سۋ رەسۋرستارى جانە يرريگاتسيا مينيسترلىگى قازاقستاننىڭ ساعالارى مەن كولدەرىنە شامامەن 16 ملرد تەكشە مەتر ەرىگەن قار سۋىن جىبەردى.

بىلتىرعى قازان ايىنان باستاپ سۋ رەسۋرستارى جانە يرريگاتسيا مينيسترلىگى سۋ از بولعان كەزەڭدەردە تولتىرىلماعان ساعالار مەن كولدەرگە 15,7 ملرد تەكشە مەتر ەرىگەن قار سۋىن جىبەردى. ۆەدومستۆو باسشىسى نۇرجان نۇرجىگىتوۆ ۇكىمەت وتىرىسىنا قاتىسىپ، ەلىمىزدەگى سۋارۋ كەزەڭى تۋرالى ايتتى.

ماسەلەن، ۇلىتاۋ وبلىسىنداعى كەنگىر سۋ قويماسىنان جانە قاراعاندى وبلىسىنداعى جەزدى سۋ قويماسىنان 331 ملن تەكشە مەتر سۋ جىبەرىلىپ، قىزىلوردا وبلىسىنداعى تەلىكول كولدەر جۇيەسىنە باعىتتالدى.

ۆەگەتاتسيالىق كەزەڭدە جامبىل وبلىسىنداعى تاسوتكەل سۋ قويماسىنان 1,5 ملرد تەكشە مەتر سۋ جىبەرىلدى. بۇل سۋ تۇركىستان وبلىسى سوزاق اۋدانى اۋماعىنا دەيىن ءوتىپ، سوڭعى 10 جىلدا بايقالماعان 100 شاقىرىم اۋماققا جەتكەن.

پاۆلودار وبلىسىنداعى ەرتىس وزەنىنىڭ جايىلماسىنا تابيعاتتى قورعاۋ ءۇشىن اباي وبلىسىنداعى ءشۇلبى سۋ قويماسىنان 6,3 ملرد تەكشە مەتردەن استام سۋ جىبەرىلدى. بۇل جۇمىستار ەرتىس وزەنىنىڭ جايىلماسىنداعى فلورا مەن فاۋنانىڭ بيولوگيالىق ونىمدىلىگى مەن تىرشىلىك ەتۋ ورتاسىن ساقتاۋعا باعىتتالعان.

2025 جىلدىڭ باسىنان بۇگىنگە دەيىن قاپشاعاي سۋ قويماسىنان بالقاش كولىنە 3,8 ملرد تەكشە مەتر سۋ جىبەرىلدى. ءبىر جىل ىشىندە بالقاش كولىنىڭ دەڭگەيى بالتىق جۇيەسى بويىنشا 341,52 مەتردەن 341,64 مەترگە كوتەرىلىپ، 12 سانتيمەترگە ءوستى. ال سۋ كولەمى 2 ملرد تەكشە مەترگە ارتتى.

قازىرگى ۋاقىتتا الماتى جانە جەتىسۋ وبلىستارىنداعى سۋ قويمالارى 99%-عا تولدى. بۇل بىلتىرعى دەڭگەيمەن شامالاس. جامبىل وبلىسىنداعى سۋ قويمالارى 90,3%-عا تولدى. بۇل ءبىر جىل بۇرىنعىدان 43 ملن تەكشە مەترگە ارتىق.

شۋ-تالاس سۋ شارۋاشىلىعى كوميسسياسىنىڭ 35-وتىرىسىندا سۋ رەسۋرستارى جانە يرريگاتسيا مينيسترلىگى قىرعىزستاندىق ارىپتەستەرىمەن ەلىمىزگە جەتكىزىلەتىن سۋدىڭ كولەمى جونىندە كەلىسىمگە كەلگەنىن ايتا كەتەيىك. سۋارۋ ماۋسىمىندا شۋ وزەنى ارقىلى 180 ملن تەكشە مەتر سۋ، تالاس وزەنى ارقىلى 400 ملن تەكشە مەتر سۋ كەلەدى دەپ جوسپارلانىپ وتىر.

