ءسويتىپ اقش يران-يزرايل سوعىسىنا تىكەلەي ارالاستى. اقش يراننىڭ 3 بىردەي يادرولىق نىسانىنا: فوردو، يسفاحان مەن ناتانزداعى كەشەندەرگە سوققى جاسادى. بۇل ۇشەۋى يراننىڭ باستى يادرولىق نىساندارى سانالىپ كەلگەن.

باق-تاعى دەرەكتەردى شولىپ شىقساق: اقش ارقايسىسى 13-14 توننا بولاتىن 12 دانا GBU-57 انتيبۋنكەر بومباسىن فوردوداعى كەشەننىڭ ءدوپ ۇستىنەن تاستاعان. بۇل بومبالاردى الىپ ۇشا الاتىن جالعىز ۇشاق - B-2 ۇشاعى. وسى ۇشاقتىڭ 6-اۋى، ايرقايسى 2 بومبادان تيەپ ۇشىپ، سوققى جاساعان.

ال يسفاحان مەن ناتانزداعى نىساندارعا 30-عا جۋىق «Tomahawk» قاناتتى زىمىرانىن قولدانعان. ناتانز بەن يسفاحاندى وسىعان دەيىن ءيزرايلدىڭ ءوزى دە ءبىراز شابۋىلداعان. ال فوردو تاۋ استىنداعى بۋنكەردە ورنالاسقان كەشەن. ونى سوققىلاۋ ءۇشىن انتيبۋنكەر بومبالار كەرەك. ول بومبالار يزرايلدە جوق، اقش-تا بار. يزرايل كومەك سۇرادى. اقش سوزگە كەلمەدى.

وسىنىڭ الدىندا عانا اق ءۇي: «اقش يرانعا سوققى جاساۋ-جاساماۋ تۋرالى شەشىمدى ەكى اپتا ىشىندە قابىلدايدى»، - دەگەن.

ال جەنەۆادا يران جانە ۇلىبريتانيا، گەرمانيا، فرانتسيا ءسىم باسشىلارىنىڭ كەلىسسوزى ءساتسىز اياقتالعان.

يران: «يزرايل شابۋىلى جالعاسىپ جاتقاندا، ەشقانداي كەلىسسوز وتكىزبەيمىز»، - دەگەن. ۆاشينگتوننىڭ ەدەل-جەدەل شەشىم قابىلداۋىن جىلدامداتقان دا وسى بولسا كەرەك…

سونىمەن جۇرت نە دەيدى؟

اقش پرەزيدەنتى ترامپ:

- يراننىڭ ۋران بايىتۋ كەشەندەرى مەن نىساندارى تۇبەگەيلى جويىلدى. بىرنەشە ۋاقىت بۇرىن اقش-تىڭ ۇشاقتارى فوردو، ناتانز جانە يسفاحانداعى يادرولىق كەشەندەرگە ءدال ءارى جويقىن سوققىلار جاسادى. ءبىزدىڭ ماقساتىمىز الەمدەگى لاڭكەستىكتى قارجىلاندىرۋشى ءنومىر ءبىرىنشى ەلدەن تونەتىن يادرولىق قاۋىپتى جويۋ بولاتىن، - دەيدى.

يزرايل پرەمەرى نەتانياحۋ:

- از ۋاقىت بۇرىن اقش پەن يزرايل ارميالارى اقىلداسا وتىرىپ، پرەزيدەنت ترامپتىڭ باقىلاۋىمەن يراننىڭ فوردو، ناتانز بەن يسفاحانداعى 3 يادرولىق نىسانىنا شابۋىل جاسالدى، - دەپ مالىمدەدى.

يران پارلامەنتى سپيكەرىنىڭ ستراتەگيالىق كەڭەسشىسى مۇحامادي:

- بۇل شابۋىلدان پالەندەي ءبۇلىنىپ كەتكەن دۇنيە جوق. فوردوعا سوققى جاسالادى دەپ بىرنەشە ءتۇن بويى كۇتتىك. سول ءۇشىن دە ول جەردى الدەقاشان ەۆاكۋاتسيالاپ، كوشىرىپ تاستاعانبىز. ەكى دۇنيە انىق: بىرىنشىدەن - ءبىلىمدى بومبالاۋ مۇمكىن ەمەس. ەكىنشىدەن - بۇل جولى قارسىلاس وڭباي ۇتىلادى، - دەدى.

يراننىڭ ءسىم باسشىسى ابباس اراكچي:

- بۇۇ جارعىسىن جانە ونداعى ءوزىن-ءوزى قورعاۋ ءۇشىن جاۋاپ بەرۋ قۇقىن پايدالانىپ، يران اقش سوققىلارىنا جاۋاپ بەرەتىن بولادى، - دەپ مالىمدەدى.

تاقىرىپقا تۇزدىق: يران ورمۋز بۇعازىن جاۋىپ، باحرەيندەگى اقش فلوتىنا سوققى جاساماق. ءدال قازىر ورمۋز بۇعازىنان مۇناي تيەگەن 50-دەن استام تانكەر جىلدام ارادا بۇعازدان كەتۋگە ارەكەت ەتۋدە. ال يران پارلامەنتى ورمۋز بۇعازىن بۇعاتتاۋ تۋرالى شەشىمدى ماقۇلدادى. ەندى تۇپكىلىكتى شەشىمدى يراننىڭ جوعارعى باسشىلىعى – اياتوللا مەن پرەزيدەنت قابىلداۋى ءتيىس.

قازىردىڭ وزىندە يران ورمۋز بۇعازىن بۇعاتتاي باستاعانى ايتىلادى.

ورمۋز بۇعازى – الەمدىك مۇناي نارىعىنىڭ 20 پايىزعا جۋىعى اعىلىپ جاتقان ماڭىزدى نىسان. ونىڭ بۇعاتتالۋىنان سوڭ الەمدىك مۇناي نارىعىندا مۇناي باعاسى كوتەرىلەدى دەپ بولجانادى.

ال اقش اتىنان سويلەگەن مەملەكەتتىك حاتشى ماركو رۋبيو: «ورمۋز بۇعازىن بۇعاتتاۋ – يران ءوزىن سۋيتسيدتىك شەشىم. اقش-تىڭ بۇعان جاۋابى وتە قاتال بولادى جانە بۇل شەشىم جاعدايدى شيەلەنىستىرە تۇسەدى»، - دەپ مالىمدەدى.

Abai.kz