وا كليماتتىق قارجىلاندىرۋعا قول جەتكىزۋ ءۇشىن كۇش بىرىكتىرۋدە
2025 جىلعى 13–15 مامىر ارالىعىندا اشحاباد قالاسىندا كليماتتىڭ وزگەرۋىنە ارنالعان ورتالىق ازيانىڭ 7-ءشى كونفەرەنتسياسى (واقوك-2025) ءوتىپ جاتىر.
كونفەرەنتسيانىڭ باستى تاقىرىبى – وڭىرلىك جانە ۇلتتىق كليماتتىق شارالاردى ىسكە اسىرۋ ءۇشىن كليماتتىق قارجىلاندىرۋدى جۇمىلدىرۋ. بۇل ماسەلە جاھاندىق تەمپەراتۋرا رەكوردتارىنىڭ جاڭارۋى جانە وڭىردەگى كليماتتىق تاۋەكەلدەردىڭ ارتۋى اياسىندا اسا وزەكتى بولىپ وتىر.
واقوك-2025 كونفەرەنتسياسى ورتالىق ازيا ەلدەرىنىڭ، ۇكىمەتتەردىڭ، پارلامەنتتەردىڭ، حالىقارالىق ۇيىمداردىڭ، قارجى ينستيتۋتتارىنىڭ، عىلىمي ورتالىقتاردىڭ جانە ازاماتتىق قوعامنىڭ وكىلدەرىنەن قۇرالعان 200-دەن استام قاتىسۋشىنى بىرىكتىردى.
كونفەرەنتسيا بۇۇ-نىڭ كليماتتىڭ وزگەرۋى جونىندەگى نەگىزدەمەلىك كونۆەنتسياسى تاراپتارىنىڭ 29-شى كونفەرەنتسياسىنىڭ (COP29) شەشىمدەرىن ىسكە اسىرۋ جانە الداعى COP30-عا دايىندىق، ۇلتتىق بەيىمدەلۋ جوسپارلارى مەن جاڭا ۇلتتىق ۇلەستەردى ء(ۇداۇ 3.0) ازىرلەۋدەگى ءوڭىر ەلدەرىنىڭ ىلگەرىلەۋىن باعالاۋ، سونداي-اق جاڭا ۇجىمدىق ساندىق كليماتتىق قارجىلاندىرۋ ماقساتىنا (NCQG) سايكەس ستراتەگيالىق ءارى ءادىل كليماتتىق قارجىلاندىرۋ تاسىلدەرىن ازىرلەۋ ماسەلەلەرى بويىنشا پىكىر الماسۋ الاڭى بولدى.
واقوك-2025 كونفەرەنتسياسىنىڭ نەگىزگى ەلەمەنتتەرىنىڭ ءبىرى – ۇلتتىق باسىمدىقتاردى وڭىرلىك كليماتتىق ارحيتەكتۋراعا بىرىكتىرۋگە نازار اۋدارۋ جانە تومەن كومىرتەكتى دامۋ جولىنا كوشۋ تاجىريبەلەرىمەن الماسۋ بولدى.
قازاقستان رەسپۋبليكاسىنان كونفەرەنتسياعا مەملەكەتتىك ورگانداردىڭ، ۇكىمەتتىك ەمەس ۇيىمداردىڭ، عىلىمي-زەرتتەۋ ينستيتۋتتارىنىڭ جانە پارلامەنتتىڭ وكىلدەرىنەن قۇرالعان دەلەگاتسيا قاتىستى. دەلەگاتسيانى ەكولوگيا جانە تابيعي رەسۋرستار ۆيتسە-ءمينيسترى م. وشۋرباەۆ باستاپ باردى.
ۆيتسە-ءمينيستردىڭ سوزىندە 2026 جىلى وتەتىن وڭىرلىك كليماتتىق سامميتكە ەرەكشە نازار اۋدارىلدى. قازاقستان بۇل ءسامميتتى وڭىرلىك ديالوگتى نىعايتۋدىڭ جانە كۇش-جىگەردى ۇيلەستىرۋدىڭ ستراتەگيالىق الاڭى رەتىندە قاراستىرادى.
سونىمەن قاتار، ەكولوگيا جانە تابيعي رەسۋرستار مينيسترلىگى واقوك-2025 الاڭىندا «جاسىل كوپىر»: ءۇداۇ ىسكە اسىرۋدى جەدەلدەتۋ مەن نىعايتۋعا ارنالعان يننوۆاتسيالىق تەحنولوگيالار» اتتى پاراللەلدى سەسسيا وتكىزدى.
بۇل سەسسيا ورتالىق ازيا ەلدەرىنىڭ اراسىنداعى وڭىرلىك ىنتىماقتاستىقتى نىعايتۋعا، سونداي-اق Green Bridge Partnership Program (GBPP) جاھاندىق تسيفرلىق پلاتفورماسى ارقىلى كليماتتىق تەحنولوگيالار ترانسفەرىنىڭ تەتىكتەرىن ەنگىزۋ جولىمەن ءۇداۇ ءتيىمدى ىسكە اسىرۋعا باعىتتالعان.
Abai.kz
