قازاقستان بويىنشا ساياحاتتاۋ قىتاي تۋريستەرى ءۇشىن بۇرىنعىدان دا قولجەتىمدى بولماق. تۋريزم سالاسىنداعى قحر جەتەكشى digital-پلاتفورمالارىنىڭ ءبىرى «Zowoyoo» ورتالىق ازياداعى العاشقى كەڭسەسىن الماتى قالاسىندا اشتى. بۇل تۋرالى وڭتۇستىك استانادا وتكەن «تسيفرلىق جىبەك جولى – 2025» حالىقارالىق فورۋمىندا جاريالاندى.

فورۋم قازاقستان مەن قىتايدىڭ تۋريزم يندۋسترياسى وكىلدەرى اراسىنداعى ءوزارا ءتيىمدى ىنتىماقتاستىقتى نىعايتۋعا باعىتتالعان. وعان ەكى ەلدىڭ جەتەكشى ساراپشىلارى، تۋروپەراتورلارى، قوناق ءۇي بيزنەسى مەن Ctrip, Tongcheng, JD Travel ءتارىزدى ءىرى تەحنولوگيالىق كومپانيالارىنىڭ وكىلدەرى قاتىستى.

فورۋم اياسىندا «Kazakh Tourism» مەن «Zowoyoo» كومپانيالارى ىنتىماقتاستىق تۋرالى مەموراندۋمعا قول قويدى. قۇجات قازاقستاننىڭ تۋريستىك الەۋەتىن قىتاي نارىعىندا تسيفرلىق فورماتتا دارىپتەۋگە، قىتايدان تۋريستەردى بەلسەندى تارتۋعا باعىتتالعان.

جوسپار بويىنشا تاراپتار اسپان استى ەلىندەگى ساياحاتشىلارعا بەيىمدەلگەن زاماناۋي تسيفرلىق ەكوجۇيەنى دامىتادى. سەرىكتەستىك اياسىندا قازاقستاندى قىتايداعى Douyin (TikTok-تىڭ بالاماسى), Xiaohongshu (Little Red Book) ءتارىزدى تانىمال پلاتفورمالاردا  جانە باسقا مەدياارنالاردا ۇسىنىلۋىن كەڭەيتۋ قاراستىرىلعان.

«Zowoyoo قىتاي قولدانۋشىلارىنىڭ تسيفرلىق مىنەز-قۇلقىن جاقسى تۇسىنەدى. بۇل بىزگە جاڭا بۋىن تۋريستەرىنىڭ تالعامى قالىپتاساتىن نەگىزگى پلاتفورمالاردا بارىنشا جەكە ستراتەگيا قۇرۋعا مۇمكىندىك بەرەدى. وسىلايشا ءبىز ءاربىر ساياحاتشىعا بەيىمدەلگەن تاجىريبە ۇسىنىپ، ولاردىڭ ساپاردى جوسپارلاۋىن ەداۋىر جەڭىلدەتەمىز. قىتايلىق سەرىكتەسپەن جوسپارلانعان بىرلەسكەن باستامالاردى ىسكە اسىرۋ بيۋدجەتتىك قارجىلاندىرۋدى قاجەت ەتپەيتىنىن اتاپ وتكىم كەلەدى»، - دەپ اتاپ ءوتتى «Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجانۇلى.

قىتاي دەلەگاتسياسىنا ەلىمىزدىڭ تۋريستىك الەۋەتى تانىستىرىلىپ، تۋريزم سالاسىنداعى ىنتىماقتاستىقتى كەڭەيتۋ مۇمكىندىكتەرى تالقىلاندى. پانەلدىك سەسسيالار بارىسىندا ەكى نەگىزگى تاقىرىپ كوتەرىلدى: تۋريزم ەكوجۇيەسىنىڭ تسيفرلىق ترانسفورماتسياسى جانە زاماناۋي مەديالار ارقىلى ماركەتينگتىك ىلگەرىلەتۋ.

فورۋم ەكى ەل اراسىنداعى تۋريزم مەن مادەني بايلانىستاردى دامىتۋعا ارنالعان ماڭىزدى ديالوگ الاڭىنا اينالدى.

Abai.kz