يران مەن يزرايل اراسىنداعى اسكەري شيەلەنىس تۇركيانى الاڭداتىپ وتىر.

رەسمي انكارا قارۋلى قاقتىعىستىڭ كەڭەيۋ قاتەرىنە بايلانىستى شەكاراداعى قاۋىپسىزدىكتى كۇشەيتتى، دەپ جازادى inbusiness.kz سايتى.

ەل پرەزيدەنتى مەن قورعانىس ءمينيسترى جاعدايعا قاتىستى مالىمدەمە جاساپ، حالىقارالىق قاۋىمداستىقتى شۇعىل ارەكەت ەتۋگە شاقىردى. ءيزرايلدىڭ يران اۋماعىنداعى نىساندارعا جاساعان اۋە سوققىلارى تۇركيانىڭ رەسمي نارازىلىعىن تۋدىردى. انكارا بۇل شابۋىلداردى حالىقارالىق قۇقىققا قايشى دەپ مالىمدەپ، يراننىڭ ءوزىن ءوزى قورعاۋ قۇقىعىن قولدايتىنىن جەتكىزدى.

تۇركيا پرەزيدەنتى رەدجەپ تايپ ەردوعان ءيزرايلدىڭ ارەكەتىن اشىق ايىپتاپ، نەتانياحۋدىڭ ساياساتىن "باسقىنشىلىق" دەپ اتادى.

– نەتانياحۋدىڭ قولىنداعى قان تەك يزرايل ۇكىمەتىنىڭ ەمەس، سونىمەن قاتار بۇل قىلمىستارعا كوز جۇما قاراپ وتىرعان ەلدەردىڭ دە موينىندا. تۇركيا بۇل زۇلىمدىقتى توقتاتۋ ءۇشىن بارلىق ديپلوماتيالىق جانە گۋمانيتارلىق جولداردى پايدالانادى، – دەپ مالىمدەدى تۇركيا پرەزيدەنتى رەدجەپ تايپ ەردوعان.

قازىر تۇركيانىڭ يرانمەن شەكاراسىندا 60 مىڭعا جۋىق اسكەري قىزمەتكەر ورنالاسقان. قاجەت بولعان جاعدايدا ارتتىرىلۋى مۇمكىن. دروندار مەن باقىلاۋ جۇيەلەرى كۇشەيتىلگەن رەجيمدە جۇمىس ىستەپ جاتىر.

ساراپشىلاردىڭ پىكىرىنشە، شيەلەنىستەن تۇركياعا ەنەرگەتيكا باعاسىنىڭ ءوسۋى، تۋريزمنەن تۇسەتىن تابىستىڭ تومەندەۋى، ساۋدا مەن قارجى نارىقتارىنداعى قيىندىقتار سەكىلدى ءتۇرلى قاۋىپ-قاتەر بار.

تۇركيا ەگەر يران ورمۋز بۇعازىن جاباتىن بولسا، ءتيىستى شارالار قابىلداماق. دەگەنمەن، انكارا ايماقتاعى شيەلەنىستى ازايتىپ، بەيبىتشىلىككە قول جەتكىزۋ ءۇشىن ديپلوماتيالىق جولدارعا باسىمدىق بەرەتىنىن جاريالادى.

Abai.kz