بۇگىن ەلىمىزدىڭ ءار وڭىرىندە ايت نامازى وقىلىپ مۇسىلمانداردىڭ ۇلىق مەرەكەسىنىڭ ءبىرى - ءۇش كۇن تويلاناتىن قۇربان ايت باستالدى. مەملەكەت باسشىسى قاسىم-جومارت توقاەۆتىڭ بارشا قازاقستاندىقتاردى قۇربان ايت مەرەكەسىمەن قۇتتىقتادى:

"ارداقتى اعايىن!

قۇربان ايت مەرەكەسى قۇتتى بولسىن!

بارشا مۇسىلمان قاۋىم ءۇشىن قاسيەتتى سانالاتىن بۇل مەيرام – يماندىلىق پەن ىزگىلىكتىڭ سيمۆولى.

ايت كۇندەرى مۇقتاج جاندارعا جاقسىلىق جاساپ، كومەك كورسەتۋ – اتا-بابالارىمىزدان جالعاسىپ كەلە جاتقان يگى ءداستۇر. اسىل ءدىنىمىز ازاماتتاردى ءبىر-ءبىرىن قۇرمەتتەۋگە، جاقىندارىنا جاناشىر بولۋعا ۇندەيدى. باۋىرلاستىق پەن سىيلاستىقتى دارىپتەيدى. حالقىمىزدىڭ بەرەكەلى بىرلىگى وسىنداي ىزگى قۇندىلىقتاردىڭ ارقاسىندا نىعايا تۇسەدى.

قۇربان ايت – ىرىستى ىنتىماقتىڭ مەرەكەسى. ءبىز ەلىمىزدەگى تۇراقتىلىقتىڭ قادىرىن ءبىلىپ، تاتۋلىقتى ساقتاۋ ارقىلى كەز-كەلگەن سىننان سۇرىنبەي ءوتىپ، بيىك ماقساتتارعا جەتەمىز. ادىلەتتى، تازا، قاۋىپسىز ءارى قۋاتتى قازاقستاندى بىرگە قۇرامىز.

قۇربان ايت كەزىندە ايتىلار  دۇعا-تىلەكتەر قابىل بولسىن!

ءار شاڭىراققا قۇت-بەرەكە قونسىن!

ايتتان ايتقا امان-ەسەن جەتە بەرەيىك!" دەپ اق جارما تىلەگىن جەتكىزدى.

پرەزيدەنت قاسىم-جومارت توقاەۆتىڭ اتىنا قۇربان ايت مەرەكەسىنە وراي شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرىنەن قۇتتىقتاۋ حاتتارى كەلىپ ءتۇسىپ جاتىر.

وزبەكستان پرەزيدەنتى شاۆكات ميرزيوەۆ مەملەكەت باسشىسى مەن قازاقستان حالقىنا ىزگى تىلەگىن جولداعان.

"سوڭعى جىلدارى ءبىزدىڭ باتىل ساياسي ەرىك-جىگەرىمىزدىڭ ارقاسىندا حالىقتارىمىز اراسىنداعى سان عاسىرلىق تىعىز دوستىق پەن تاتۋ كورشىلىك بايلانىستار مۇلدە جاڭا وداقتاستىق دەڭگەيىنە كوتەرىلگەنىن ايرىقشا اتاپ وتكىم كەلەدى", – دەلىنگەن جەدەلحاتتا.

قىرعىزستان پرەزيدەنتى سادىر جاپاروۆ قۇربان ايت ادامداردىڭ بويىنداعى مەيىرىمدىلىك، راقىمشىلىق، توزىمدىلىك پەن قايىرىمدىلىق سەكىلدى اسىل قاسيەتتەردى جان-جاقتى تانىتاتىن ەرەكشە مەيرام ەكەنىن ايتقان.

"بۇل مەرەكە باۋىرلاس حالىقتارىمىزعا بەيبىتشىلىك سىيلاپ، باق-بەرەكە دارىتىپ، قىرعىز-قازاق ستراتەگيالىق سەرىكتەستىگى مەن ءوزارا ءتيىمدى ىنتىماقتاستىعىنىڭ بەلسەندى دامۋىنا ىقپال ەتە بەرەتىنىنە سەنىمدىمىن", – دەپ جازىلعان قۇتتىقتاۋدا.

تاجىكستان پرەزيدەنتى ەمومالي راحمون دا قاسىم-جومارت توقاەۆتى قۇربان ايت مەرەكەسىمەن قۇتتىقتادى.

"وسى مەرەكەنىڭ ىزگىلىك، تولەرانتتىلىق، قايىرىمدىلىق جانە ءوزارا قولداۋ سياقتى رۋحاني نەگىزى الداعى ۋاقىتتا دا مەملەكەتتەرىمىزدىڭ جانە حالىقتارىمىزدىڭ اراسىنداعى دوستىقتى، ەكىجاقتى ءتيىمدى ىنتىماقتاستىقتى ودان ءارى نىعايتۋعا بەرىك نەگىز قالايتىنىنا سەنەمىن", – دەلىنگەن تاجىك كوشباسشىسىنىڭ قۇتتىقتاۋىندا.

تۇرىكمەنستان پرەزيدەنتى سەردار بەردىمۇحامەدوۆ مەملەكەت باسشىسىنا زور دەنساۋلىق، مول باقىت، ال باۋىرلاس قازاق حالقىنا قۇت-بەرەكە تىلەدى.

قۇربان ايت مەيرامىنا وراي وزدەرىنىڭ ىزگى تىلەكتەرىن ازەربايجان پرەزيدەنتى يلحام اليەۆ، تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ، ءباا پرەزيدەنتى شەيح مۇحاممەد بەن زايد ءال ناحايان، مىسىر پرەزيدەنتى ابدەل فاتتاح ءاس-سيسي، يوردانيا كورولى II ابداللا، كۋۆەيت ءامىرى شەيح ميشاال ءال-احماد ءال-دجابەر اس-ساباح، ومان سۇلتانى حايسام بەن تاريق، باحرەين كورولى حاماد بەن يسا ءال حاليفا، پالەستينا پرەزيدەنتى ماحمۋد ابباس، الجير پرەزيدەنتى ابدەلماجيد تەببۋن، ءباا ۆيتسە-پرەزيدەنتى، پرەمەر-ءمينيسترى، دۋباي ءامىرشىسى شەيح مۇحاممەد بەن راشيد ءال ماكتۋم جانە تاعى باسقالار جولدادى.

قۇتتىقتاۋ حاتتارى مەن جەدەلحاتتار ءالى دە كەلىپ ءتۇسىپ جاتىر.

قاسيەتتى قۇربان ايت قۇتتى بولسىن اعايىن!

Abai.kz