«قازاقستان» رەسپۋبليكالىق تەلەراديوكورپوراتسياسىنىڭ ۇيىمداستىرۋىمەن الماتى قالاسىنداعى جاڭا مەدياكەشەندە قۇرىلتاي سايلاۋىنا قاتىساتىن ساياسي پارتيالار اراسىندا ۇلتتىق تەلەدەبات باستالدى. ساياسي پىكىرسايىس «Qazaqstan» ۇلتتىق تەلەارناسىندا جانە الەۋمەتتىك جەلىدەگى پاراقشالارىندا تىكەلەي ەفيردە كورسەتىلىپ جاتىر.

ۇلتتىق تەلەدەبات قارساڭىندا ارنايى ەفير ۇيىمداستىرىلىپ، كورەرمەندەر پىكىرسايىس باستالعانعا دەيىنگى دايىندىق بارىسىن تاماشالادى.

ەفير بارىسىندا ساياسي ساراپشىلار تەلەدەباتتىڭ ماڭىزىنا توقتالىپ، ەلىمىزدەگى كونستيتۋتسيالىق رەفورمالاردان كەيىن العاش رەت وتكىزىلگەلى وتىرعان قۇرىلتاي سايلاۋىنىڭ قوعامدىق-ساياسي مانىنە باعا بەردى. ولار مەدياورتالىقتىڭ Sky ستۋدياسىندا پارتيالاردىڭ سايلاۋ باعدارلامالارىن تالقىلادى.

وسى ۋاقىتتا قۇرىلتاي سايلاۋىنا قاتىساتىن جەتى ساياسي پارتيانىڭ وكىلدەرى ارنايى اۆتوبۋستارمەن مەدياورتالىققا كەلدى. ءار پارتيانىڭ دەلەگاتسياسىن جاقتاستارى جىلى قارسى الىپ، قولداۋ كورسەتتى. تىكەلەي ەفير بارىسىندا پارتيا وكىلدەرىنىڭ كەلۋ ءساتى، ولاردىڭ دەبات الدىنداعى كوڭىل كۇيى كورەرمەنگە ۇسىنىلدى.

ەفير كەزىندە ءار پارتيانىڭ تاريحى، ساياسي ۇستانىمى جانە قۇرىلتاي سايلاۋىنا ۇسىنعان كانديداتتارى تۋرالى قىسقاشا اقپارات بەرىلدى. سونىمەن قاتار تىلشىلەر پارتيا وكىلدەرىمەن ەكسپرەسس-سۇحبات جۇرگىزىپ، ولاردىڭ پىكىرسايىسقا دايىندىعى، باستى ماقساتتارى جانە سايلاۋشىلارعا جەتكىزگىسى كەلەتىن نەگىزگى ويلارى جونىندە پىكىرىن ءبىلدى.

ساراپشىلار باقىتجان بۇقارباي مەن جەڭىسبەك تولەن جاڭا ساياسي رەفورمالاردىڭ ناتيجەلەرى، پارتيالىق جۇيەنىڭ دامۋى، قۇرىلتاي ينستيتۋتىنىڭ ەرەكشەلىكتەرى، زاڭ شىعارۋ جۇيەسىندەگى وزگەرىستەر جانە باسقا دا تاقىرىپتار  توڭىرەگىندە وي ءبولىستى.

جەتى پارتيانىڭ وكىلدەرى تەلەدەبات ستۋدياسىنا تولىق جينالىپ، تىكەلەي ەفير الدىنداعى سوڭعى دايىندىقتارىن پىسىقتاعان سوڭ جۇرگىزۋشىلەر ءسوز كەزەگىن ۇلتتىق تەلەدەبات مودەراتورىنا ۇسىندى. وسىلايشا ەلدەگى ماڭىزدى ساياسي وقيعالاردىڭ ءبىرى سانالاتىن ۇلتتىق تەلەدەباتتىڭ تىكەلەي ەفيرى باستالدى.

پىكىرسايىس بارىسىندا جەتى ساياسي پارتيانىڭ وكىلدەرى ءوز پارتيالارىنىڭ سايلاۋ باعدارلامالارىن تانىستىرىپ، ەل دامۋىنىڭ باسىم باعىتتارى بويىنشا پارتيالىق ۇستانىمدارىن جەتكىزەدى.

تەلەدەباتقا قاتىساتىن ساياسي پارتيالاردىڭ وكىلدەرى:

بەكتۇروۆ رەنات نۇرمولدۇلى – «ادىلەت» پارتياسى;

ەگىزباەۆ سەرىك راحمەتوللاۇلى – «اۋىل» پارتياسى;

نۇرالدينوۆ ولجاس ەلتايۇلى – «اق جول» پارتياسى;

سمولياكوۆا ەكاتەرينا سەرگەەۆنا – «Respublica» پارتياسى;

سۇڭقار يسلام ەركىنۇلى – قازاقستان حالىق پارتياسى;

سامبەتباي تازابەك داكەنايۇلى – جالپىۇلتتىق سوتسيال-دەموكراتيالىق پارتياسى;

قادىرباەۆا نۇرگۇل جۇماحمەتقىزى – «بايتاق» پارتياسى.

تەلەدەبات بارىسىندا كورەرمەندەردىڭ ساۋالدارى مەن ۇسىنىس-پىكىرلەرىن قابىلداۋ ءۇشىن ارنايى بايلانىس ورتالىعى جۇمىس ىستەيدى. كورەرمەندەر WhatsApp, Telegram, Youtube, Instagram الەۋمەتتىك جەلىلەرى ارقىلى سۇراقتارىن جولداي الادى.

Abai.kz