ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ الەۋمەتتىك قولداۋدى ءبولۋ كەزىندە كىرىستەرمەن قاتار شىعىستار دا ەسكەرىلەتىنىن ايتتى.

قۇرىلتاي وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ دەپۋتات ناتاليا رامازانوۆانىڭ تسيفرلىق وتباسى كارتاسىن قالىپتاستىرۋ تەتىگى تۋرالى قويعان ساۋالىنا جاۋاپ بەرە وتىرىپ، وتباسى ساناتىن (ا، ۆ، س، D جانە ە) ايقىنداۋ كەزىندە بۇكىل وتباسى مەن ءۇي شارۋاشىلىعىنا قاتىستى دەرەكتەر جيىنتىعى نەگىزگە الىناتىنىن اتاپ ءوتتى.

«مۇندا جالاقى نەمەسە مۇلىك سياقتى تەك ءبىر فاكتور ەسكەرىلمەيدى. وتباسىنىڭ تسيفرلىق كارتاسى مەملەكەتتىك دەرەكقورلاردان ءۇي شارۋاشىلىعى تۋرالى سەگىز نەگىزگى باعىت بويىنشا 50-دەن استام كورسەتكىشكە قاتىستى مالىمەت جينايدى. ولاردىڭ قاتارىندا جۇمىسپەن قامتۋ، كىرىستەر، جىلجىمالى جانە جىلجىمايتىن مۇلىك، نەسيەلىك جۇكتەمە، ءبىلىم بەرۋ جانە باسقا دا مالىمەتتەر بار. ءۇي شارۋاشىلىعىنىڭ ماتەريالدىق جانە الەۋمەتتىك جاعدايى تۋرالى جالپى مالىمەتتەر نەگىزىندە ونىڭ ساناتى ايقىندالادى»، - دەپ ءتۇسىندىردى اسقاربەك ەرتاەۆ.

2027 جىلعى 1 قاڭتاردان باستاپ قازاقستاندا الەۋمەتتىك قولداۋدىڭ جەكەلەگەن شارالارىن تاعايىنداۋ ءتارتىبىن وزگەرتۋ جوسپارلانىپ وتىر. تولەمدەرگە قۇقىقتى ايقىنداۋ كەزىندە وتباسىنىڭ ءال-اۋقات دەڭگەيى ەسكەرىلەدى. ءال-اۋقاتى جوعارى جانە اۋقاتتى وتباسىلارعا جاتاتىن «ا» جانە «ۆ» ساناتىنداعى وتباسىلار مۇنداي قولداۋ شارالارىنا ۇمىتكەر بولا المايدى.

سونىمەن قاتار مينيستر كىرىستەرمەن قاتار شىعىستار دا ەسكەرىلەتىنىن اتاپ ءوتتى. 2027 جىلعى 1 قاڭتاردان باستاپ ەكىنشى دەڭگەيلى بانكتەر الۋشىنىڭ جانە ونىڭ وتباسى مۇشەلەرىنىڭ كەلىسىمىمەن بانك شوتتارى مەن دەپوزيتتەرى تۋرالى مالىمەتتەردى ۇسىنادى. جۇيە ءۇي شارۋاشىلىعىنىڭ قارجىلىق جاعدايىنداعى وزگەرىستەرگە جەدەل دەن قويادى.

«30 دەرەكقورمەن ىقپالداستىرىلعان مالىمەتتەر كۇن سايىن جاڭارتىلىپ وتىرادى، ال وتباسىنىڭ ساناتى اي سايىن ايقىندالادى. ماسەلەن، قازان ايىندا “ۆ” ساناتىندا بولعان وتباسى بەلگىلى ءبىر تاۋەكەلدەرگە بايلانىستى جەلتوقسان ايىندا “س” ساناتىنا اۋىسسا، وعان مەملەكەتتىك قولداۋ شارالارى بىردەن، پرواكتيۆتى تۇردە تاعايىندالادى»، - دەپ تۇيىندەدى ءسوزىن اسقاربەك ەرتاەۆ.

Abai.kz