2024 جىلدىڭ قىركۇيەك ايىنان بەرى تاسوتكەل سۋ قويماسىنان سوزاق اۋدانىنا 1,3 ملرد تەكشە مەتر سۋ جىبەرىلدى. 27 ناۋرىزدا شۋ وزەنىنىڭ سۋى سوزاق اۋدانىنىڭ جۋانتوبە اۋىلدىق وكرۋگىنە جەتتى. قازىرگى تاڭدا سۋ اۋدان شەكاراسىنان 80 شاقىرىم ىشكە قاراي تارالىپ جاتىر.

سۋ رەسۋرستارى جانە يرريگاتسيا مينيسترلىگى جىل سوڭىنا دەيىن تاعى 44 ملن تەكشە مەتر سۋ جىبەرۋدى جوسپارلاپ وتىر. بۇگىنگى تاڭدا تاسوتكەل سۋ قويماسىندا 410 ملن تەكشە مەترگە جۋىق سۋ بار.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ تاپسىرماسى بوينشا جامبىل وبلىسىنىڭ «قازسۋشار» فيليالى مەن شۋ-تالاس باسسەيندىك ينسپەكتسياسىنىڭ باسشىلارى سوزاق اۋدانىنا باردى. تەكسەرىس بارىسىندا شۋ وزەنى ارناسىن ءوز بەتىنشە بۇرۋ جانە زاڭسىز بوگەت تۇرعىزۋ فاكتىسى انىقتالعان جوق.

بارلىق سۋارمالى القاپتار جانە سۋ پايدالانۋشىلار سۋ رەسۋرستارىنىڭ بولىنگەن كولەمىندە سۋمەن قامتاماسىز ەتىلۋدە. مينيسترلىك وكىلدەرى اۋدان تۇرعىندارىمەن كەزدەسىپ، حالىقتى سۋمەن قامتۋ باعىتىنداعى اتقارىلىپ جاتقان جۇمىستار تۋرالى ايتىپ بەردى.

«شۋ وزەڭىنىڭ اعىسىن رەتتەۋ جانە بوگەتتىڭ بۇزىلۋىنىڭ الدىن الۋ ءۇشىن راداي وزەگىنىڭ باسىنا سۋ رەتتەگىش قۇرىلعى ورناتۋ تۋرالى شەشىم قابىلداندى. بۇل قۇرىلعى سۋدىڭ تابيعي اعىسىن كەزەڭ-كەزەڭىمەن، قاۋىپسىز جانە ءتيىمدى باسقارۋعا، سۋدى شۋ وزەڭىنىڭ نەگىزگى ارناسىمەن جىبەرۋ جانە سوزاق اۋدانىنا سۋدى جەتكىزۋ ۋاقىتىن ازايتۋعا باعىتتالعان. قازىرگى ۋاقىتتا، جەرگىلىكتى اكىمدىك جوبالىق-سمەتالىق قۇجاتتاماسىن ازىرلەپ جاتىر»، - دەدى تالعات يبراەۆ شۋ-تالاس باسسەيندىك ينسپەكتسياسىن باسشىسى.

Abai.kz