كەشە قر پارلامەنتى ءماجىلىسىنىڭ جالپى وتىرىسىندا «قازاقستان رەسپۋبليكاسى كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» قازاقستان رەسپۋبليكاسى زاڭىنىڭ جوباسى» قابىلداندى.

ءبىز قر پارلامەنتى ءماجىلىسىنىڭ دەپۋتاتى، «اق جول» فراكتسياسى مۇشەسى قازىبەك يسانىڭ زاڭ جوباسىنداعى «ەلباسى» دەگەن اتاۋدىڭ زاڭسىزدىعى تۋرالى ءسوزىن جاريالاپ وتىرمىز.

قازىبەك يسا، ءماجىلىس دەپۋتاتى:

– مەنىڭ سۇراعىم زاڭدى ازىرلەگەن ىشكى ىستەر مينيسترلىگىنە!

«قازاقستان رەسپۋبليكاسى كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» قازاقستان رەسپۋبليكاسى زاڭى جوباسىنىڭ» 4 بابى راقىمشىلىق جاساۋ قولدانىلمايتىن ادامداردى ايقىنداعان. وسى باپتىڭ 13 تارماعىنا: «قر تۇڭعىش پرەزيدەنتىنىڭ - ەلباسىنىڭ ومىرىنە قول سۇعۋشىلىق» تا (166-1 باپ) كىرگىزىلگەن.

بۇل جەر بىزگە تۇسىنىكسىز بولىپ تۇر.

«قر تۇڭعىش پرەزيدەنتى – ەلباسى» دەگەن اتاۋ تۇڭعىش رەت بۇدان شيرەك عاسىر بۇرىن، 2000 جىلى 20 شىلدەدە پارلامەنتتە 18 مينۋتتا قابىلدانعان…

ال 2023 جىلى 11 قاڭتاردا پارلامەنتتىڭ VII شاقىرىلىمىندا ءبىز «قر تۇڭعىش پرەزيدەنتى - ەلباسى تۋرالى زاڭنىڭ» كۇشىن جويعانبىز. ول 2023 جىلى 13 اقپاندا كۇشىنە كىرگەن.

ەندەشە نەگە بۇل جاڭا زاڭ جوباسىندا «قر تۇڭعىش پرەزيدەنتى – ەلباسى» دەگەن اتاۋ زاڭسىز قولدانىلىپ تۇر؟! بۇل قانداي زاڭدىلىققا جاتادى؟! بۇل جەردە تەك «ەكس پرەزيدەنت» دەپ قانا اتالۋى كەرەك قوي!

قر قىلمىستىق كودەكسىنىڭ اتالمىش 166-1 بابى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسى تۇڭعىش پرەزيدەنتىنىڭ - ەلباسىنىڭ قىزمەتىن قامتاماسىز ەتۋ سالاسىندا زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ 2010 جىلعى 14 ماۋسىمداعى № 290-IV زاڭى» بويىنشا كىرگىزىلگەن.

ال 2023 جىلى 11 قاڭتاردا «قر تۇڭعىش پرەزيدەنتى – ەلباسى» تۋرالى زاڭنىڭ كۇشى جويىلعانىن جاڭا ايتتىق.

ەندەشە «تۇڭعىش پرەزيدەنت – ەلباسى» دەگەن اتاۋدىڭ دا زاڭ بويىنشا كۇشى جويىلۋى كەرەك قوي؟!.

كەيىن قابىلدانعان زاڭ بۇرىنعى زاڭنىڭ كۇشىن جويادى زاڭ بويىنشا. سوندىقتان، بارلىق زاڭداردان، بارلىق جەردەن «تۇڭعىش پرەزيدەنت – ەلباسى» دەگەن اتاۋ جويىلۋى ءتيىس!

سىزدەر بۇعان نە دەيسىزدەر؟

بۇل سۇراققا ىشكى ىستەر ۆيتسە-ءمينيسترى ەمەس، زاڭ جوباسى تۋرالى بايانداما جاساعان ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى، دەپۋتات ابزال قۇسپاننىڭ جاۋابىن ۆيدەودان كورەسىزدەر:

Abai.kz