بۇگىن باتىس قازاقستان وبلىسىندا ۆەتەريناريالىق قىزمەت ساپاسىن ارتتىرۋعا باعىتتالعان ماڭىزدى شارا ءوتتى. وبلىس اكىمى ناريمان تورەعاليەۆتىڭ قاتىسۋىمەن اۋىلدىق وكرۋگتەردەگى ۆەتەرينار ماماندارعا 106 بىرلىك قىزمەتتىك اۆتوكولىكتىڭ كىلتىن تابىس ەتۋ ءراسىمى وزدىرىلدى. بۇل كولىكتەر زاماناۋي ۆەتەريناريالىق قۇرال-جابدىقتارمەن تولىق جابدىقتالعان جانە ەلدى مەكەندەردە ۆەتەريناريالىق قىزمەتتىڭ جىلدام ءارى ءتيىمدى بولۋىن قامتاماسىز ەتپەك.

اتالعان ءىس-شارا مەملەكەت باسشىسىنىڭ ۆەتەريناريا سالاسىن دامىتۋ جونىندەگى تاپسىرمالارىن ورىنداۋعا باعىتتالعان جۇيەلى جۇمىستىڭ ءبىر بولىگى بولىپ تابىلادى. ۆەتەريناريالىق ۇيىمدارعا جاڭا اۆتوكولىكتەردى تابىستاۋ – اۋىل شارۋاشىلىعىنىڭ قاۋىپسىزدىگىن قامتاماسىز ەتۋگە، مال اۋرۋلارىنىڭ الدىن الۋعا جانە ۆەتەريناريالىق باقىلاۋدى كۇشەيتۋگە سەپ بولادى.

«وڭىرىمىزدە ۆەتەريناريالىق ۇيىمداردىڭ ماتەريالدىق-تەحنيكالىق بازاسىن ۆەتەريناريالىق پۋنكتتەرمەن، مال قورىمدارىمەن، اۆتوكولىكتەرمەن  جابدىقتاۋ جۇمىستارى جۇزەگە اسىرىلۋدا. سوڭعى ەكى جىلدا حالىقتىڭ ءومىرىن قامتاماسىز ەتەتىن سالالاردىڭ ماتەريالدىق-تەحنيكالىق بازاسىن جاقسارتۋ ءۇشىن وبلىستىق بيۋدجەتتەن 10 ملرد تەڭگەگە توتەنشە جاعداي، ورمان شارۋاشىلىعى، كوممۋنالدىق شارۋاشىلىعى، ۆەتەريناريا، ءبىلىم مەن دەنساۋلىق سالالارىنا 700-گە جۋىق ارنايى تەحنيكالار ساتىپ الىنعان بولاتىن. ال بيىل وبلىس بويىنشا 5 ميلليارد تەڭگەگە جۋىق قاراجاتقا 200-گە جۋىق ارنايى تەحنيكا ساتىپ الۋ جوسپارلانىپ وتىر. سونىڭ اياسىندا جۋىردا «باتىسيرريگاتسيا» مەكەمەسىنە 18 بىرلىك، بۇگىن ۆەتەريناريالىق ستانتسيالارعا 106 ارنايى تەحنيكا بەرىلدى»، - دەدى وبلىس اكىمى ناريمان تورەعاليەۆ.

بۇل باستامالار وڭىردەگى ۆەتەريناريالىق جانە اگرارلىق ينفراقۇرىلىمدى جاڭعىرتۋعا باعىتتالعان ماڭىزدى قادامداردىڭ ءبىرى.

Abai.kz