پاۆلودار وبلىسىنا قاراستى باياناۋىل اۋىلىنىڭ 59 جاستاعى تۇرعىنى تاڭەرتەڭ ءوزىن ناشار سەزىنىپ، قاتتى باسى اۋىرىپ، قۇسۋ جانە ەسىنەن تانۋ بەلگىلەرى بايقالعان.

تۋىستارى دەرەۋ جەدەل جاردەم شاقىردى. شاقىرتىلعان جەدەل مەديتسينالىق كومەك بريگاداسى ونىڭ قان قىسىمىنىڭ تىم جوعارى ەكەنىن انىقتادى. پاتسيەنت جاعدايىنىڭ اۋىرلىعىنا بايلانىستى ول سانيتاريالىق اۆياتسيا ارقىلى شۇعىل تۇردە كارديوورتالىقتىڭ قابىلداۋ بولىمىنە جەتكىزىلدى.

اۋرۋحانادا ميدىڭ كت جۇرگىزىلىپ، ءسۋباراحنويدالدى قان قۇيىلعانى جانە ميدىڭ ماڭداي بولىگى ايماعىندا ۇلكەن ارالىق گەماتومانىڭ پايدا بولعانى انىقتالدى. جەدەل تۇردە نەيروحيرۋرگتىڭ كەڭەسىمەن 3D رەكونسترۋكتسياسى بار انگيوگرافيا جاساۋ تۋرالى شەشىم قابىلداندى.

زەرتتەۋ كەزىندە الدىڭعى بىرىكتىرۋشى ارتەريادا كەڭ نەگىزدى، ەكى قوسىمشا ديۆەرتيكۋلى بار جارىلعان قاپشىق ءتارىزدى انەۆريزما انىقتالدى. انەۆريزمانىڭ كۇمبەزى ىشكى مەديالدى باعىتتا ورنالاسقان. سونىمەن قاتار، ەكى ىشكى ۇيقى ارتەرياسىندا ءيىلىس (كينكينگ) بايقالدى، الايدا الدىڭعى بىرىكتىرۋشى ارتەريا قالىپتى جۇمىس ىستەپ تۇردى.

ومىرلىك كورسەتىلىمدەرى بويىنشا رەنتگەنەندوۆاسكۋليارلىق وپەراتسيا جاسالدى – انەۆريزما ارنايى ميكروكاتۋشكالارمەن (ميكروسپيرالدارمەن) تولىق ەمبوليزاتسيالاندى. وپەراتسيا ءساتتى ءوتتى، انەۆريزمانىڭ بۇكىل قۋىسى سەنىمدى تۇردە جابىلدى.

پاتسيەنتتىڭ جاعدايى اۋىر كۇيدە قالىپ، 9 كۇن بويى رەانيماتسيا بولىمشەسىندە قارقىندى ەم الدى.
جاعدايى تۇراقتانعاننان كەيىن ول ءارى قاراي ەم قابىلداۋ ءۇشىن نەۆرولوگيا بولىمشەسىنە اۋىستىرىلىپ، كەيىن دەنساۋلىعى جاقسارعان كۇيدە ۇيىنە شىعارىلدى.

وسىنداي پاتولوگيالار كەزىندە ءولىم دەڭگەيى، اسىرەسە اۋرۋدىڭ ءجىتى جانە ەرتە كەزەڭدەرىندە 50%-عا دەيىن جەتەدى. الايدا جەدەل جاردەم بريگاداسىنىڭ ۋاقتىلى ارەكەتى، سانيتاريالىق اۆياتسيامەن جەدەل جەتكىزۋ جانە كارديوورتالىق ماماندارىنىڭ كاسىبي جۇمىسى پاتسيەنتتىڭ ءومىرىن ساقتاپ قالۋعا مۇمكىندىك بەردى.

پاتسيەنتكە كورسەتىلگەن بارلىق مەديتسينالىق كومەك الەۋمەتتىك مەديتسينالىق ساقتاندىرۋ جۇيەسىنىڭ شەڭبەرىندە تەگىن كورسەتىلدى.

Abai.kz