جۇما كۇنى، 11 شىلدەدە استانادا قازاقستان رەسپۋبليكاسى كاسىپوداقتار فەدەراتسياسىنىڭ XXVII سەزى ءوتتى. ەلىمىزدىڭ ءار ءوڭىرى مەن سالاسىن قامتىعان 300-گە جۋىق دەلەگات قاتىسقان بۇل القالى جيىنعا الەۋمەتتىك ارىپتەستەر مەن شەتەلدىك ۇيىمداردىڭ وكىلدەرى دە جينالدى.

سەزدىڭ نەگىزگى قۇجاتتارى رەتىندە قازاقستان كاسىپوداقتارىنىڭ 2030 جىلعا دەيىنگى قىزمەت ستراتەگياسى مەن مەملەكەت باسشىسى قاسىم-جومارت توقاەۆتىڭ رەفورمالارىن قولداۋ تۋرالى ساياسي قارار قابىلداندى. قۇجاتتا كاسىپوداق قوزعالىسىن دامىتۋعا باسىمدىق بەرىلىپ، پرەزيدەنتتىڭ ەلدى جاڭعىرتۋعا باعىتتالعان باستامالارىنا ايقىن قولداۋ ءبىلدىرىلدى.

«كاسىپتىك وداقتار – قازاقستاندىق قوعامنىڭ اجىراماس بولىگى، ولاردىڭ قىزمەتىنىڭ نەگىزگى قاعيداتتارى – ارقاشان جانە ءاردايىم ەڭبەككەرلەردىڭ قۇقىقتارى مەن مۇددەلەرىن قورعاۋ بولىپ تابىلادى. ەڭبەك ادامى – قوعامىمىزدىڭ باستى قۇندىلىعى.

ءبىز قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ەلدى تۇبەگەيلى جاڭعىرتۋعا، ساياسي رەفورمالار مەن الەۋمەتتىك-ەكونوميكالىق وزگەرىستەرگە باعىتتالعان ستراتەگيالىق باعىتىن قولدايمىز»، – دەلىنگەن قاراردا.

قۇجاتتا «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدا كاسىپوداقتاردىڭ بيلىك پەن قوعام اراسىنداعى تۇراقتى ءوزارا ارەكەتتەستىكتى ىلگەرىلەتۋگە، اشىقتىق قاعيداتتارىن جانە «كەرى بايلانىس» ارنالارىنىڭ دامۋىنا قوسىپ جاتقان ۇلەسى ەرەكشە اتاپ وتىلگەن.

سەزد دەلەگاتتارى مەملەكەت باسشىسىنىڭ 2025 جىلدى جۇمىسشى ماماندىقتار جىلى دەپ جاريالاۋ باستاماسىن زور ىقىلاسپەن قولدادى. بۇل شەشىم – جۇمىسشى ماماندىقتارىنىڭ مارتەبەسىن كوتەرۋگە، ەڭبەكقورلىق پەن كاسىبيلىك يدەياسىن ىلگەرىلەتۋگە، ەڭبەك ادامىنىڭ قوعامداعى بەدەلىن ارتتىرۋعا باعىتتالعان ماڭىزدى قادام.

سونداي-اق كاسىپوداقتار «تازا قازاقستان» ستراتەگياسىنىڭ قۇندىلىقتارىن قولدايتىنى، ونى ءارتۇرلى سالالاردا ەكولوگيالىق مادەنيەتتى قالىپتاستىرۋعا باعىتتالعان يدەيالارىن ءبىرىزدى تۇردە ىسكە اسىرۋعا دايىن ەكەنىن ءبىلدىردى.

سەزد دەلەگاتتارى پرەزيدەنت جاريا ەتكەن الەۋمەتتىك باستامالار ازاماتتاردىڭ ءومىر ساپاسىن ارتتىرىپ، ادامي كاپيتالدى دامىتۋعا جول اشاتىنىنا سەنىم ءبىلدىردى. قاتىسۋشىلار قازاقستان مەملەكەتىنىڭ ەڭبەك سالاسىندا لايىقتى ەڭبەك قاعيداتتارىن ەنگىزىپ، ۇلتتىق زاڭنامانى جەتىلدىرۋ ارقىلى حالىقارالىق ستاندارتتارعا ساي بولۋعا ۇمتىلىپ كەلە جاتقانى ەرەكشە اتالدى.

