رەسەيدىڭ ءسىم باسشىسى سەرگەي لاۆروۆ ماجارستاننىڭ باق-تارىنا سۇحبات بەرىپ، ۋكراينامەن بەيبىت ءبىتىمنىڭ شارتتارىن تاعى ايتىپتى.

رەسەيدىڭ شارتتارى مىناۋ:

- ۋكراينانى دەميليتاريزاتسيالاۋ جانە دەناتسيفيكاتسيالاۋ;

- جەر ماسەلەسىندە رەسەيگە قويىلىپ وتىرعان تالاپتاردى كەرى قايتارۋ;

- سانكتسيالاردى الىپ تاستاۋ;

- بۇعاتتالعان رەسەي اكتيۆتەرىن رەسەيگە قايتارىپ بەرۋ;

- كيەۆ بيلىگى «وڭتۇستىك-شىعىس ۋكراينا ازاماتتارىنىڭ اتىنان سويلەي المايدى. سوندىقتان ولار اۋماقتىق تۇتاستىق ءپرينتسيپىن قولدانامىن دەپ ايتا المايدى.

لاۆروۆتىڭ سوزىنشە، بۇل شارتتار بەيبىت ءبىتىم ماتىنىندە جازىلۋى ءتيىس. بۇدان باسقاعا رەسەي كونبەيدى.

شىلدەنىڭ العاشقى كۇندەرى جالپاق جۇرتقا جار سالىپ: «مەن پۋتينمەن سويلەسەمىن»، - دەگەن اقش پرەزيدەنتى ترامپتىڭ دا مەسەلى قايتقان ەدى.

«مەن پرەزيدەنت پۋتينمەن بولعان اڭگىمەدەن قاتتى كوڭىلىم قالدى. ويتكەنى، شىنىمدى ايتسام، ءپۋتيننىڭ توقتاعىسى كەلەتىن ءتۇرى جوق. بۇل وتە جامان. ول بۇل سوعىستى توقتاتقىسى كەلمەيتىن سەكىلدى»، - دەگەن ەدى ترامپ.

ال ناتو-نىڭ ساراپتاماسى بويىنشا، رەسەي كەمى 2027 جىلعا دەيىن شابۋىل جاساۋ پوتەنتسيالىن ساقتاۋعا قابىلەتتى. اليانستىڭ اقپاراتىنشا، رەسەيدىڭ ەكونوميكاسى سوعىسقا باعىتتالۋدا، كرەمل قارجىنى اسكەري سالاعا سالۋدا جانە ىشكى الەۋمەتتىك ماسەلەنى پروپاگاندا ەسەبىنەن بۇركەمەلەۋدە.

سوعىستى زەرتتەۋ ينستيتۋتىنىڭ (ISW) ساراپشىلارىنىڭ پىكىرىنشە، رەسەي ءالى 12-16 اي بويى ۇزدىكسىز سوعىس جۇرگىزە الاتىن قابىلەتكە يە. رەسەيدىڭ بيۋدجەتتىك جانە اسكەري تەحنيكالىق مۇمكىندىگى وسى ارالىققا دەيىن جەتەدى.

24 ماۋسىم كۇنى رەسەي پرەزيدەنتى ۆلاديمير پۋتين فەدەرالدى بيۋدجەتكە تولىقتىرۋلار ەنگىزدى. جاڭا تولىقتىرۋدا بيۋدجەتتەگى دەفيتسيتتىڭ ارتقانى بايقالادى. مىسالى مۇناي جانە گازدان تۇسەتىن پايدانىڭ ۇلەسى 25 پايىزعا جۋىق ازايعان. جوسپار بويىنشا 10,8 ترلن رۋبل ءتۇسۋى ءتيىس ەدى، الايدا 8,3 ترلن رۋبل عانا ءتۇسۋى مۇمكىن. بۇل سوعىستى قارجىلاندىرۋعا دا اسەر ەتەدى. ال رەسەيدىڭ ۇلتتىق ءال-اۋقات قورىنىڭ قارجىسى 2022 جىلدان بەرى 2 ەسەگە ازايعان. ساراپشىلار بيۋدجەت تاپشىلىعى ارتا بەرسە، قورداعى قارجى 2027 جىلعا دەيىن تۇگەسىلەتىنىن ايتۋدا.

Abai.kz