كەلەس وزەنىنىڭ بويىندا ورنالاسقان اباي اۋىلى – قىم-قۋىت تىرشىلىگى قايناپ جاتقان ۇلكەن ەلدىمەكەن. تۋعان جەرىم اباي اۋىلىنىڭ تۇركىستان وبلىسى كەلەس اۋدانىنىڭ ورتالىعىنا اينالعانىنا دا جەتى جىلعا جۋىق ۋاقىت بولدى. وسى ۋاقىت ارالىعىندا اۋىلىمىز قايتا تۇلەپ، ءتۇرلى عيماراتتار سالىنىپ، جاڭارۋ ۇستىندە. تۋىپ-وسكەن اۋىلىمىزدىڭ كوركەيىپ جاتقانىنا سىرتتا ءجۇرىپ، قۋانىپ قالامىز. ادەتتەگىدەي، اۋىلىمىزدا كوكتەم ەرتە ءتۇسىپ، كۇننىڭ جىلىلىعى مەن تىرشىلىكتىڭ جاڭعىرۋى تەك تابيعاتتىڭ عانا ەمەس، جۇرەكتەگى ساعىنىشتىڭ دا ويانىپ جاتقانىن اڭعارتاتىنداي.

ويتكەنى، بۇل كوكتەم ءبىزدىڭ جۇرەگىمىزدە ەرەكشە مانگە يە. وسىدان جيىرما جىل بۇرىن ءبىز اباي اۋىلىنداعى №4 ء(بىز وقىعان جىلدارى – №74) ءجۇسىپ بالاساعۇن اتىنداعى ورتا مەكتەپتىڭ قابىرعاسىنان تۇلەپ ۇشقان تۇلەكتەرمىز.

جيىرما جىل! بۇل – از ۋاقىت ەمەس. وسى ارالىقتا ءاربىرىمىز ءومىردىڭ ءوز سوقپاعىنا تۇستىك. ءبىرىمىز – مۇعالىم، ءبىرىمىز – پوليتسيا، ەندى ءبىرىمىز – كاسىپكەر بولىپ، ءتۇرلى سالادا ەلەۋلى ەڭبەك ەتىپ كەلەمىز. بىراق، قانداي شىڭدى باعىندىرساق تا، جۇرەكتەگى مەكتەپكە دەگەن ساعىنىش ەش باسەڭدەگەن ەمەس.

جاقىندا سىنىپتاستاردىڭ باستاماسىمەن WhatsApp جەلىسىندە ارنايى توپ اشىلىپ، جيىرما جىلدىق كەزدەسۋگە دايىندىق قىزۋ باستالىپ كەتتى. ۇزاق ۇزىلىستەن كەيىن ءبىر-بىرىمىزبەن قايتا قاۋىشقانداي بولدىق. حابارلامالار لەگى تولاستاماي، ەستەلىكتەر قايتا جاڭعىرىپ، ءبارىمىز بالا كۇنگە ساياحاتتاپ كەتتىك. سىنىپ ىشىندەگى وقيعالار، ۇستازداردىڭ قاتاڭ دا قامقور سوزدەرى، سوڭعى قوڭىراۋ ءۇنى – ءبارى دە كوز الدىمىزدا كينولەنتاداي كولبەڭدەدى. ارينە، ءسوز اراسىندا بىزگە ءبىلىم بەرگەن، ومىرلىك باعىت-باعدار سىلتەگەن ارداقتى ۇستازدارىمىزدا اڭگىمە ارقاۋىنا اينالدى. قاتاڭ تالاپ قويسا دا، جۇرەگىمىزگە مەيىرىم شۋاعىن شاشقان ۇستازدارىمىزدىڭ ەڭبەگى ولشەۋسىز. ولار بىزگە تەك ءبىلىم ۇيرەتىپ قانا قويعان جوق، ومىرگە دەگەن كوزقاراسىمىزدى قالىپتاستىرىپ، ادام بولۋدىڭ ءمانىن ۇعىندىردى.

