رەسەيدە الەكساندر دۋگين دەگەن شال بار. رەسەيدىڭ باس يدەولوگتارىنىڭ ءبىرى. «ورىس الەمى» يدەياسىن جاساۋشى ادام. ناعىز يمپەرشىل، ناعىز كولونيزاتور پيعىلدى ادام.

سول دۋگين: «تمد اۋماعىندا جاڭا ماكرومەملەكەت قۇرۋ – قاشىپ قۇتىلماس شىندىق» دەيتىن دەرەكتيۆاسىن جاريالاپتى.

وندا: «بۇگىنگى كۇنى ماكرومەملەكەت قۇرۋدىڭ قاجەتتىلىگى كۇن ساناپ ارتۋدا. بۇل قاجەتتىلىك تمد-نى قالىپتاستىرۋ ساتىندە-اق بەلگىلى بولعان. بىراق، تمد بىرىكتىرۋشى مىندەتتى اتقارا المادى. ونان سوڭ ەۋرازيالىق وداق قۇرىلدى. الايدا وعان تەك قانا ەكونوميكالىق يدەيالار كىرگىزىلدى. جالاڭ ەكونوميكامەن بىرىكتىرۋ پروتسەسسى ىسكە اسپايتىنى بەلگىلى عوي، دەمەك ول دا كىبىرتىكتەپ تۇرىپ قالدى.

قازىر الەمدىك جۇيەنى قايتا قۇرۋ باستالعان ساتتە، بۇل ءىستىڭ ءساتى تۋىپ تۇر. مۇنداي ساتتە ينتەگراتسيا جاساي الاتىن ۇلى دەرجاۆالار عانا ءوزىنىڭ سۋۆەرەنيتەتىن ساقتاپ قالا الادى. ال كىشى ەلدەرگە قاي دەرجاۆامەن بىرگە بولامىن دەگەندى تاڭداۋ عانا قالادى. ەگەر ولار ءوز تاڭداۋىن جاساماسا، وندا دەرجاۆالاردىڭ ىقپالىندا تالان-تاراجعا تۇسەتىن قايعىلى تاعدىرعا تاپ بولماق.

پوستكەڭەستىك ەلدەردىڭ باسىم كوپشىلىگى ءۇشىن جالعىز دۇرىس شەشىم – ەۋرازيالىق ماكرومەملەكەت قۇرامىنا ءوتۋ بولماق.

قازىر كوپتەگەن كىشى مەملەكەتتەر وزدەرىنىڭ يلليۋزيالىق امبيتسياعا تولى سۋۆەرەندىلىگىن قالىپتاستىرۋدى ويلاستىرۋدا. الايدا بۇل يلليۋزيا ءبىزدىڭ ۋكراينادا جەڭىسكە جاقىنداي تۇسۋىمىزگە بايلانىستى سەيىلىپ بارا جاتىر. كەڭەس وداعى مەن رەسەي يمپەرياسىنىڭ كەڭىستىگىندە ماكرومەملەكەت قۇرۋ قاشىپ قۇتىلمايتىن تاريحي پروتسەسس. بۇل دەرجاۆا قۇرۋشى تسيكلعا قاتىسىپ جاتقاندار ءۇشىن سۋۆەرەنيتەتىن ساقتاپ قالۋدىڭ جالعىز جولى»، - دەيدى.

دەيدى دە، دۋگين «جاڭا يمپەرياعا» كىرىگەتىن پوتەنتسيالدى ەلدەر قاتارىنا تمد اۋماعىن تۇتاستاي، سونىڭ ىشىندە ۋكراينانى، وڭتۇستىك وسەتيا مەن ابحازيانى، گرۋزيا، مولدوۆا، ارمەنيا مەن ازەربايجاندى جەكەلەي اتايدى.

دۋگين وسىلايشا رەسەيدىڭ تۇپكى ماقساتى – جاڭا يمپەريا قۇرۋ ەكەنىن اشىق ايتتى. جانە رەسەي بيلىگىنىڭ الداعى ۋاقىتتا بۇل يدەيانى بەلسەندى تۇردە ناسيحاتتايتىنىن اڭعارتتى.

Abai.kz