ۇلتتىق رۋحتى دارىپتەۋ – كەز كەلگەن مەملەكەتتىڭ مادەني بولمىسىن ايقىندايتىن ماڭىزدى ءىس. سول مىندەتتى ابىرويمەن اتقارىپ جۇرگەن ورتالىقتاردىڭ ءبىرى – «الاتاۋ» ءداستۇرلى ونەر تەاترى.

تەاتر 2016 جىلى اشىلعان كۇننەن باستاپ قازاقتىڭ ءداستۇرلى مۋزىكاسىن، جىراۋلىق ونەرىن، ۇلتتىق قويىلىمدارىن جاڭا دەڭگەيگە كوتەرۋدى ماقسات ەتتى. بۇگىندە تەاتردىڭ ايقىن مادەني بەت-بەينەسىن قالىپتاستىرعان – ەلگە تانىمال ءداستۇرلى انشىلەر، جىراۋلار، اكتەرلەردەن قۇرالعان شىعارماشىلىق توپ. ولاردىڭ ارقايسىسى ۇلتتىق ونەردى دارىپتەۋگە وزىندىك ۇلەس قوسىپ، تەاتردىڭ تانىمالدىعىن ارتتىرۋعا سەبەپكەر بولىپ وتىر.

«الاتاۋ» ءداستۇرلى ونەر تەاترى – ۇلتتىق ساحنالىق مادەنيەتتى زاماناۋي باعىتتا دامىتۋعا باعىتتالعان بىرەگەي ورتالىق. تەاتردىڭ باستى ميسسياسى – ءداستۇرلى ونەردىڭ باي مۇراسىن بۇگىنگى كورەرمەنگە جاڭا فورماتتا ۇسىنۋ. رەپەرتۋارىندا حالىق اندەرى مەن قيسسا-داستاندار، اقىن-جىراۋلار مۇراسى، ەتنوگرافيالىق قويىلىمدار، ۇلتتىق دراماتۋرگيا تۋىندىلارى كەڭىنەن ورىن العان.

تەاتر شىعارماشىلىق ۇجىمى ءار قويىلىمدا ۇلتتىق مىنەز، بولمىس، سالت-ءداستۇردى كوركەم تىلمەن جەتكىزىپ، كورەرمەنگە رۋحاني تەرەڭدىك پەن شىنايىلىق سىيلايدى.

جىراۋلىق ءداستۇر – قازاق رۋحانياتىنىڭ تەرەڭ تامىرى. «الاتاۋ» تەاترى جىراۋلىق ونەردى جاڭعىرتىپ، ونى ستيليستيكالىق تۇرعىدا ساقتاي وتىرىپ، زاماناۋي فورماتتا ۇسىناتىن مادەني ورتاعا اينالدى. تەاتر جىراۋلارى كلاسسيكالىق جىر-داستانداردى، ەپيكالىق تولعاۋلاردى، تەرمە-تولعاۋلار مەن تاريحي ارناۋلاردى كورەرمەنگە جەتكىزىپ كەلەدى.

ولاردىڭ ورىنداۋ مانەرى، داۋىس قويۋ تەحنيكاسى، دومبىرا قاعىسىنىڭ ەرەكشەلىگى – تەاتردىڭ باستى ەرەكشەلىكتەرىنىڭ ءبىرى. سونىمەن قاتار جىراۋلار جاس بۋىنعا شەبەرلىك ساباقتارىن وتكىزىپ، ۇلتتىق ونەردىڭ ۇزىلمەۋىنە ىقپال ەتىپ ءجۇر.

سۋرەت: «الاتاۋ» ءداستۇرلى ونەر تەاترىنان الىندى.

امانقوس وتەگەنۇلى – قازاقتىڭ جىراۋلىق ءداستۇرىن بۇگىنگى كۇنگە جەتكىزىپ، ونى كاسىبي ساحنالىق دەڭگەيدە دامىتىپ جۇرگەن ونەر مايتالمانى. مادەنيەت سالاسىنىڭ ۇزدىگى، رەسپۋبليكالىق جىرشىلار كونكۋرسىنىڭ لاۋرەاتى. امانقوس وتەگەنۇلى 1966 جىلدىڭ 15 ماۋسىمىندا دۇنيەگە كەلگەن. بالا كەزىنەن ۇلتتىق مۋزىكا مەن جىر ونەرىنە ەرەكشە قىزىعۋشىلىق تانىتقان امانقوس سادىقوۆ ونەر جولىن ادالدىقپەن جالعاپ كەلە جاتقان جىرشى-تەرمەشىلەردىڭ بىرەگەيى.