ءبىز تومەنگى سىنىپتا وقىپ جۇرگەنىمىزدە مەكتەبىمىزدىڭ ديرەكتورى قۇلبايۇلى سۋسار اعايىمىز بولدى. سۋسار اعايىمىز ءوزى ديرەكتور بولعان جىلدارى مۇعالىمدەردى جۇمىسقا الار كەزدە كوبەيتۋ كەستەسىن سۇرايدى ەكەن دەگەندى ءجيى ەستيتىنبىز. ياعني، سۋسار اعاي ءاربىر مۇعالىمىنىڭ بىلىمىنە، كاسىبي بىلىكتىلىگىنە ءجىتى ءمان بەرگەن. سونىڭ ناتيجەسىندە مەكتەبىمىزدىڭ مۇعالىمدەرى اباي اۋىلى بويىنشا، ءتىپتى اۋدان كولەمىندە الدىڭعى قاتاردا بولدى. سوندىقتان بولار مەكتەبىمىزدى اۋىل حالقى بەيرەسمي «سۋسار مەكتەبى» اتاپ كەتكەن.

سىنىپ دەگەن – كىشكەنتاي الەم. ال سول الەمنىڭ وزەگى، جۇرەگى – سىنىپ جەتەكشى. قاي كەزدە دە شاكىرت ءۇشىن ەڭ ءبىرىنشى تىرەك، ءاردايىم جانىن سالىپ قورعايتىن، دۇرىس پەن بۇرىستىڭ، جاقسى مەن جاماننىڭ ارا-جىگىن ايىرىپ بەرەتىن دە – ءدال وسى جان. ءبىزدىڭ سىنىپقا باستاۋىشتا ايتىلەۋوۆا نۇرجامال اپاي سىنىپ جەتەكشى بولىپتى. بولىپتى دەپ وتىرعانىم دا بەكەر ەمەس. سەبەبى، مەن بۇل مەكتەپكە 5-سىنىپتا شاردارادان اۋىسىپ كەلدىم. مەن اۋىسىپ كەلگەن جىلى جوعارى سىنىپقا اۋىسقان ءبىزدىڭ «ا» سىنىبى ءا دەگەننەن ۇلگىلى سىنىپقا اينالىپ ۇلگەردى. بۇل ارينە، ءوز كەزەگىندە نۇرجامال اپايىمىزدىڭ باستاۋىش كەزىندەگى بەرگەن ءبىلىمىنىڭ، ءتالىم-تاربيەسىنىڭ ناتيجەسى دەر ەدىم.

جوعارى سىنىپتا العاشىندا بىزگە تۇرماحانوۆا فەرۋزا اپايىمىز سىنىپ جەتەكشىلىك ەتتى. بۇدان وزگە فەرۋزا اپاي اعىلشىن تىلىنەن دە ساباق بەردى. فەرۋزا اپايىمىزدىڭ العاشقى ساباعى ءالى ەسىمدە. ۇزىلىستە جاتتاعان اعىلشىنشا امانداسۋدى ءبىر-بىرىمىزگە قايتالاپ اسىر سالىپ ويناعانبىز. اعىلشىن تىلىنەن، ەڭ جاقسى ۇيرەنگەنىم «I am sorry, I am late may ءى come in» بولدى. بۇل ۇزىلىستەن ساباققا كەشىككەن كەزىمىزدە اپايىمىزعا قاراتا ايتاتىن جاتتاندى ءسوزىمىز (اتالمىش جولداردىڭ سانامدا جاتتالىپ قالعانىنا قاراعاندا ساباقتان ءجيى كەشىككەن بولۋىم كەرەك). دەگەنمەن، ءبىزدىڭ سىنىپتا اعىلشىن ءتىلىن اپايىمىزدىڭ ارقاسىندا ەركىن مەڭگەرگەندەر جەتەرلىك ەدى. كەيىننەن ەكى سىنىپتاسىمىز (كۇمىسبەكوۆ مەلس، جيەمبەك ابدىقايىم) «بولاشاق» باعدارلاماسىمەن شەت ەلدە ءبىلىم الدى. مۇنى فەرۋزا اپايىمىزدىڭ بەرگەن ءبىلىمىنىڭ ناتيجەسى دەسەم ارتىق ايتقاندىق بولماس.

