يزرايلدە 120 ورىندىق كنەسسەتكە ء(بىرپالاتالى پارلامەنت) كەزەكتى سايلاۋدىڭ داۋىس بەرۋ ناتيجەلەرى قورىتىندىلانۋدا.

باستاپقى مالىمەتتەرگە سايكەس، قازىرگى پرەمەر-مينيستر بەنيامين نەتانياحۋ باستاعان وڭشىل كواليتسيا ۇكىمەت قۇرۋعا قاجەتتى باسىمدىقتى جيناي الماي وتىر. ال اراب پارتيالارى ءوز تاريحىنداعى رەكوردىق ناتيجەنى كورسەتىپ، ەلدەگى ساياسي تارازىنىڭ باسىن اۋداراتىن نەگىزگى كۇشكە اينالدى.

Times of Israel حابارلاۋىنشا، بۇل سايلاۋ قورىتىندىسى يزرايل ساياسي جۇيەسىندەگى ۇزاققا سوزىلعان «نەتانياحۋ ەراسىنىڭ» داعدارىسىن جانە ىشكى ساياسي تىعىرىقتىڭ تەرەڭدەي تۇسكەنىن ايقىن بىلدىرەدى.

بيۋللەتەندەردىڭ 85%-ى وڭدەلگەننەن كەيىنگى كۇشتەردىڭ ورنالاسۋى مىناداي:

نەتانياحۋ كواليتسياسى (وڭشىلدار): بيلىكتەگى كونسەرۆاتيۆتى «ليكۋد» پارتياسى مەن ونىڭ وداقتاستارى 120 ورىندىق كنەسسەتتە 53 مانداتقا يە بولىپ وتىر. مەملەكەتتى باسقارۋ جانە ۇكىمەت جاساقتاۋ ءۇشىن كەمىندە 61 ماندات قاجەت ەكەنىن ەسكەرسەك، بۇل نەتانياحۋ ءۇشىن جەڭىلىس.

وپپوزيتسيالىق بلوك (سولشىلدار): گەنەرال گادي ايزەنكوت باستاعان جاڭا «ياشار» پارتياسىنىڭ توڭىرەگىنە توپتاسقان سولشىل وپپوزيتسيا 48 ماندات جينادى.

اراب پارتيالارىنىڭ تاريحي (راام - بىرىككەن ءتىزىم) بلوگى بىرلەسىپ 19 مانداتقا قول جەتكىزدى.

بۇل — يزرايلدەگى اراب ازشىلىعى وكىلدەرىنىڭ پارلامەنتتەگى ەڭ جوعارى تاريحي كورسەتكىشى.

ايا كەتەتىنى - 2021 جىلى راام پارتياسى نافتالي بەننەت پەن ياير ءلاپيدتىڭ كواليتسياسىنا كىرىپ، ساياسي پرەتسەدەنت جاساعان بولاتىن. دەگەنمەن، ول كواليتسيا ىشكى قايشىلىقتارعا شىداي الماي، 2022 جىلى تاراپ كەتتى.

ەندى قىزىعىن قاراڭىز: وپپوزيتسيا كوشباسشىسى گادي ايزەنكوت سايلاۋ الدىندا ءيزرايلدى «ەۆرەي مەملەكەتى» رەتىندە جانە حاماس-تى «تەرروريستىك ۇيىم» دەپ مويىندامايتىن پارتيالارمەن وداق قۇرمايتىنىن مالىمدەگەن. ال اراب پارتيالارى جاڭاعى ايزەنكوت ايتقان كريتەريلەرگە تولىق سايكەس كەلمەيدى.

ەندى قايتپەك كەرەك؟ اراب پارتيالارى دا نەتانياحۋعا قارسى. ەگەر نەتانياحۋ كەتەتىن بولسا، ولار وڭشىل ۇكىمەتكە سىرتتاي قولداۋ ءبىلدىرۋ مۇمكىندىگىن جوققا شىعارمايدى. ال اشىق قولدايىن دەسە، نەتانياحۋدىڭ بيلىكتە بولعانىن قالامايدى.

جالپى نەتانياحۋ ءۇشىن 61 مانداتتى جيناۋ مۇمكىندىگى شەكتەۋلى، ال وپپوزيتسيا اراب پارتيالارىنىڭ قولداۋىنسىز ۇكىمەت قۇرا المايدى. ەگەر تاراپتار كواليتسيالىق كەلىسىمگە كەلە الماسا، يزرايل تاعى دا كەزەكتەن تىس سايلاۋعا ءماجبۇر بولادى. بۇل ەلدەگى ساياسي داعدارىستى ودان ءارى تەرەڭدەتىپ، تاياۋ شىعىستاعى قاۋىپسىزدىك جاعدايىنا دا تىكەلەي اسەر ەتەدى.

Abai.kz