ەسەبىنەن وتكەن جىلى 40-تان استام جوبا مەن ءىس-شارا جۇزەگە اسىرىلدى. ولاردىڭ قاتارىندا Oxford Qazaq Dictionary جوباسى، Disney, Pixar جانە Sony ستۋديالارى فيلمدەرىنىڭ دۋبلياج جۇمىسىن ناسيحاتتاۋ، كەڭىنەن تاراتۋ جانە ادىستەمەلىك قۇرالدار ازىرلەۋ، بالالارعا ارنالعان، ىسكەرلىك جانە عىلىمي-تانىمدىق كىتاپتاردى اۋدارۋ جانە باسىپ شىعارۋ، وزگە دە ماڭىزدى باستامالار بار.
بۇعان دەيىن حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحانۇلى جۋىرداعى سۇحباتىندا تسيفرلىق دەربەستىكتى ساقتايمىز دەسەك، ءوز ءتىلىمىزدىڭ LLM-ءىن جاساۋ كەرەكتىگىن ايتقان ەدى.
Abai.kz