كەيىننەن بىزگە ۇتەۋليەۆا ەركىناي اپايىمىز سىنىپ جەتەكشىلىك ەتىپ، 2005 جىلى مەكتەپ قابىرعاسىنان تۇلەتىپ، ۇشىردى. 8-سىنىپتان باستاپ سىنىبىمىز مەكتەپ اكىمشىلىگىنىڭ  ۇيعارىمىمەن قازاق ءتىلى مەن ادەبيەتى پانىنەن تەرەڭدەتىلگەن سىنىپقا اينالدى. كەيبىر سىنىپتاستارىمىز «ب» سىنىبىنا اۋىسىپ، ول سىنىپتان دا بىزگە وقۋشىلار اۋىسىپ كەلدى.

سىنىپ جەتەكشىلەرىنەن وزگە سانامىزدا وشپەستەي ءىز قالدىرعان ءپان مۇعالىمدەرىن اتاپ وتپەۋىم ابەستىك بولار دەپ ويلايمىن. قۇلبايۇلى سۋسار، انارباەۆا ايسۇلۋ، شىمىرباي انار، سەلتانوۆا بەيبىتكۇل، ساتەميروۆا الماگۇل، بايعابىلوۆا گۇلجان، تۇرماحانوۆا فەرۋزا، ۋتەۋليەۆا ەركىناي، ايداروۆ نۇرلان، سۇلتاحانوۆا ايگۇل، ايتلەۋوۆ نۇرتاس، يبراەۆا جانار، ەرمەكوۆ التىنبەك، كۇشىبارۇلى باقىت، تۇرسىنباەۆ ايبەك، تاۋتەەۆا ناعيما، بەكتۇرسىنوۆ اتابەك، يساباەۆا قارشىعا، ايتقۇلوۆ پەردەباي، ساپاروۆا نۇرگۇل، قالعانباەۆ سادىق، بەكتان زالبەك، جيەنبەكوۆ راحمانقۇل، مامىرباەۆ مۇرات، ەسەنبەكوۆ جانىبەك ت.ب. اعايلار مەن اپايلار ءتۇرلى پاندەردەن ساباق بەردى. سونداي-اق، ءبىز وقىعان جىلدارى ديرەكتور بولعان قازبەكۇلى تۇرسىنباي اعاي مەن وقۋ ءىسىنىڭ مەڭگەرۋشىسى ەرگەشوۆا رايحان، تاربيە ءىسىنىڭ مەڭگەرۋشىسى ابسيكوۆا ساۋلە اپايلاردىڭ ءبىزدىڭ ادام بولىپ قالىپتاسۋىمىزداعى ەڭبەگىن جوعارى باعالايمىن.

الەمدىك جاراتىلىستىڭ قىر-سىرىن، ءتۇرلى قۇبىلىستاردىڭ سەبەپتەرىن تۇسىندىرەتىن فيزيكا پانىنەن ايتىلەۋوۆ نۇرتاس اعاي ساباق بەردى. ۇستازىمىز فيزيكا ساباعىندا ءبىز، ەڭ الدىمەن، «نەگە» دەگەن سۇراققا جاۋاپ ىزدەيمىز دەپ ءدارىسىن باستايتىن. سونداي-اق، نۇرتاس اعاي ساباق بارىسىندا فيزيكادان وزگە ومىرلىك قۇندىلىقتار جايلى دا ءجيى ايتاتىن. سول كەزدە مۇنى نەگە بىزگە ايتا بەرەدى دەگەن سۇراق كوكەيىمىزدە بولمادى دەسەم، وتىرىك ايتقان بولار ەدىم. وسە كەلە ومىردە كەزدەسەتىن ءتۇرلى قيىندىقتارمەن بەتپە-بەت كەزدەسكەن تۇستا ۇستازىمىز «ءومىر تۋرالى دارىستەرىن» بەكەرگە ايتپايتىندىعىن ۇققانداي بولدىق.

بۇگىندە ءتۇرلى جۇمىستاردى (اسىرەسە، ءۇيدى جوندەۋ جۇمىستارىن جۇرگىزگەن كەزدە) ولشەم-سىزبالاردى قاتەلىكسىز شىعارعان كەزدە گەومەتريا پانىنەن ساباق بەرگەن انارباەۆا ايسۇلۋ اپايىمىزعا راحمەتىمىزدى ايتامىز. ساباقتان كەشىككەن وقۋشىلارعا قولداناتىن «ءادىسى» ەستەن كەتپەيدى. ول كىسى مىندەتتى تۇردە ساباقتان كەشىگىپ كەلگەن بالاعا دەنەنى جەردەن كوتەرۋ جاتتىعۋىن (وتجيمانيە) جاساتاتىن. بۇل دا ءوز ناتيجەسىن بەرىپ، ساباقتان كەشىگۋىمىز ازايماعانىمەن (قازىر ويلاسام مۇنىمىز قاتەلىك ەكەن) جاتتىعۋدى اجەپتەۋىر جاسايتىن دەڭگەيگە جەتتىك.

شىمىرباي انار اپايىمىز تاريح پانىنەن ساباق بەردى. تاريح پانىنە دەگەن قىزىعۋشىلىعىمدى وياتقان، تاريحشى بولۋىما اسەر ەتكەن ۇستازىم رەتىندە ەرەكشە قۇرمەتتەيمىن. مەكتەپ كەزىندە تاريح پانىنەن ەكى رەت اۋداندىق وليمپياداعا دا الىپ بارعانى كۇنى بۇگىنگە دەيىن ەسىمدە. سونداي-اق، 5-سىنىپتا سەلتانوۆا بەيبىتكۇل اپاي تاريحي وقيعالاردى قاراپايىم تىلمەن سانامىزعا مىقتاپ سىڭىرگەندىگىن ايتا كەتكەنىم ءجون دەپ ويلايمىن.

ءوز ىسىنە بەرىلگەن ۇستازىمىزدىڭ ءبىرى – بيولوگيا پانىنەن ساباق بەرگەن يبراەۆا جانار اپاي. ساباق بارىسىندا ميكروسكوپتان وسىمدىكتەردىڭ ساباعىن، پيازدىڭ قابىعىن ت.ب. كورسەتەتىن. كەزەكتى ءبىر ساباعىندا جانار اپايىمىز «سوت ساباعى» دەگەن ەرەكشە اشىق ساباعىن وتكىزدى. ساباق جەلىسى بويىنشا ءبىز، ياعني، وقۋشىلار سوت، قورعاۋشى، ايىپتاۋشى، ايىپتالۋشىلار (كوكونىس تۇرلەرى) بولىپ بولىندىك. اشىق ساباقتىڭ نەگىزگى ماقساتى كۇندەلىكتى تۇرمىستا تۇتىناتىن كوكونىستەردىڭ پايداسى مەن زيانىن انىقتاۋ ەدى.