بۇعان دەيىن سۋ رەسۋرستارى جانە يرريگاتسيا مينيسترلىگى تاجىكستان، تۇرىكمەنستان جانە وزبەكستان ەلدەرىنىڭ سۋ سالاسىنداعى مەكەمەلەرىمەن كەلىسىمگە كەلدى. ناتيجەسىندە سۋارۋ ماۋسىمىندا تۇركىستان وبلىسىنداعى شاردارا سۋ قويماسىنا سىرداريا وزەنى ارقىلى 3,7 ملرد تەكشە مەتر سۋ باعىتتالاتىن بولدى.

ۆەگەتاتسيالىق كەزەڭدە شاردارا سۋ قويماسىنا سىرداريا ارقىلى 12,6 ملرد تەكشە مەتر سۋ كەلىپ ءتۇستى. بۇل باستاپقى بولجامنان 1,7 ملرد تەكشە مەترگە ارتىق.

جاقىن ارادا قازاقستان، تاجىكستان جانە وزبەكستاننىڭ سۋ شارۋاشىلىعى مەكەمەلەرى «باحري توچيك» سۋ قويماسىنان بيىلعى ماۋسىمنان تامىز ايىنا دەيىنگى كەزەڭدە سۋدى ءبولۋ ماسەلەسىن تالقىلايدى. ۆەگەتاتسيالىق كەزەڭنىڭ شارىقتاۋ شەگىندە قازاقستانعا 491 ملن تەكشە مەتر سۋ جەتكىزىلەدى دەپ كۇتىلىپ وتىر.

سۋارۋ ماۋسىمىنىڭ تۇراقتى ءوتۋى ءۇشىن مينيسترلىك 627 كم يرريگاتسيالىق كانالدى مەحانيكالىق جولمەن تازارتىپ، 488 گيدروتەحنيكالىق نىساندى جوندەۋ جۇمىستارىن جۇرگىزدى. جالپى 517 گيدروتەحنيكالىق قۇرىلىمدى جوندەپ، 2000 كم-دەن استام كانالدى تازارتۋ جوسپارلانعان. بىلتىر 1147,7 كم كانال تازارتىلعان بولاتىن.

بۇل جۇمىستاردى جۇزەگە اسىرۋ ماقساتىندا مينيسترلىك «قازسۋشار» فيليالدارى ءۇشىن 757 ارنايى تەحنيكا ساتىپ الۋدى باستادى. قازىرگى تاڭدا 303 تەحنيكا جەتكىزىلىپ، ولار كانالداردى مەحانيكالالىق جولمەن تازارتۋ جانە گيدروتەحنيكالىق نىسانداردى جوندەۋ جۇمىستارىنا بەلسەندى قولدانىلىپ جاتىر.

«جىل سايىن سۋارۋعا پايدالانىلاتىن 12 ملرد تەكشە مەتر سۋدىڭ 98%-ىن ەلىمىزدىڭ بەس وڭتۇستىك ءوڭىرى - الماتى، جامبىل، تۇركىستان، قىزىلوردا جانە جەتىسۋ وبلىستارى تۇتىنادى. سۋ شىعىنىن ازايتۋ ءۇشىن ءبىز سۋ ۇنەمدەيتىن تەحنولوگيالاردى ەنگىزۋدى ىنتالاندىراتىن شارالار قابىلدادىق. اتاپ ايتقاندا، مۇنداي تەحنولوگيالاردى ورناتۋعا بەرىلەتىن سۋبسيديالار جانە ولاردى قولداناتىن شارۋالارعا سۋعا بەرىلەتىن سۋبسيديالار قاراستىرىلعان. سونىمەن قاتار وسىرىلەتىن داقىل تۇرىنە جانە ولاردىڭ سۋدى قانشالىقتى تۇتىناتىنىنا قاراي سۋارمالى سۋعا سارالانعان تاريف ەنگىزۋ ماسەلەسى قارالىپ جاتىر»،  – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz