قازاقستاندا سالىناتىن العاشقى اتوم ەلەكتر ستانتسياسىن (اەس) رەسەيلىك «روساتوم» مەملەكەتتىك كورپوراتسياسى باسقاراتىن كونسورتسيۋم ىسكە اسىراتىن بولدى. بۇل جونىندە رەسمي اقپاراتتى قازاقستان رەسپۋبليكاسىنىڭ اتوم ەنەرگەتيكاسى اگەنتتىگى تاراتتى.

اگەنتتىكتىڭ مالىمەتىنشە: «اەس سالۋ بويىنشا «روساتوم» كومپانياسىنىڭ ۇسىنىسى قاۋىپسىزدىك، تەحنولوگيالىق شەشىمدەر جانە قارجىلاندىرۋ شارتتارى تۇرعىسىنان ەڭ ءتيىمدى دەپ تانىلدى»، – دەلىنگەن حابارلامادا.

سونداي-اق، اگەنتتىك تاراتقان اقپاراتقا سايكەس، قازىرگى تاڭدا «روساتوم» كومپانياسىنىڭ باستاماسىمەن رەسەي تاراپىنان مەملەكەتتىك ەكسپورتتىق قارجىلاندىرۋ تارتۋ ماسەلەسى قاراستىرىلىپ جاتىر.

قر اتوم ەنەرگەتيكاسى اگەنتتىگىنىڭ دەرەكتەرىنە سۇيەنسەك، اەس قۇرىلىسىنا قاتىستى شەشىم قابىلدانباس بۇرىن جەتەكشى رەاكتورلىق تەحنولوگيالاردى وندىرەتىن ءتورت ءىرى حالىقارالىق كومپانيامەن كەڭ اۋقىمدى كەلىسسوزدەر جۇرگىزىلگەن. ولاردىڭ قاتارىنا رەسەيدىڭ «روساتوم»، قىتايدىڭ China National Nuclear Corporation, فرانتسيانىڭ Électricité de France جانە وڭتۇستىك كورەيانىڭ Korea Hydro & Nuclear Power كومپانيالارى كىرەدى. كەلىسسوزدەر بارىسىندا قازاقستاندىق دەلەگاتسيالار وسى كومپانيالاردىڭ وندىرىستىك نىساندارىن ارالاپ، ولاردىڭ تەحنولوگيالارىمەن تىكەلەي تانىسقان.

بارلىق قاتىسۋشى كومپانيالار قازاقستانداعى اەس قۇرىلىسىنا قاتىستى كەشەندى تەحنيكالىق جانە كوممەرتسيالىق ۇسىنىستارىن ۇسىنعان. بۇل ۇسىنىستاردا جوبا قۇنى، جۇزەگە اسىرۋ مەرزىمى، قارجىلاندىرۋ سحەمالارى، قۇرىلىس پەن ءوندىرىستى جەرگىلىكتەندىرۋ تاسىلدەرى، كادر دايارلاۋ باعدارلامالارى، عىلىمي بازا قالىپتاستىرۋ، الەۋمەتتىك مىندەتتەمەلەر مەن يادرولىق وتىن تسيكلىنە قاتىسۋ مۇمكىندىكتەرى قامتىلعان.

ۇسىنىستار ارنايى ازىرلەنگەن ادىستەمە بويىنشا باعالاندى. بۇل ادىستەمە قر اتوم ەنەرگەتيكاسى اگەنتتىگى، «قازاقستاندىق اتوم ەلەكتر ستانتسيالارى» جشس جانە فرانتسۋزدىق Assystem ينجينيرينگتىك كومپانياسىنىڭ قاتىسۋىمەن جاسالعان. باعالاۋ كريتەريلەرىنە اەس قاۋىپسىزدىگى، تەحنولوگيالىق جانە قارجىلىق كورسەتكىشتەر، حالىقارالىق تاجىريبە، كادرلاردى وقىتۋ دەڭگەيى مەن ءوندىرىستى جەرگىلىكتەندىرۋ مۇمكىندىكتەرى سياقتى فاكتورلار ەنگەن.

كەشەندى تالداۋ ناتيجەلەرى اتوم سالاسىن دامىتۋ جونىندەگى ۆەدومستۆوارالىق كوميسسياعا ۇسىنىلدى. كوميسسيا «روساتوم» كومپانياسىنىڭ ۇسىنىسىن ەڭ ءتيىمدى جانە ەكونوميكالىق تۇرعىدان ۇتىمدى دەپ تانىدى. ەكىنشى ورىندى قىتايدىڭ CNNC كومپانياسى، ال ءۇشىنشى ورىندى فرانتسيانىڭ EDF جانە كورەيانىڭ KHNP كومپانيالارى ءبولىستى.

اگەنتتىكتىڭ حابارلاۋىنشا، قازاقستان اەس قۇرىلىسى بويىنشا حالىقارالىق كونسورتسيۋم قۇرۋ باعىتىندا شەتەلدىك سەرىكتەستەرمەن ىنتىماقتاستىقتى جالعاستىرا بەرەدى.

جانار جۇمابەكوۆا

Abai.kz