جوعارىدا اتاپ وتكەنىمدەي ءبىز قازاق ءتىلى مەن ادەبيەتى پانىنەن تەرەڭدەتىلگەن سىنىپ بولدىق. سوندىقتان، بىزدە قازاق ءتىلى مەن قازاق ادەبيەتى پاندەرى اپتاسىنا سەگىز رەت بولاتىن. اتالمىش پاندەردەن بىزگە العاشىندا بايعابىلوۆا گۇلجان، كەيىننەن ساتەميروۆا الماگۇل اپايلارىمىز ساباق بەردى. سىنىپتاستار جينالعان سايىن كۇلىپ ەسكە الاتىن ءبىر وقيعانى ايتىپ وتسەم دەپ وتىرمىن. گۇلجان اپايىمىزدىڭ قازاق ادەبيەتىنەن كەزەكتى ءبىر ساباعى بولىپ جاتقان. تاقتاعا سۇرانىپ شىعىپ، ولەڭ جولدارىن جاتقا ايتۋىم كەرەك ەدى. بىراق، ۇمىتىپ قالعان تۇستارىمدى قارايىن دەپ، ولەڭ جولدارىن قالامساپپەن الاقانىما جازىپ الدىم. تاقتاعا شىعىپ ولەڭدى اراسىندا الاقانىما قاراپ ايتىپ تۇرعانمىن. الدىڭعى پارتادا وتىرعان سىنىپتاسىم مەلس مەنىڭ «قۇيتىرقى» ارەكەتىمدى بايقاپ قالىپ (ارينە، ۇستازىم گۇلجان اپاي بايقاپ وتىرعاندىعى بەلگىلى ەدى), ورنىنان تۇرا ۇمتىلىپ، «اپاي مىنانى قاراڭىز، نۇرلىبەك قولىنا قاراپ ايتىپ جاتىر»، –  دەپ قولىمنان ۇستاپ اپايعا قاراي تارتا ءتۇستى. قانداي تۇلەن تۇرتكەنىن بىلمەيمىن، ساباق ۇستىندە ەكىنشى قولىممەن سىنىپتاسىم مەلستى بەتىنەن تارتىپ جىبەرىپ، «جوعال ارى» دەپ داۋسىم شىعىپ كەتكەنىن ءوزىم دە بايقاماي قالدىم. مەنەن مۇنداي ارەكەت كۇتپەگەن مەلس بىردەن توقتاپ ۇندەمەي بارىپ، ورنىنا وتىرا قالدى. وقيعانىڭ جىلدام بولعانى سونشالىق، سىنىپتا بىردەن تىنىشتىق ورناپ، ارتىنان سىنىپتاستارىم بىردەن دۋ كۇلدى. اتالمىش وقيعانى جازا وتىرىپ، سىنىپتاس دوسىم مەلستەن كەشىرىم سۇرايمىن!

مەكتەپ بولعان سوڭ بۇزىقتىق تا بولدى. بايقاۋسىزدا، كەيدە ادەيىلەپ جاسالعان تەنتەكتىكتەر... وندايدا ءبارىمىزدىڭ «اياق تارتاتىن» ۇستازىمىز – بەكتۇرسىنوۆ اتابەك اعاي. اعايىمىز ءوزىنىڭ پانىنەن بىزدەن ءتارتىپ پەن دەنە شىنىقتىرۋ كيىمىنىڭ بولۋىن قاتاڭ تالاپ ەتەتىن. بۇل ءبىزدى ومىردە ءاربىر ىسىمىزگە جاۋاپكەرشىلىكپەن قاراۋعا ۇيرەتتى. سونىمەن قاتار، اتابەك اعاي دەنە شىنىقتىرۋ پانىمەن قاتار، «ب» سىنىبىنىڭ سىنىپ جەتەكشىسى دە بولدى.

ەرمەكوۆ التىنبەك اعاي قۇقىقتان ساباق بەردى. اعايىمىز 10 سىنىپتا وقىپ جۇرگەنىمىزدە اباي اۋىلىندا ورنالاسقان كەزەكتى ءبىر سوت وتىرىسىنا قاتىستىردى. سوتتا مال ۇرلىعىنا قاتىستى ماسەلە قارالىپ جاتىر ەكەن. وسى سوت وتىرىسى ءبىزدىڭ قۇقىقتىق تۇرعىدان ساۋاتىمىزدى ارتتىرىپ، قىلمىستىڭ وتەۋى جازا ەكەندىگىن سانامىزعا مىقتاپ ءسىڭىردى. سونىمەن قاتار، قۇقىق پانىنەن اتى «ەرەكشە» بەكتان زالبەك اعايىمىز دا ساباق بەردى جانە 11 «ءا» سىنىبىنا سىنىپ جەتەكشىلىك ەتتى.

ەڭبەك پانىنەن ۇلدارعا ساباق بەرگەن قالعانباەۆ سادىق اعاي. سادىق اعايىمىز ساباق بارىسىندا ماشينا موتورىنىڭ جۇمىس ىستەۋ قۇرىلىمىن سيپاتتاپ، ءاربىر بولشەگىن تاپتىشتەپ سيپاتتاپ بەرەتىن. سونداي-اق، مەكتەپ بىتىرگەن سوڭ وزدەرىڭە قاجەت بولادى دەپ قازاقستان رەسپۋبليكاسى جول قوزعالىسى ەرەجەلەرىن جاتتاتقىزاتىن.