امانقوس سادىقوۆ العاش مۋزىكالىق ءبىلىمىن ەسترادا-تسيرك ۋچيليششەسىندە الىپ، دومبىرامەن ءان ايتۋ ماماندىعى بويىنشا كاسىبي دايىندىقتان ءوتتى. ءداستۇرلى ۆوكال مەن دومبىرا ونەرىن جان-جاقتى مەڭگەرۋى ونىڭ بولاشاق جىراۋلىق شەبەرلىگىنىڭ بەرىك نەگىزىنە اينالدى.

كەيىننەن ول شىمكەنت قالاسىنداعى م. اۋەزوۆ اتىنداعى ۋنيۆەرسيتەتتىن مۋزىكا ماماندىعى بويىنشا اياقتاپ، ونەر سالاسىندا تەرەڭ ءبىلىم الدى. وسى كەزەڭنەن باستاپ جىرشىلىق باعىت ونىڭ نەگىزگى كاسىبي جولىنا اينالدى.

امانقوس سادىقوۆ بۇگىندە «الاتاۋ» ءداستۇرلى ونەر تەاترىنىڭ بەلدى ارتيستەرىنىڭ ءبىرى. ول تەاتردا: ءارتىس، جىرشى، تەرمەشى رەتىندە قىزمەت ەتىپ، تەاتردىڭ كوركەمدىك دەڭگەيىن كوتەرۋگە زور ۇلەس قوسىپ كەلەدى.

جىرشىلىق ءداستۇردى ساقتاپ قانا قويماي، ونى ساحنالىق قويىلىمدارمەن ۇشتاستىرىپ، جاڭا دەڭگەيدە تانىتىپ جۇرگەن شىعارماشىلىق تۇلعا.

امانقوس سادىقوۆ جىرشىلىق ونەرىمەن عانا شەكتەلمەي، كينو سالاسىندا دا ءوزىن كورسەتە العان تالانتتى ونەرپاز.

ول تۇسكەن فيلمدەر: «قامبار باتىر» ءفيلمى — قامبار باتىردىڭ ءرولى. «ءشامشى» دەرەكتى ءفيلمى — كومپوزيتور ءشامشى قالداياقوۆتىڭ ءرولى. بۇل جۇمىستارىندا ول وزىنە ءتان تابيعي اكتەرلىك قابىلەتىمەن، ۇلتتىق بولمىسىمەن وبرازداردى نانىمدى سومداي ءبىلدى.

«الاتاۋ» ءداستۇرلى ونەر تەاترىنىڭ ساحناسىندا امانقوس سادىقوۆ بىرنەشە ماڭىزدى بەينەلەردى سومدادى: «ءان-مۇحيت» سپەكتاكلىندەگى – سوقىر شال بەينەسى، «ايمان–شولپان» قويىلىمىنداعى – جىراۋ ءرولى، «قامبار باتىر» جىرىنىڭ ساحنالىق نۇسقاسىندا — قامبار باتىر. اسىرەسە «قامبار باتىر» جىرىن ساحنالىق قويىلىم دەڭگەيىندە ورىنداپ، اكتەرلىك جانە جىرشىلىق شەبەرلىكتى ۇشتاستىرۋ ارقىلى كورەرمەنگە ەرەكشە اسەر قالدىردى. بۇل ونىڭ جان-جاقتى ونەر يەسى ەكەنىن دالەلدەي تۇسەدى.

امانقوس سادىقوۆتىڭ قۇندى قازىناعا تولى رەپەرتۋارى قازاق جىراۋلىق ءداستۇرىنىڭ كەڭدىگىن ايعاقتايدى. ونىڭ ورىنداۋىندا اقتان كەرەيۇلى، قاشاعان كۇرجىمانۇلى، بازار جىراۋ، كەردەرى ابۋباكىر، كەردەرى قۇدايبەرگەن، مايلىقوجا سۇلتانقوجاۇلى، ناۋرىزبەك جىراۋ سىندى ءىرى تۇلعالاردىڭ جىر-تەرمەلەرى جاڭا تىنىس الىپ كەلەدى.

