پرەزيدەنت تۇركى مەملەكەتتەرى پارلامەنتتىك اسسامبلەياسىنا مۇشە ەلدەر پارلامەنتتەرىنىڭ سپيكەرلەرىمەن كەزدەستى.

مەملەكەت باسشىسى مارتەبەلى مەيماندارعا ءىلتيپات ءبىلدىرىپ، بۇگىنگى جيىننىڭ ءمان-ماڭىزى ەرەكشە ەكەنىن ايتتى.

– پارلامەنتتىك اسسامبلەيا – وتە ماڭىزدى ساياسي قۇرىلىم. قازاقستان بۇل ۇيىمدى بارىنشا قولدايدى. مەن ءوزىم ون جىل بويى سەنات توراعاسى رەتىندە جۇمىس ىستەدىم، پارلامەنتارالىق بايلانىستارعا بەلسەندى تۇردە قاتىستىم. جالپى، پارلامەنتتىڭ جۇمىسىن جاقسى بىلەمىن، تۇسىنەمىن. قازىر پارلامەنتتىك اسسامبلەيا اياسىنداعى بىرلەسكەن كۇش-جىگەرىمىزدىڭ ارقاسىندا تۇركى ىنتىماقتاستىعى جىلدان جىلعا نىعايىپ كەلە جاتىر. بۇل – وتە جاقسى ۇدەرىس، سەبەبى تۇتاس تۇركى جۇرتىنىڭ حالىقارالىق بەدەلى مەن ىقپالى دا ارتا تۇسۋدە. ەڭ باستىسى، ەلدەرىمىزدىڭ اراسىندا ءوزارا جاقىنداسۋعا دەگەن تالپىنىس بار. قازاقستان الداعى ۋاقىتتا دا ءتۇبى ءبىر تۇركى حالىقتارىنىڭ جان-جاقتى ىنتىماقتاستىعىن دامىتا بەرۋگە مۇددەلى، – دەدى قاسىم-جومارت توقاەۆ

پرەزيدەنت ەلىمىز پارلامەنتتىك اسسامبلەيا ۇسىنعان تىڭ باستامالاردى قولدايتىنىن ايتىپ، تۇركى ىقپالداستىعىنا ۇلەس قوسا بەرۋگە دايىن ەكەنىن مالىمدەدى.

– قازاقستان – تۇركى مەملەكەتتەرى ۇيىمىنىڭ نەگىزىن قالاۋشىلاردىڭ ءبىرى. بۇل قۇرىلىم ەلدەرىمىزدىڭ ەكونوميكالىق جانە مادەني-گۋمانيتارلىق دامۋىنا ەرەكشە ىقپال ەتەدى دەپ سەنەمىز. ونىڭ الەۋەتىن حالىقتارىمىزدىڭ ورتاق ماقساتىنا پايدالانعان ءجون دەپ سانايمىز. بىلتىر قازاقستان تۇركى مەملەكەتتەرى ۇيىمىنا توراعالىق ەتتى. «TURKTIME» ۇرانىمەن ءبىز بىرقاتار ماڭىزدى جوبانى جۇزەگە اسىردىق. تۇركى ىقپالداستىعىن تەرەڭدەتۋگە سەرپىن بەرەتىن 100-گە جۋىق ءىس-شارا ۇيىمداستىردىق. استانادا V دۇنيەجۇزىلىك كوشپەندىلەر ويىندارى ءوتتى. بايراقتى باسەكە ۇلى دالا وركەنيەتىن جەر-جاھانعا تانىتتى. تۇركى ءالىپبيىنىڭ ورتاق نۇسقاسى بەكىتىلدى. مۇنى تاريحي وقيعا دەۋگە بولادى، – دەدى مەملەكەت باسشىسى.

قاسىم-جومارت توقاەۆ تۇركى مەملەكەتتەرى ۇيىمىنىڭ جانىنداعى تۇراقتى وكىلدەردى تاعايىنداۋ تۋرالى شەشىم قابىلدانعانىنا، ۇيىم ەلدەرى اراسىندا ساۋدا-ەكونوميكا، ەنەرگەتيكا، قارجى جانە ينۆەستيتسيا سالاسىنداعى بايلانىس ارتا تۇسكەنىنە نازار اۋداردى.

– تۇركى ينۆەستيتسيالىق قورى ءوز قىزمەتىن ءتيىمدى جۇرگىزىپ وتىر. وسىنىڭ ءبارى – تۇركى ىقپالداستىعىن بەكەمدەي تۇسەتىن ماڭىزدى قادامدار. ءبىز تۇركى مەملەكەتتەرى ۇيىمى سامميتتەرىنىڭ قورىتىندىلارىن جوعارى باعالايمىز. ۋاعدالاستىقتاردى ساپالى جۇزەگە اسىرۋعا ەرەكشە ءمان بەرەمىز. جاقىندا ماجارستاندا وتكەن مەملەكەت باسشىلارىنىڭ بەيرەسمي كەزدەسۋى ناتيجەلى بولدى. قازاقستان وسى يگى ءۇردىستى جالعاستىرا بەرۋگە قاشاندا ءازىر. بۇل رەتتە، مەن كەلەسى باسقوسۋدى كيەلى تۇركىستاندا وتكىزۋدى ۇسىندىم، – دەدى مەملەكەت باسشىسى.

Abai.kz