قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ باستاعان قازاق دەلەگاتسياسى رەسمي ساپارمەن ۆاشينگتون قالاسىنا باردى. 

ساپار اياسىندا قر سىرتقى ىستەر ءمينيسترى مەن اقش مەملەكەتتىك حاتشىسى ماركو رۋبيونىڭ مازمۇندى كەزدەسۋى ءوتتى. تاراپتار ساياسي جانە ەكونوميكالىق ءوزارا ءىس-قيمىل، ەنەرگەتيكا، ساۋدا، لوگيستيكا سياقتى ەكىجاقتى كۇن ءتارتىبىنىڭ وزەكتى ماسەلەلەرىن جان-جاقتى تالقىلاپ، وڭىرلىك جانە جاھاندىق قاۋىپسىزدىككە قاتىستى پىكىر الماستى.

سىرتقى ساياسي ۆەدومستۆولاردىڭ باسشىلارى قازاقستان مەن اقش اراسىنداعى ءوزارا قۇرمەت پەن پراگماتيكالىق ديالوگ قاعيداتتارىنا نەگىزدەلگەن كەڭەيتىلگەن ستراتەگيالىق سەرىكتەستىكتى ودان ءارى دامىتۋعا ۇمتىلىسىن راستادى. اڭگىمە بارىسىندا ساۋدا جانە ينۆەستيتسيانى كەڭەيتۋ، امەريكالىق وزىق تەحنولوگيالاردى تارتۋ جانە ىسكەرلىك بايلانىستاردى نىعايتۋ ماسەلەلەرىنە ەرەكشە نازار اۋدارىلدى.

«قازاقستان اقش-پەن ءوزارا ءتيىمدى سەرىكتەستىكتى ىلگەرىلەتۋ ءۇشىن ناقتى ناتيجەلەرگە قول جەتكىزۋگە نيەتتى»، – دەدى م.نۇرتىلەۋ. سونىمەن قاتار مينيستر قازاقستاننىڭ ەنەرگيا رەسۋرستارى مەن اسا ماڭىزدى مينەرالداردىڭ جەتكىزۋ تىزبەگىنىڭ تۇراقتىلىعىن قامتاماسىز ەتۋدەگى ستراتەگيالىق ءرولىن اتاپ ءوتتى.

ءوز كەزەگىندە مەملەكەتتىك حاتشى بۇل كەزدەسۋ ەكىجاقتى قارىم-قاتىناستاردى ىلگەرىلەتۋ مەن ءوزارا بايلانىستاردى نىعايتۋعا جاڭا سەرپىن بەرەتىنىنە سەنىم ءبىلدىردى. «اقش قازاقستانمەن ىنتىماقتاستىقتى نىعايتۋ ارقىلى ءوزارا قىزىعۋشىلىق تۋدىراتىن ەكونوميكالىق مۇمكىندىكتەردى كەڭەيتۋگە ءۇمىت ارتادى»، – دەدى م.رۋبيو.

تاراپتار ورتالىق ازيا ءوڭىرى مەن اقش اراسىنداعى ديالوگتى قولداۋدىڭ ءتيىمدى قۇرالى بولىپ تابىلاتىن «س5+1» پلاتفورماسى اياسىنداعى ءوزارا ءىس-قيمىلعا ەرەكشە ءمان بەردى.

سونداي-اق حالىقارالىق جانە وڭىرلىك قاۋىپسىزدىك سالاسىنداعى كۇش-جىگەردى ۇيلەستىرۋدىڭ ماڭىزدىلىعى اتالىپ ءوتىپ، زاڭسىز كوشى-قونمەن كۇرەس سالاسىنداعى ىنتىماقتاستىق جوعارى باعالاندى. وسى باعىتتاعى جۇمىستى جالعاستىرۋ تۋرالى كەلىسىمگە قول جەتكىزىلدى.

قر سىرتقى ىستەر ءمينيسترى قازاقستاننىڭ ورتا دەرجاۆا رەتىندە حالىقارالىق تۇراقتىلىقتى قامتاماسىز ەتۋگە كونسترۋكتيۆتى ۇلەس قوسۋعا دايىن ەكەنىن راستادى.

كەزدەسۋ سوڭىندا تاراپتار ەكىجاقتى ءوزارا ءىس-قيمىلدى قولدانىستاعى الاڭدار شەڭبەرىندە جانە جاڭا تەتىكتەردى ىسكە قوسۋ ارقىلى نىعايتۋعا ۋاعدالاستى.

Abai.kz