سونىمەن قاتار «قىز جىبەك»، «قامبار باتىر»، «انەس ساحابا» داستانى ونىڭ رەپەرتۋارىندا تۇراقتى ورىن العان. امانقوس سادىقوۆتىڭ ورىنداۋشىلىق مانەرىنىڭ ەرەكشەلىگى — ساحنادا جىردىڭ رۋحىن، ەپيكالىق كەڭدىگىن، وبرازدىق تەرەڭدىگىن تولىق جەتكىزە بىلۋىندە.

امانقوس سادىقوۆ وتەگەنۇلى – جىر ونەرىنىڭ الدىندا تەر توگىپ جۇرگەن، ۇلتتىق ءداستۇردى بۇگىنگى زامان سۇرانىسىنا بەيىمدەي وتىرىپ ۇسىناتىن ابىرويلى ونەر يەسى. ول تەاتر ساحناسىندا دا، كينودا دا، جىر الەمىندە دە ءوز قولتاڭباسىن قالدىرعان تالانت. «الاتاۋ» ءداستۇرلى ونەر تەاترىنىڭ ابىرويىن ارتتىرىپ، جىرشىلىق ءداستۇردى كەيىنگى ۇرپاققا جەتكىزۋدە امانقوس سادىقوۆتىڭ ەڭبەگى زور.

«الاتاۋ» تەاترى –  سونىمەن بىرگە ۇلتتىق دراماتۋرگياعا دەن قويعان شىعارماشىلىق ۇجىم. تەاتر اكتەرلەرى ۇلتتىق مىنەز-قۇلىقتى تەرەڭ سەزىممەن جەتكىزەمىن دەگەن ماقساتتا جۇمىس ىستەيدى.

سۋرەت: «الاتاۋ» ءداستۇرلى ونەر تەاترىنان الىندى.

ونەردىڭ جولى – اۋىر دا ازاپتى، بىراق شىن جۇرەكپەن شەبەرلىككە ۇمتىلعان جاننىڭ قادامىنا جارىق تۇسىرەتىن قاسيەتتى سوقپاق. وسى سوقپاققا ءتۇسىپ، ءوز ەڭبەگىن كورەرمەننىڭ كوڭىلىنە ارناعانداردىڭ ءبىرى – مىرزالينوۆا كۇرالاي بالاپانقىزى. اباي ايتقانداي، «ونەر اقىلمەن سۋارىلعاندا عانا باياندى»، ال ءارتيستىڭ ساحناداعى جۇرىسىنەن، ءسوز ساپتاۋىنان، بەينە سومداۋىنان وسى تالاپتىڭ ورىندالعانىن انىق اڭعارۋعا بولادى.

1982 جىلى الماتى وبلىسى، كەربۇلاق اۋدانىنىڭ قاراشوقى اۋىلىندا دۇنيەگە كەلگەن كۇرالايدىڭ كاسىبي قالىپتاسۋى ت. جۇرگەنوۆ اتىنداعى ونەر اكادەمياسىندا باستالدى. ول بۇل شاڭىراقتا مۋزىكالىق دراما ونەرىن مەڭگەرىپ، اكتەرلىك بولمىسىنىڭ نەگىزىن قالادى. ونەر اتتى كەڭ القاپقا قادام باسقان كۇننەن بەرى ارتيست ءوز ىزدەنىسىن توقتاتقان ەمەس.

2003 جىلدان 2015 جىلعا دەيىن ن. ءجانتورين اتىنداعى مۋزىكالىق-دراما تەاترىندا ەڭبەك ەتكەن كەزەڭى – ونىڭ اكتەرلىك مەكتەپتىڭ قىر-سىرىن تەرەڭ مەڭگەرىپ، ساحنالىق بولمىسىن ايقىنداعان ءداۋىرى. كەيىنگى جىلدارى ۇستازدىق قىزمەت اتقارىپ، اكتەرلىك شەبەرلىكتى جاس بۋىنعا ۇيرەتۋى – ونەردىڭ جاۋاپكەرشىلىگىن سەزىنگەن ادامنىڭ ءىسى.

2018 جىلدان باستاپ «الاتاۋ» ءداستۇرلى ونەر تەاترىندا قىزمەت ەتىپ كەلەدى. بۇل تەاتردىڭ تىنىسىن اشىپ، اكتەرلىك قۇرامىنىڭ دامۋىنا وزىندىك ۇلەسىن قوسىپ كەلە جاتقان ارتيستەردىڭ ءبىرى. تەاتردىڭ 2026 جىلى 10 جىلدىق بەلەسىنە اياق باسقاندا، سول جىلداردىڭ دەنىندە وسى ۇجىمنىڭ ساحناسىندا ەڭبەك ەتىپ جۇرگەن ارتيستەردىڭ قاتارىندا كۇرالايدىڭ ورنى ايقىن كورىنەدى.

كۇرالاي سومداعان بەينەلەر كورەرمەنگە وي سالاتىن، كەيىپكەردىڭ ىشكى دۇنيەسىن زەردەلەۋگە مۇمكىندىك بەرەتىن سيپاتىمەن ەرەكشەلەنەدى.

«جىر جولبارىس» قويىلىمىندا ۇلدان ءرولى – انالىق مەيىرىم مەن رۋحاني بەرىكتىكتى قاتار تانىتاتىن بەينە. انا ءرولى – ادام جانىنىڭ ەڭ تەرەڭ، ەڭ نازىك يىرىمدەرىن ساحنادا ءدال جەتكىزۋدى تالاپ ەتەدى. «اباي–توعجان» قويىلىمىنداعى زەرە وبرازىندا سالماق پەن سابىر، اقىل مەن ايبىن قاتار جۇرەدى. بۇل رولدەر كۇرالايدىڭ نازىكتىكتى دە، دانالىقتى دا تابيعي جەتكىزە الاتىن ارتيست ەكەنىن كورسەتەدى.

«گۇلدەر حيكاياسىنداعى» قالامپىر – العىرلىق پەن كوڭىل جىلۋىنىڭ ۇلگىسى; «الاتاۋ FM راديوسى» مۋزىكالىق كومەديادا رايگۇل جالعىز باستى انانى سومدايدى. ول بالا شاعاسىن اسىراپ، ەل قاتارىنا قوسۋ ءۇشىن ءوزىنىڭ نازىك جاندى ەكەنىن ۇمىتقان ايەلدى بەينەلەيدى. كۇلدىرىپ وتىرىپ، ءومىردىڭ اششى شىندىعى ايقىن كورىنەدى. كەيىپكەرىنىڭ جان دۇنيەسىن تولىقتاي زەرتتەپ، ءار ءىس-ارەكەتى، ءسوزى، مانەرى، قىلىعى ارقىلى كورەرمەننىڭ كوڭىلىنەن شىققان وبرازدىڭ ءبىرى. ساحنالىق ءار رولىندە ارتيست ادامنىڭ ىشكى كۇيىن سوزبەن ەمەس، كوزقاراسىمەن، داۋىس ىرعاعىمەن، قيمىلىمەن جەتكىزۋگە ۇمتىلادى. بۇل – تەاتر ونەرىنىڭ باستى قۇندىلىعى.

كينوداعى جۇمىستارى دا ونىڭ اكتەرلىك دياپازونىنىڭ كەڭدىگىن بايقاتادى. «ءان اعا» تەلەحيكاياسىنداعى جامال وماروۆا، «ساعان سەنەم ءىن» جوباسىنداعى مانسيا، «اسكەردەن حات» فيلمىندەگى راۋشان – حاراكتەرى بولەك، تاعدىرى بولەك ايەلدەر بەينەسى. ەكرانداعى ءار رولىندە ارتيست ءومىردىڭ ءتۇرلى قىرىن كورەرمەنگە شىنايى جەتكىزۋگە تىرىساتىنى بايقالادى.

قىسقا مەترلى «دومبىرا» فيلمىندەگى ورىنداۋى دا قازاقى بولمىستىڭ بوياۋىن، ىشكى جان دۇنيەنىسىن ءدال سەزدىرە الاتىن ارتيست ەكەنىن دالەلدەيدى. بۇل – اكتەردىڭ تابيعيلىعى مەن كاسىبي دايىندىعىنىڭ ىقپالى.

ساحنا – ءسوزدىڭ كيەسىن، سەزىمنىڭ سالماعىن، ادامنىڭ جان دۇنيەسىن اشاتىن ورىن. مىرزالينوۆا كۋرالايدىڭ ونەر جولىنداعى ءار قادامى وسى ويعا ۇندەس. ول ءار ءرولىن ءوز بويىنان وتكىزىپ، كورەرمەنگە جەتكىزۋگە ۇمتىلادى. بۇل – اكتەرلىك ەڭبەكتىڭ ەڭ كۇردەلى ءارى ەڭ باعالى تۇسى.

«الاتاۋ» ءداستۇرلى ونەر تەاترى – ۇلتتىق مادەنيەتتىڭ جاڭا تىنىسىن اشقان ورتالىق. سول ورتادا ەڭبەك ەتىپ كەلە جاتقان ءارتيستىڭ ءار ءرولى كورەرمەندى ويعا جەتەلەپ، ساحنالىق مادەنيەتتىڭ دامۋىنا ۇلەس قوسىپ وتىر.

سۋرەت: «الاتاۋ» ءداستۇرلى ونەر تەاترىنان الىندى.

ونەر جولى – ادام جانىنىڭ سارايىنا اپارار ەڭ ۇزاق تا ىستىق سۇرلەۋ. بۇل جولدا تالاپ – تۇلپار، ەڭبەك – ەسكەك، جۇرەك – جەلكەن. وسى ۇشەۋى توعىسقاندا عانا ونەردىڭ بيىگىنە قول سوزىپ، ءوز ءىزىن قالدىرعان جاننىڭ ەڭبەگى باياندى بولماق. سول جولعا جاسىنان دەن قويعان جانداردىڭ ءبىرى – دۇيسەمبيەۆا جانەركە مۇراتقىزى, 1996 جىلدىڭ ماۋسىم ايىنىڭ العاشقى كۇنى تاراز توپىراعىندا دۇنيەگە كەلگەن.

ونەرگە العاش قادام باسقان شاعى – ىزدەنىسكە تولى ستۋدەنتتىك كەزەڭ. 2012–2015 جىلدارى ت. ق. جۇرگەنوۆ اتىنداعى كوللەدجدە مۋزىكالىق تەاتر ءارتيسى ماماندىعىن مەڭگەرىپ، ساحنا ەسىگىن تۇڭعىش رەت كاسىبي تۇردە اشتى. وسى جىلدار – كوڭىلگە تۇڭعىش وت تۇتاتقان، جۇرەككە ونەردىڭ دەرتىن سالعان، ومىرلىك باعىت-باعدارىن ايقىنداعان قاستەرلى كەزەڭ.

ءبىلىمىن تەرەڭدەتىپ، 2015–2020 جىلدارى ت. ق. جۇرگەنوۆ اتىنداعى ونەر اكادەمياسىندا رەجيسسەر-پروديۋسەرلىك ءبىلىمدى يگەردى. ونەردىڭ تەك ويناۋمەن ەمەس، وي تۋدىرۋمەن دە قادىرلى ەكەنىن وسى جىلدارى ۇعىندى. سەبەبى ساحنا – اكتەردىڭ عانا ەمەس، ادامنىڭ ىشكى ويى مەن جان دۇنيەسىنىڭ دە ايناسى.

العاشقى كاسىبي قادامى 2015–2017 جىلدارى ع. مۇسىرەپوۆ اتىنداعى بالالار مەن جاسوسپىرىمدەر تەاترىندا باستالدى. بۇل ورتا اكتريسانىڭ شىنايىلىققا، تازالىققا، بالعىن ەنەرگياعا تولى ساحنالىق تىنىسىن قالىپتاستىردى. سونىمەن بىرگە، 2015–2020 جىلدارى «ارت حاۋس» ونەر مەكتەبىندە، 2020–2022 جىلدارى «مار مار» ورتالىعىندا اكتەرلىك شەبەرلىك بويىنشا ءدارىس بەرۋى – ونەردى ۇيرەنۋمەن قاتار، ونى وزگەگە ۇيرەتۋ دە ۇلكەن جاۋاپكەرشىلىك ەكەنىن سەزىندىردى. اباي ايتقانداي، «ۇستازدىق قىلعان جالىقپاس» – ونەرپاز شاكىرتىنەن بۇرىن ءوزىن تاربيەلەيدى.

2018 جىلدان بەرى «الاتاۋ» ءداستۇرلى ونەر تەاترى – جانەركەنىڭ تۇراقتى شىعارماشىلىق شاڭىراعى. ۇلتتىق ونەردىڭ تەمىرقازىعىن جاڭا داۋىردە قايتا تىگىپ، ءداستۇردىڭ تىنىسىن كەڭەيتۋدى ماقسات ەتكەن بۇل تەاتردا اكتريسا ون جىلعا جۋىق ۋاقىت بويى نەگىزگى قويىلىمداردىڭ مازمۇندىق وزەگىن كوتەرىپ كەلەدى. تەاتردىڭ 2026 جىلعى ون جىلدىق بەلەسىندە ونىڭ ەڭبەگى وسى جولدىڭ جارتىسىنان استامىنا كۋا بولماق.

جانەركەنىڭ اكتەرلىك تابيعاتى – نازىكتىك پەن جىگەردىڭ، ەموتسيالىق يكەمدىلىك پەن ىشكى ءتارتىپتىڭ ۇيلەسكەن كورىنىسى. ءار رولدە مىنەزدىڭ وزەگىن تاۋىپ، كەيىپكەردىڭ ىشكى لوگيكاسىن بۇزباي، كورەرمەنگە تۇسىنىكتى ءارى سەنىمدى بەينە جاساي ءبىلۋى ونىڭ اكتەرلىك مەكتەبىنىڭ قالىپتاسقانىن بايقاتادى.

«جىر جولبارىس» – بۇرىم (رەج. ە. نۇرتازين)

بۇرىم – نازىكتىگىمەن كورىنگەنمەن، ىشكى قايراتى باسىم، جۇرەگى تازا بەينە. اكتريسا بۇل رولدە ەموتسيانى اشىق جار سالۋمەن ەمەس، ىشتەي تەربەلىپ، كوزقاراس پەن پلاستيكاعا سۇيەنىپ جەتكىزەدى. بۇرىمنىڭ ۇياڭدىعى مەن بەرىكتىگى جانەركەنىڭ ساحنالىق تىنىسىمەن ۇيلەسىم تاۋىپ، كورەرمەنگە جۇرەك تۇنىعىنان جەتەدى.

«اباي–توعجان» – توعجان (رەج. ە. ءبىلال)

توعجان بەينەسىندە اكتريسا سىپايىلىقتى، سىرلى سەزىمنىڭ جەڭىل يىرىمدەرىن، ايەل جانىنىڭ نازىك تولقىنىسىن تابيعي بەرەدى. ونىڭ داۋىس ىرعاعىنداعى جۇمساقتىق، ءسوز مانەرىندەگى سالماق – توعجاننىڭ تەرەڭ بولمىسىن اشاتىن نەگىزگى كىلت. بۇل ءرول – جاس اكتريسانىڭ كلاسسيكالىق وبرازدى سەنىمدى الىپ شىعۋعا قابىلەتتى ەكەنىن كورسەتەدى.

«ايمان–شولپان» – ايمان (رەج. ج. جۇمانباي)

ايمان – ارەكەتى شاپشاڭ، تاپقىر، كوڭىلگە جەڭىل بەينە. جانەركە بۇل رولدە سەرگەكتىك پەن ساحنالىق يكەمدىلىكتى قاتار پايدالانىپ، كومەديالىق ەلەمەنتتەردى ناقتى ىرعاقپەن ورىندايدى. ديالوگتى ءدال بەرۋى مەن ساحناداعى ەركىندىگى ايماننىڭ شىنايى مىنەزىن اشا تۇسەدى. بۇل ءرول اكتريسانىڭ كۇلدىرىپ وتىرىپ وي سالاتىن كومەديا جانرداعى قابىلەتىن كورسەتەدى.

«قاماۋدا قالعان ارمان» – قاتيرا (رەج. ن. تۋتوۆ)

قاتيرا – درامالىق سالماعى زور كۇردەلى كەيىپكەر. مۇندا اكتريسا ءومىر سىنىنا تۇسكەن ايەلدىڭ ىشكى ارپالىسىن، ءۇنسىز مۇڭىن، كوڭىلدەگى جاراسىن ميميكا مەن پاۋزا ارقىلى تەرەڭ جەتكىزەدى. رولدەگى ۇستامدىلىق پەن ەموتسيالىق دالدىك – جانەركەنىڭ درامالىق جانرداعى شىنايىلىققا بەيىم ەكەنىن ايقىندايدى.

كينو سالاسىنداعى ىزدەنىسى

ەكران ونەرىندە دە وزىندىك قولتاڭباسىن كورسەتىپ كەلەدى.

• «كەيكى مەرگەن» فيلمىندەگى اقجان
•  «جالعىز جاۋقازىن» تەلەحيكاياسىنداعى جانيا

بۇل رولدەردە اكتريسا كادر الدىنداعى شىنايىلىقتى ساقتاپ، سەزىمدى كوز قاراشىعىنان-اق جەتكىزە بىلۋىمەن ەرەكشەلەنەدى. كينو – ءۇنسىز سويلەيتىن ونەر، ال جانەركەنىڭ ىشكى تىنىسى كادردا تابيعي كورىنىس تابادى.

«الاتاۋ» ءداستۇرلى ونەر تەاترى 2022 جىلى استانا قالاسىندا وتكەن، ءازىربايجان ءماديۇلى مامبەتوۆتىڭ 90 جىلدىق مەرەيتويىنا ارنالعان TEATRALL II حالىقارالىق تەاتر فەستيۆالىنە قاتىستى. بۇل ونەر دوداسىندا ۇجىمنىڭ ەڭبەگى جوعارى باعالانىپ، قاتىسۋشىلارعا ارنايى مەدالدار تابىستالدى.

سول ساتتە جۇرتشىلىق نازارىن وزىنە ەرەكشە اۋدارتقان جۇلدىزداردىڭ ءبىرى – جانەركە دۇيسەمبيەۆا بولدى. فەستيۆال ۇيىمداستىرۋشىلارى ونى ورتاعا شىعارىپ، قۇرمەتپەن اتاپ، ماراپاتتى كوپشىلىك الدىندا ارنايى تابىستادى. بۇل – اكتريسانىڭ كاسىبي ەڭبەگى عانا ەمەس، ساحناداعى تابيعيلىعى، جاۋاپكەرشىلىگى، جانكەشتى ىزدەنىسىنىڭ دە ەل الدىندا مويىندالۋى.

جانەركە مۇراتقىزى – جاس بۋىن وكىلى بولا تۇرا، باستى رولدەرگە سەنىممەن ۇسىنىلاتىن اكتريسالاردىڭ ءبىرى. ونىڭ ساحنالىق قيمىلداعى جيناقىلىعى، ەموتسيالىق دالدىگى، كەيىپكەر تابيعاتىن تەرەڭ تۇسىنە ءبىلۋى – «الاتاۋ» تەاترىنىڭ قالىپتاسۋ جىلدارىندا ەرەكشە ۇلەس قوسقانىن دالەلدەيدى.

ونەر جولىن تالاپ پەن ەڭبەككە، جۇرەكپەن سەزىنۋگە نەگىزدەگەن اكتريسا ءۇشىن ءار ءرول – ادام جانىنىڭ ءبىر قۇپيا ەسىگى. سول ەسىكتى اشا بىلگەن ونەر يەسى – ساحنانىڭ تىنىسىن، ءداستۇردىڭ ءمانىن، كورەرمەننىڭ كوڭىلىن قاتار ۇستاي العان جان.

«الاتاۋ» ءداستۇرلى ونەر تەاترى – قازاقتىڭ رۋحاني مۇراسىن ساقتاپ، جاڭعىرتىپ، بولاشاققا جەتكىزەتىن مادەني وردا. ونىڭ بەت-بەينەسىن قالىپتاستىرىپ جۇرگەن ءداستۇرلى انشىلەر، جىراۋلار، اكتەرلەر – بۇگىنگى ۇلتتىق ونەردىڭ شىن جاناشىرلارى.

ولاردىڭ شىعارماشىلىعى تەك تەاتردىڭ عانا ەمەس، جالپى قازاق مادەنيەتىنىڭ دامۋىنا سەرپىن بەرىپ، ۇلتتىق بولمىسىمىزدىڭ بيىك دەڭگەيدە ساقتالۋىنا ىقپال ەتۋدە.

«الاتاۋ» ءداستۇرلى ونەر تەاترىنىڭ ادەبيەت ءبولىمى

Abai.kz