قازاقستان  حالقى اسسامبلەياسى بيىل ءوزىنىڭ 30 جىلدىق مەرەيتويىن  اتاپ  وتۋدە.  بۇل ۇيىم قازاقستاندىقتاردىڭ ساياسي-الەۋمەتتىك ومىرگە بەلسەنە ارالاسۋىنا مۇمكىندىك جاساپ،  ەلىمىزدەگى ءتۇرلى ەتنوستاردىڭ مادەنيەتى مەن  ءتىلىن ساقتاۋعا،  دامىتۋعا قولداۋ ءبىلدىرىپ كەلەدى.  وسى تۇستا ءبىز وزبەكالى جانىبەكوۆ اتىنداعى وقپۋ باسقارما توراعاسى-رەكتور مىندەتىن اتقارۋشى،  شىمكەنت قالاسى قحا جانىنداعى  «انالار كەڭەسىنىڭ» ءتورايىمى گۇلجان سۇگىرباەۆا حانىمعا حابارلاسىپ، پىكىر سۇراعان ەدىك...

گۇلجان سۇگىرباەۆا:

– ەڭ باستىسى – 150-دەن استام ۇلت وكىلى مەكەندەگەن شاڭىراعىمىزدا ۇلتارالىق بەيبىتشىلىك پەن تۇراقتىلىقتى نىعايتۋ جولىندا ماڭىزدى ءرول اتقارۋدا. قوعامداعى كەلىسىم مەن بىرلىكتى ساقتاۋدا، ۇلتتار اراسىنداعى دوستىقتى نىعايتۋدا قازاقستان حالقى اسسامبلەياسىنىڭ ءرولى ماڭىزدى.  اتالمىش ۇيىم ءوزىنىڭ قۇرىلۋ كەزەڭىنەن باستاپ حالىقتىق ديپلوماتيا ۇلگىسىنە بەيىمدەلە وتىرىپ، ۇزاق دامۋ جولىنان ءوتتى. بىرەگەي قۇرىلىم رەتىندە رەسپۋبليكانىڭ دامۋى ءۇشىن بۇكىل الەمگە ەتنوسارالىق قاتىناس بويىنشا جۇرگىزىپ وتىرعان ساياساتىنىڭ تابىستى ەكەنىن پاش ەتىپ كەلەدى.

اسسامبلەيانىڭ باستى ەرەكشەلىكتەرىنىڭ ءبىرى ونىڭ ەلىمىزدىڭ جوعارى زاڭ شىعارۋ ورگانىندا پارلامەنتتە ەتنوستىق توپتار مۇددەلەرىنىڭ كەپىلدى وكىلدىك ەتۋىن قامتاماسىز ەتۋى بولىپ تابىلادى. پارلامەنت ماجىلىسىنە قازاقستان حالقى اسسامبلەياسىنان سايلانعان دەپۋتاتتار ەلىمىزدىڭ بارلىق ەتنوستارى اتىنان وكىلدىك ەتەدى. بۇدان باسقا قازاقستاندىق ەتنوستىق قوعامداستىق وكىلدەرى پارلامەنتتەگى وكىلدى ورگاندارعا ساياسي پارتيالار ارقىلى سايلاۋعا تىكەلەي قاتىسۋ نەگىزىندە جۇزەگە اسىرىلادى. رەسپۋبليكادا قازاقستاننىڭ بارلىق ەتنوستارىنىڭ مادەنيەتىن، ءتىلىن، ءداستۇرىن دامىتۋ ءۇشىن قاجەتتى جاعدايدىڭ ءبارى جاسالعان.

اسسامبلەيا قىزمەتى قازاقستاننىڭ ەتنوسارالىق قاتىناستار ماسەلەلەرىن ءتيىمدى شەشەتىن ەل رەتىندەگى حالىقارالىق بەدەلىن ارتتىرۋعا ىقپال ەتەدى. قوعامداعى باستى مىندەت بىرلىكتى ساقتاۋ جانە ۇلتتار اراسىنداعى دوستىقتى نىعايتۋ ەكەنىن ەسكەرسەك، بۇل ۇدەرىستە قاراپايىم حالىقتىڭ ءرولى ەرەكشە.  ءبىزدىڭ ەلىمىزدە ءار ۇلتتىڭ وكىلدەرى ءوز انا تىلىندە سويلەپ، ۇلتتىق داستۇرلەرى مەن رۋحاني قۇندىلىقتارىن ساقتاۋعا تولىق مۇمكىندىك بار. جاستاردى وتانسۇيگىشتىككە تاربيەلەۋدە دە مىڭىزدى مىندەتتەردى جۇزەگە اسىرۋدا.

وزبەكالى جانىبەكوۆ اتىنداعى وقپۋ-دا بۇگىندە بارلىعى 24 وزگە ۇلت وكىلىنىڭ جاستارى ءبىر ءۇيدىڭ بالاسىنداي تاتۋ-ءتاتتى ءبىلىم الىپ، بولاشاق مامان اتانۋ جولىنداعى ىزدەنىس ۇستىندە. ولار ءبىر-ءبىرىنىڭ ءتىلى مەن مادەنيەتىنە، رۋحاني قۇندىلىقتارىنا ءاردايىم قۇرمەتپەن قاراپ، كوڭىلدى جانە مازمۇندى شارالاردى ءجيى ۇيىمداستىرادى.

جالپى، اسسامبلەيا جۇمىسىندا الداعى ۋاقىتتا جاستار اسسامبلەياسىنا باسىمدىق بەرسە، بولاشاعىمىز ايقىن، باعىتىمىز انىق بولماق. ويتكەنى، جاستار ءبىزدىڭ بولاشاعىمىز، ەرتەڭگى ەلدىڭ ەگەسى، ولاردىڭ بويىنا ىنتىماق پەن اۋىزبىرشىلىكتە ءومىر ءسۇرۋدىڭ قۇندىلىق ءدانىن ەگۋىمىز كەرەك. ولاردى الەۋمەتتىك قولداۋ،جۇمىسقا ورنالاستىرۋ، ءبىلىمىن ارتتىرۋ باعىتىندا بىرلەسكەن شارالاردى جۇزەگە اسىرۋ قاجەت. جاستار الەۋمەتتىك جەلىنى كەڭىنەن قولداناتىندىقتان، اقپاراتتىق جوبالار مەن مەدياساۋاتتىلىققا باعىتتاۋدىڭ دا ماڭىزى زور. جاستار ۇيىمدارى رەفورمالاردى جۇرگىزۋگە دە زور ىقپال ەتە الادى. قورىتا ايتقاندا، اسسامبلەيانىڭ وتىز جىلدىعى ماڭىزدى بەلەس. ول بولاشاقتا دا بەيبىتشىلىك پەن كەلىسىمنىڭ ماڭىزدى تىرەگى بولىپ قالا بەرەدى.

Abai.kz