قىرعىزستان رەسپۋبليكاسى بيىل سۋارۋ ماۋسىمىندا قازاقستانعا 600 ملن تەكشە مەتردەن استام سۋ جىبەرەدى.

سۋارۋ ماۋسىمى باستالعان ءساۋىر ايىنىڭ وزىندە-اق 45 ملن تەكشە مەتر سۋ بەرىلدى.

ءساۋىر ايىنىڭ سوڭىنان باستاپ قىرعىز رەسپۋبليكاسى قازاقستانعا تالاس وزەنى ارقىلى تاعى 400 ملن جانە شۋ وزەنى ارقىلى 180 ملن تەكشە مەتر سۋ جىبەرەدى.

قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن قىرعىز رەسپۋبليكاسىنىڭ مينيسترلەر كابينەتى توراعاسىنىڭ ورىنباسارى – سۋ رەسۋرستارى، اۋىل شارۋاشىلىعى جانە قايتا وڭدەۋ ونەركاسىبى ءمينيسترى باقىت توروباەۆ شۋ جانە تالاس وزەندەرىندەگى مەملەكەتارالىق سۋ شارۋاشىلىعى قۇرىلىمدارىن پايدالانۋ جونىندەگى قازاق-قىرعىز كوميسسياسىنىڭ 35-ءشى وتىرىسىندا وسى جونىندە كەلىسىمگە كەلدى.

بۇل سۋ جامبىل وبلىسىنداعى اۋىل شارۋاشىلىعى القاپتارىن سۋارۋعا جۇمسالادى.

سونىمەن قاتار تاراپتار قورشاعان ورتانى قورعاۋ جانە سۋ ساپاسىن باقىلاۋ بويىنشا بىرلەسكەن جۇمىس توبىنىڭ قىزمەتىن تالقىلادى.

وتىرىسقا سونداي-اق سىرتقى ىستەر مينيسترلىگى، توتەنشە جاعدايلار مينيسترلىگى، ەكولوگيا جانە تابيعي رەسۋرستار مينيسترلىگى مەن جامبىل وبلىسى اكىمدىگى وكىلدەرى قاتىستى. كوميسسيانىڭ تەڭ توراعالارى – قر سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ جانە قىرعىز رەسپۋبليكاسىنىڭ سۋ رەسۋرستارى قىزمەتىنىڭ ديرەكتورى، مينيستر ورىنباسارى نۇرلان جۇماەۆ.

«بىلتىر قىرعىز ارىپتەستەرىمىزبەن بىرلەسكەن جۇمىستىڭ ارقاسىندا جامبىل وبلىسىنىڭ ديقاندارىن سۋارمالى سۋمەن تولىق قامتاماسىز ەتتىك. مىسالى، تالاس وزەنى ارقىلى قازاقستانعا جوسپارلانعان 380 ملن تەكشە مەتردىڭ ورنىنا 418 ملن تەكشە مەتر سۋ كەلدى. ال شۋ وزەنى ارقىلى 165,3 ملن تەكشە مەتر سۋ كەلدى، بۇل ءبىر جىل بۇرىنعى كولەممەن سالىستىرعاندا 29,7 ميلليونعا ارتىق»، – دەدى قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz