"ۇلتارالىق ارازدىق" بابىمەن سوتتالعان جۇكتى ايەلدىڭ تاعدىرى جۇرتتى الاڭداتىپ وتىر...

وقيعا بىلاي وربىگەن: وسى جىلدىڭ مامىرىندا سولتۇستىك قازاقستان وبلىسى عابيت مۇسىرەپوۆ اتىنداعى اۋداندىق سوت نوۆويشيمسكوە اۋىلىنىڭ 35 جاستاعى تۇرعىنى جانسۇلۋ دارحامباەۆانى ەكى جىلعا باس بوستاندىعىنان ايىردى. سوت شەشىمى قىلمىستىق كودەكستىڭ 174-ءشى بابى "ۇلتارالىق ارازدىقتى قوزدىرۋ" بويىنشا شىققان دەپ جازادى Ertenmedia.

بۇعان TikTok-تا جاريالانعان ۆيدەو تۇرتكى بولعان. الگى روليكتە دارحامباەۆا 2025 جىلى كرەملدىڭ قازاقستاننان جالعا العان كەيبىر اۋماعىنىڭ مەرزىمى اياقتالاتىنىن ايتىپ، رەسەي پرەزيدەنتىنەن ولاردى "قايتارۋدى" تالاپ ەتكەن.

ۆيدەودا: "ەگەر جەردى قايتارماساڭدار، و دۇنيەدەن حابار كۇتىڭدەر" دەگەن پىكىر ايتىلعان. ايىپتاۋ قۇجاتىندا ۆيدەو اۆتورىنىڭ ايتقان ءۋاجى "ورىس ۇلتىن قورلايتىن سيپاتتا" بولعانى كورسەتىلگەن. لينگۆيستيكالىق ساراپتاما دا ۆيدەوداعى ءسوزدىڭ ۇلتتىق ار-نامىسقا ءتيىپ، ارازدىق قوزدىرۋدى ماقسات ەتكەنىن راستاعان. دارحامباەۆا كىناسىن مويىنداپ، وكىنىش بىلدىرگەنىمەن، سوت جۇكتى ايەلدىڭ جازاسىن جەڭىلدەتپەگەن. سوت ۇكىمى شىققان كەزدە كەلىنشەكتىڭ تولعاعى جەتىپ، ءانى-ءمىنى بوسانۋعا دايىن وتىرعان. سوعان قاراماي، ونى ولاردى سوت زالىندا قاماۋعا الىپ، پەتروپاۆلداعى تەرگەۋ يزولياتورىنا جىبەرگەن. دارحامباەۆانىڭ ءىنىسى الگى شەشىمدى "ادامگەرشىلىك قاعيداسىنا قايشى" دەپ مالىمدەدى. ايتۋىنشا، ۆيدەونى كورگەندەردىڭ كوبى اپايىن قولداپ پىكىر قالدىرعان. دارحامباەۆانىڭ ادۋوكاتى قابدولاحمەت ەسكەندىروۆ سوت ۇكىمىنە كەرى شاعىم تۇسىرگەنىن حابارلادى.

قازاقتىلدى قاۋىم وسى وقيعامەن تۇسپا-تۇس كەلگەن قوستانايداعى جاعدايدى قىزۋ تالقىلاۋدا.

وندا جەرگىلىكتى تۇرعىن الەمجەلىدە قازاقستاننىڭ تەرىسكەيىن "ورىستىڭ جەرى" دەپ اشىق مالىمدەپ، رەسەيدىڭ سولتۇستىك ءوڭىردى كوپ ۇزاماي قايتارىپ الارىن ايتقان. ەڭ قىزىعى، ساراپشىلار ونىڭ ارەكەتىنەن قىلمىس قۇرامىن تاپپاي، ءىس توقتاتىلعان.

دەپۋتاتتاردىڭ دەرەگىنشە، كرەمل قازاقستاننان 95 مىڭ شارشى شاقىرىمنان استام جەردى جالعا الىپ وتىر. ولاردىڭ ىشىندە اسكەري پوليگوندار، باقىلاۋ ستانتسيالارى مەن اۋەجايلار بار. 2023 جىلدىڭ مالىمەتى بويىنشا، جەردى جالعا الۋ قۇنى گەكتارىنا (جىلىنا) 1050 تەڭگە. باعا 2005 جىلدان بەرى وزگەرمەگەن. دارحامباەۆانىڭ وقيعاسى قازاقتىلدى اۋديتوريانىڭ اشۋ-ىزاسىن تۋعىزىپ جاتىر. ادامگەرشىلىك ماسەلەسىنەن بولەك، ەكى ءتۇرلى ستاندارتتىڭ قولدانىلۋى قوعام نارازىلىعىن ۇدەتۋدە. "ۇلتارالىق ارازدىق" ۇعىمىنىڭ قولدانىلۋى پىكىر ايتقان ادامىنا قاراي وزگەرىپ وتىر. قوستانايداعى پروۆوكاتوردىڭ جازادان قۇتىلۋى كەتۋى سونىڭ دالەلى", - دەيدى جەلىدەگى جۇرت.

Abai.kz