2024 جىلعى 13 ماۋسىمدا پاريج قالاسىنداعى يۋنەسكو شتاب-پاتەرىندە كورنەكتى قازاق كومپوزيتورى جانە ديريجيورى نۇرعيسا تىلەنديەۆتىڭ تۋعانىنا 100 جىل تولۋىنا ارنالعان «شابىتتىڭ تامىرى: نۇرعيسا تىلەنديەۆتىڭ مۇراسى» اتتى حالىق مۋزىكالىق اسپاپتارىنىڭ حالىقارالىق كورمەسىنىڭ سالتاناتتى اشىلۋى ءوتتى. بۇل مەرەيتويلىق داتا يۋنەسكو-نىڭ ەستە قالارلىق كۇندەر تىزىمىنە ەنگىزىلگەن.

ءىس-شارانى قازاقستان رەسپۋبليكاسىنىڭ يۋنەسكو جانىنداعى تۇراقتى وكىلدىگى، الماتى قالاسىنىڭ اكىمدىگى جانە الماتى قالاسى مۋزەيلەر بىرلەستىگى تۇركى مادەنيەتى جانە مۇراسى قورىنىڭ بەلسەندى قولداۋىمەن ۇيىمداستىردى.

اشىلۋ سالتاناتىندا قازاقستان رەسپۋبليكاسىنىڭ يۋنەسكو جانىنداعى تۇراقتى وكىلى، ەلشى اسقار ابدراحمانوۆ، يۋنەسكو باس ديرەكتورىنىڭ مادەنيەت جونىندەگى ورىنباسارى ەرنەستو وتتونە، تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا، قر مەملەكەتتىك اكادەميالىق فولكلورلىق-ەتنوگرافيالىق «وتىرار سازى» وركەسترىنىڭ باس ديريجيورى، كومپوزيتوردىڭ قىزى جانە قۇرمەتتى قوناق – دينارا تىلەنديەۆا قۇتتىقتاۋ ءسوز سويلەدى.

اقتوتى رايىمقۇلوۆا ءوز سوزىندە نۇرعيسا تىلەنديەۆتىڭ تەك قازاق ەمەس، بۇكىل تۇركى فولكلورلىق مۋزىكا ءداستۇرىن حالىقارالىق دەڭگەيدە دامىتۋعا قوسقان ولشەۋسىز ۇلەسىن ەرەكشە اتاپ ءوتتى. سونداي-اق، كورمەنىڭ جوعارى دەڭگەيدە ۇيىمداستىرىلعانىن جانە ونىڭ تۇركى الەمىنىڭ مۋزىكالىق مۇراسىن ساقتاۋ مەن ناسيحاتتاۋداعى ماڭىزدى ءرولىن اتاپ ءوتتى.

كورمەگە ىقىلاس اتىنداعى قازاق حالىق مۋزىكالىق اسپاپتار مۋزەيى كوللەكتسياسىنان تۇركى حالىقتارىنىڭ مۋزىكالىق اسپاپتارىنان قۇرالعان ارنايى ەكسپوزيتسيا كوپشىلىك نازارىنا ۇسىنىلدى.

ءىس-شارا كونتسەرتتىك باعدارلامامەن جالعاستى. ءوز ونەرلەرىن مەموريالدىق نۇرعيسا تىلەنديەۆ مۋزەيىنىڭ قىزمەتكەرى ەركىن قۇدايبەرگەنوۆ (دومبىرا), فولكلورلىق-ەتنوگرافيالىق «تۋران» ءانسامبلىنىڭ ءسوليسى، تۇركى مادەنيەتى جانە مۇراسى قورىنىڭ ساراپشىسى-زەرتتەۋشىسى سەرىك نۇرمولداەۆ (سىبىزعى، شانقوبىز، سازسىرناي) ۇسىندى.

Abai.kz