وتانعا قاجەت سەرۆيس. QAJET TAXI الماتى نارىعىندا ياندەكستىڭ 10% ۇلەسىن وزىنە قاراتا الا ما؟

الماتىدا تاكسي نارىعى ءۇشىن جاڭا باسەكە باستالدى. ەندى وتاندىق Qajet Taxi سەرۆيسى نارىققا كىرىپ جاتىر. ەكى اي بۇرىن ۆەتنامنىڭ Green SM كومپانياسى جۇمىسىن باستاپ كەتكەن ەدى. ەندى وتاندىق جوبانىڭ الەۋەتىن پاتريوەموتسيامەن ەمەس، نارىقتىڭ ناقتى كارتيناسى ارقىلى باعالاپ كورەيىك.

ۇلتتىق ستاتيستيكا بيۋروسىنا ساي، 2025 جىلى قازاقستانداعى تاكسي كاسىپورىندارىنىڭ تابىسى 186,1 ملرد تەڭگەگە جەتتى. سونىڭ 47,4 ملرد تەڭگەسى الماتىعا تيەسىلى. قالادا ءبىر جىل ىشىندە 33,2 ملن جولاۋشى تاسىمالدانعان. ورتاشا جولاقى 1 400 تەڭگەنى قۇرادى.

2025 جىلعى ناۋرىزدا باسەكەلەستىكتى قورعاۋ جانە دامىتۋ اگەنتتىگى الماتى مەن استانا سياقتى ءىرى قالالاردا ياندەكستىڭ نارىقتىق ۇلەسى شامامەن 90 پايىز ەكەنىن مالىمدەگەن بولاتىن.

دەمەك، الماتىنىڭ رەسمي تىركەلگەن تاكسي نارىعىنىڭ كولەمىنە وسى ۇلەستى شارتتى تۇردە قولدانساق، ياندەكستىڭ ۇلەسىنە جىلىنا شامامەن 42,7 ملرد تەڭگە سايكەس كەلەدى. بۇل كومپانيانىڭ جاريالانعان ناقتى قالالىق اينالىمى ەمەس، ءبىزدىڭ ەسەپتىك باعالاۋىمىز.

ەندى Qajet Taxi وسى نارىقتىڭ 10 پايىزىن يەلەندى دەلىك. بۇل جىلىنا 4,74 ملرد تەڭگەلىك ساپار اينالىمى دەگەن ءسوز. ورتاشا جولاقىنى 1 400 تەڭگە دەپ الساق، جىلىنا 3,4 ملن-عا جۋىق، تاۋلىگىنە 9 مىڭنان استام ساپار ورىنداۋ قاجەت.

ارينە، بۇل ازىرگە ستسەناري عانا. بىراق ماتەماتيكالىق تۇرعىدان قاراساق، قول جەتكىزۋگە بولاتىن نارىقتىق ماقسات. Qajet ۋنيكالدى ساۋدا ۇسىنىسىمەن كەلىپ وتىر. جۇرگىزۋشىلەرگە كوميسسيا باستاپقىدا 0 پايىز دەپ بەكىتىلگەن. بارلىق اقشانى تاكسيست الادى. ال 2025 جىلى انتيمونوپوليالىق ورگان ياندەكس سەرۆيسىنىڭ كوميسسياسىن شامامەن 16 پايىز، تاكسوپاركتەردىڭ قوسىمشا ۇلەسىن 4 پايىز دەپ كورسەتكەن بولاتىن.

ەگەر Qajet ۇزاق مەرزىمدە تومەن كوميسسيانى ساقتاي السا، جۇرگىزۋشىلەر ءۇشىن تارتىمدى بالاماعا اينالادى. ال جۇرگىزۋشى كوبەيگەن جەردە كولىك كۇتۋ ۋاقىتى قىسقارادى. بۇل ءوز كەزەگىندە جولاۋشىنى تارتادى. بىراق تاكسي نارىعىندا تەك ارزان تاريفپەن جەڭىسكە جەتۋ قيىن. ياندەكستىڭ باستى كۇشى قالىپتاسقان ەكوجۇيەسى، پايدالانۋشىلار بازاسى، الگوريتمدەرى جانە كولىكتەردىڭ كوپتىگىندە بولىپ تۇر.

Qajet ءۇشىن نەگىزگى سىناق تا وسى. الدىمەن جەتكىلىكتى جۇرگىزۋشىنى، سودان كەيىن تۇراقتى جولاۋشىلار اعىنىن قالىپتاستىرۋى قاجەت. ونىڭ ۇستىنە نولدىك كوميسسيامەن ۇزاق ۋاقىت جۇمىس ىستەۋ ينۆەستيتسيانى تالاپ ەتەدى. مەنىڭشە، Qajet-ءتىڭ الماتىداعى تاكسي نارىعىنىڭ 10 پايىزىن يەلەنۋگە مۇمكىندىگى بار. بىراق ول ءۇشىن وتاندىق سەرۆيس كوپ ۇزاماي ەكونوميكالىق ارتىقشىلىققا ءوتۋى ءتيىس.

بۇل جەردە ماسەلە ياندەكستى تولىق ىعىستىرۋدا ەمەس. نارىقتا ەكىنشى مىقتى ويىنشىنىڭ پايدا بولۋىنىڭ ءوزى تاكسي باعاسىنا، كوميسسياعا جانە قىزمەت ساپاسىنا وڭ ىقپال ەتە الادى. ەڭ ماڭىزدىسى، قازاقستاندىق IT-جوبانىڭ ميللياردتاعان تەڭگەلىك نارىقتا ءوز ورنىن قالىپتاستىرۋىنا مۇمكىندىك بار.

باسەكە جۇرگىزۋشىگە دە، جولاۋشىعا دا ءتيىمدى. مونوپولياعا قارسى مەملەكەتتىك ورگان باسشىلارى دا تىنىش ۇيىقتايتىن بولادى.

ايبار ولجاەۆ

Abai.kz