مەكتەپ كەزىندە تىكەلەي ساباق بەرمەسە دە جادىمدا ساقتالعان كىتاپحاناشى يبرايموۆا ۇلجان اپايىمدى اتاپ وتپەسەم بولمايدى. كىتاپقا دەگەن اۋەستىگىم 5 سىنىپتان باستاپ وياندى. كۇنىگە ۇزىلىستە مەكتەپ كىتاپحاناسىنا ءبىر سوعىپ وتەتىنمىن. ۇلجان اپايىم كۇلىمدەپ قارسى الاتىن. ۇيگە وقۋعا دەپ بىرنەشە كىتاپ الىپ كەتەتىنمىن. كەيبىرىن وقىپ، كەيبىرىن وقىپ ۇلگەرمەي قايتا تاپسىرۋعا اسىعامىن. كۇندە كەلگەنىمە كۇدىكتەنگەن ۇلجان اپايىم كەيدە «سەن وسى شىنىمەن وقىپ ءجۇرسىڭ بە؟» دەپ سۇراپ قوياتىن. ءسويتىپ، ءجۇرىپ مەكتەپ كىتاپحاناسىن دا وقىپ تاۋىستىم دەسەم دە بولادى. كەيىننەن مادەنيەت ۇيىندە ورنالاسقان اۋىلدىق كىتاپحانانىڭ تۇراقتى وقىرمانىنا اينالدىم.

ارينە، كەيبىر ۇستازدارىم تۋرالى جازىلمادى (ۇستازدارىمنىڭ ءاربىرى جايلى توم-توم كىتاپ جازۋعا بولار ەدى. ونى الداعى ۋاقىتتىڭ ەنشىسىنە قالدىرايىن). مەكتەپتەگى بۇكىل ەستەلىكتەردىڭ ءبارىن ءبىر ماقالا اياسىنا سىيدىرا المايتىندىعىم انىق. سوندىقتان، مۇنداعى جازىلعان ءاربىر جولداردى بارلىق ءبىلىم نارىمەن سۋسىنداتقان ۇستازدارىم وزدەرىڭىزگە تىكەلەي ارنالىپ وتىر دەپ قابىلداڭىزدار!

سىنىپ بولمەسىندە ۋلاپ-شۋلاپ وتىرعانىمىز كەشە عانا سياقتى ەدى. انە-مىنە دەگەنشە 20 جىل دا وتە شىعىپتى. كوز الدىما كينولەنتاداي وقيعالار جەلىسى، سىنىپتاستاردىڭ بەينەسى كەلەدى. ساباق ۇستىندە ءجيى سويلەپ مۇعالىمدەردەن ۇرىس ەستيتىن كۇمىسبەكوۆ مەلس، سىنىپ ستاروستاسى كارپەكوۆا مايرا، ەسەپ شىعارۋدان جارىساتىن يبرايموۆا نۇرگۇل مەن وسپانوۆا ەلميرا، ءاردايىم ديسسكۋسسياعا تۇسۋگە دايىن تۇراتىن جيەمبەك ابدىقايىم، سىنىبىمىزدىڭ «قوجاسى» دەۋگە بولاتىن ءپىرمانوۆ باقىت، مەكتەپ كومپيۋتەرلەرىنە ويىن جازىپ تاستايتىن قۇلىشەۆ نۇربەك، سىنىپتىڭ «اقىلدى تەنتەكتەرى» ابديكۋلوۆ ماقسات پەن تەمىراليەۆ دانيار، سىزىلىپ كۇلىپ وتىراتىن سۇلۋلار قالساەۆا ايگۇل مەن قۇدايبەرگەنوۆا اقجامال، ءبىر كوشەدە تۇراتىندىقتان «ايتەكە بي» اتانعان توعىزوۆ مەيرامبەك، ارعىنباەۆ دانيار، ەرمانوۆ ەرعالي، 7-سىنىپتا جاڭاقورعانعا كوشىپ كەتكەن ءجۇسىپوۆ دانيار، بۇكىل سىنىپتىڭ جىگىتتەرى ساباقتان قاشىپ كەتسە دە قىزدارمەن جالعىز قالاتىن ءتارتىپتى كوشكىنباەۆ ءابۋتالىپ، قول كۇرەستىڭ شەبەرى اليپوۆ باعدات، سىنىبىمىزدىڭ ارۋلارى وسەرباەۆا اقەركە، وماروۆا گۇلجان، جوراەۆا مادينا، مامىتباەۆا ارايلىم، شاكيروۆا لۋيزا، ساپاركۋلوۆا مارينا،  ءاردايىم سىنىپتىڭ ابىرويىن بيىك ۇستاۋعا تىرىساتىن ەرگەشباەۆ قالياسقار مەن ستامبەكوۆ جاقسىلىق، «ايگۇلدىڭ كورشىسى» ەسجانوۆ ەربول سىندى قىز-جىگىتتەرمەن ءبىر سىنىپتا وقىعانىمدى ماقتان ەتەمىن.

