پۋتين رەسەي شەكاراسى ماڭىندى بۋفەرلى ايماق قۇرۋ شەشىمى قابىلدانعانىن ايتتى. «قازىر اسكەريلەر وسى مىندەتتى ىسكە اسىرۋدا» دەيدى.

اڭگىمە سۋمى جانە حاركوۆ وبلىستارى جايلى دەۋگە بولادى. رەسەي سۋمى جانە حاركوۆ ماڭىندا اقپارات بويىنشا 80-120 مىڭ اسكەر توپتاستىرعان. سۋمى باعىتىندا بىرنەشە ەلدى-مەكەندى باسىپ السا، حاركوۆ باعىتىندا شابۋىلدى كۇشەيتكەن.

حاركوۆ وبلىسىنا 2022 جىلى كىرىپ، ايماقتىڭ 30 پايىزعا جۋىعىن وككۋپاتسيالاعان بولاتىن. ۋكراينا سول جىلدىڭ كۇزىندە قارىمتا شابۋىل جاساپ، رەسەي باسىپ العان جەرىنىڭ باسىم بولىگىن جوعالتتى. وبلىستىڭ 5 پايىزعا جۋىق ايماعىن ۇستاپ تۇردى. ال 2024 جىلدىڭ مامىرىندا حاركوۆ وبلىسىندا شابۋىلعا شىعىپ، بۋفەرلى ايماق جاساماق بولدى. دەگەنمەن ۆولچانسك قالاسىندا باتپاققا باتىپ قالدى. قازىر قالانىڭ تەڭ جارتىسى ۋكراين، تەڭ جارتىسى رەسەيلىك ساربازدار قولىندا. ەندى مىنە وسى باعىتتاعى شابۋىلداردى قايتا ۇدەتە تۇسۋدە.

ال سۋمى وبلىسىنا شابۋىلدار ۋكراينا كۋرسكتەن شەگىنگەن سوڭ كۇشەيدى. قازىر سۋمى وبلىسىنىڭ شەكارالىق ايماعىنداعى كىشى اۋىلداردىڭ بىرنەشەۋىن رەسەي باسىپ العان. سونىمەن بىرگە ۋكراينا ءدال وسى وبلىستا جۇزدەن استام ەلدى-مەكەندى ەۆاكۋاتسيالاۋى مۇمكىن ەكەنىن ايتۋدا. جاقىن ارالىقتا ول ەلدى-مەكەندەر ءۇشىن قيان-كەسكى شايقاستار بولادى. سۋمى قالاسىنىڭ ءوزى شەكارادان 40 شاقىرىم جەردە جاتىر. ۇلكەن قالا. 200 مىڭنان استام تۇرعىنى بار.

باسقا باعىتتا دا رەسەي شابۋىلدى كۇشەيتىپ جاتىر. «جازدىق شابۋىلدارى باستالدى» دەيدى كەي اسكەري ساراپشىلار. اسىرەسە دونباسستا سوعىس قىزىپ جاتىر. جاقىن ارالىقتا رەسەي اسكەرى جاڭا وبلىسقا ءوتۋى مۇمكىن، ول دنەپروپەتروۆسك وبلىسى. وندا ءسوزسىز رەسەي مەدياسى بۇل ارەكەتىن «ۇلى جەڭىس» رەتىندە سيپاتتايتىن بولادى.

جازدىڭ ورتاسىندا بايدەن بيلىگى ۋكرايناعا كومەك رەتىندە بولگەن قارۋ تاۋسىلادى، ال ترامپ اكىمشىلىگى كيەۆكە كەزەكتى قارۋ پارتياسىن ماقۇلداۋى ەكىتالاي. ترامپ پرەزيدەنتتىك مەرزىمىنىڭ ەكىنشى كەزەڭىندە ۋكرايناعا ۇلكەن قىسىم جاساسا دا، اگرەسسور سانالاتىن رەسەيگە ايتارلىقتاي قىسىم جاساعان جوق. ازىرگە سولاي جالعاسۋدا...

اسحات قاسەنعالي

Abai.kz