سەزدىڭ باستى ۇندەۋى – «وزگەرىستەر داۋىرىندەگى ءادىل ەڭبەك: قورعاۋ، دامۋ، يننوۆاتسيالار» مەملەكەت باسشىسىنىڭ ادىلەتتىلىكتى قامتاماسىز ەتۋ جانە «ادىلەتتى قازاقستان» قاعيداتىن ىسكە اسىرۋ تۋرالى نەگىزگى تۇجىرىمىمەن ۇندەس ەكەنى ايتىلدى.

سونىمەن قاتار الەۋمەتتىك-ەڭبەك قاتىناستارىندا «زاڭ مەن ءتارتىپ» قاعيداسىن ساقتاۋ، مەملەكەت باسشىسى قويعان مىندەتتەردى جۇزەگە اسىرۋدا بارلىق تاراپتاردىڭ ءوزارا ديالوگى مەن ارىپتەستىگىن ارتتىرۋ قاجەتتىگى دە اتاپ ءوتىلدى.

سەزدىڭ اياسىندا قازاقستان رەسپۋبليكاسى كاسىپوداقتار فەدەراتسياسى باس كەڭەسىنىڭ سوڭعى بەس جىلداعى قىزمەتىنىڭ ەسەبى تىڭدالدى. ەسەپتى قر كاسىپوداقتار فەدەراتسيا توراعاسى ساتىبالدى داۋلەتالين باياندادى. قۇجاتتا كاسىپوداق قوزعالىسىنىڭ دامۋى مەن ەڭبەك ادامدارىن قورعاۋداعى ماڭىزدى ءرولى ناقتى كورسەتىلگەن.

سەزدىڭ تاعى ءبىر ماڭىزدى شەشىمى — قازاقستان رەسپۋبليكاسى كاسىپوداقتار فەدەراتسياسى توراعاسىن سايلاۋ بولدى. اشىق داۋىس بەرۋ ناتيجەسىندە ساتىبالدى داۋلەتالين ءبىراۋىزدان كەلەسى بەس جىلعا توراعا بولىپ قايتا سايلاندى.

سەزدىڭ قۇرمەتتى قوناقتارى قاتارىندا حالىقارالىق ەڭبەك ۇيىمىنىڭ ەڭبەككەرلەر قىزمەتى جونىندەگى بيۋرو ديرەكتورى ماريا حەلەنا اندرە، حالىقارالىق كاسىپوداقتار كونفەدەراتسياسىنىڭ باس حاتشىسى ليۋك تريانگل، حكك بۇكىلەۋروپالىق ايماقتىق كەڭەسىنىڭ (بەاك) باس حاتشىسى ەستەر لينچ، حكك بەاك پرەزيدەنتى يگور زۋبكۋ، سونداي-اق گرۋزيا، وزبەكستان، ازەربايجان، جاپونيا، پولشا جانە باسقا دا ەلدەردىڭ ۇلتتىق كاسىپوداق ورتالىقتارىنىڭ باسشىلارى بولدى.

بۇگىندە فەدەراتسيا 2 ميلليوننان استام مۇشەنى بىرىكتىرىپ وتىر. ونىڭ قۇرامىنا 16,5 مىڭ باستاۋىش كاسىپوداق ۇيىمى، 18 وڭىرلىك بىرلەستىك جانە 24 سالالىق كاسىپوداق كىرەدى. قازاقستان كاسىپوداقتارى حالىقارالىق دەڭگەيدە دە بەلسەندى جۇمىس ىستەپ كەلەدى. ولار – حالىقارالىق كاسىپوداقتار كونفەدەراتسياسىنىڭ مۇشەسى جانە ورتالىق ازيا ەلدەرىنىڭ كاسىپوداقتار كەڭەسى مەن تۇركى مەملەكەتتەرىنىڭ كاسىپوداقتار ۇيىمىن قۇرۋ باستاماسىن العاش كوتەرگەن قۇرىلىمداردىڭ ءبىرى.

Abai.kz