ەستەلىك جولدارى... نەلىكتەن بۇل ەستەلىكتى جازىپ وتىرمىن؟ ءوزىم دە ءدوپ باسىپ ايتا المايمىن. بالكىم، بۇل – بالالىق شاققا شەگىنىس. بالكىم، مەكتەپ تابالدىرىعىنداعى ءتاتتى ساتتەرگە دەگەن ساعىنىش. الدە... ۇستازدار بەرگەن ءبىلىم مەن تاربيەنىڭ وتەۋى بولسىن دەگەن نيەت پە؟ كىم ءبىلسىن...

ءبىر انىعى – ەڭبەگىڭىز ەش كەتكەن جوق، ۇستازىم (ۇستازدارىم)! ءسىز ءتالىم بەرگەن شاكىرتتەر بۇگىندە تاعدىر جازعان ءومىر جولىمەن ءوز تىرشىلىگىن كەشىپ كەلەدى. ءبىرى – شاڭىراقتىڭ ۇيىتقىسى بولعان اياۋلى انا، ءبىرى – وتباسىنىڭ اسىراۋشىسى، قورعانى. ۋاقىت ءوز اعىسىمەن زىرعىپ، كۇندەلىكتى كۇيبەڭ تىرشىلىك جالعاسىپ جاتىر. بىراق... جۇرەك تۇكپىرىندە ءسىزدىڭ بەرگەن ونەگەڭىز، ەتكەن ەڭبەگىڭىز ۇمىتىلعان جوق.

ساباق ۇستىندەگى ءاربىر ايتقان ءسوزىڭىز، ءاربىر كەڭەسىڭىز – ءبىز ءۇشىن ءومىر جولىندا شامشىراق بولدى. سول نۇردىڭ جەتەگىندە ءبىز اداسپاي، العا باستىق، ەسەيدىك، ومىردەن ءوز ورنىمىزدى تاپتىق.

ۇستاز الدىنداعى پارىز – ۇمىتىلماس قارىز. سىزگە دەگەن العىس – جۇرەك تورىندە. قانشا جىل وتسە دە، ءار شاكىرتىڭىزدىڭ جۇرەگىندە ءسىزدىڭ بەينەڭىز ماڭگىلىك ساقتالادى. جيىرما جىل – كوپ نارسەنى وزگەرتكەنىمەن، جۇرەكتەگى ساعىنىشتى، ۇستازعا دەگەن قۇرمەت پەن دوستار اراسىنداعى بايلانىستى وشىرە الماعان ەكەن. الدا – كەزدەسۋ. ال ول كەزدەسۋ تەك جۇزدەسۋ ەمەس، وتكەنگە تاعزىم، ۇستازعا العىس، دوستىققا سەرت بولماق.

بارشا ءبىلىم نارىمەن سۋسىنداتقان ۇستازدارىمىزعا دەگەن زور قۇرمەتپەن

№4 ءجۇسىپ بالاساعۇن اتىنداعى ورتا مەكتەپتىڭ 11 «ا» سىنىبىنىڭ 2005 جىلعى تۇلەكتەرىنىڭ اتىنان قالام تەربەپ وتىرمىن.

نۇرلىبەك دوسىمبەتوۆ

ش.ش. ءۋاليحانوۆ اتىنداعى

تاريح جانە ەتنولوگيا ينستيتۋنىنىڭ

عىلىمي قىزمەتكەرى

Abai.kz