بۇل جۇمىستار ترانزيتتىك الەۋەتتى ارتتىرۋعا باعىتتالعان مەملەكەتتىك ساياسات اياسىندا جۇزەگە اسىرىلۋدا.  

بيىلدىڭ وزىندە 4 كەدەن بەكەتى پايدالانۋعا بەرىلدى.

قارجى مينيسترلىگى جاڭا نىسانداردىڭ حالىقارالىق ستاندارتتارعا ساي سالىنعانىن جانە كولىك قۇرالدارىن سكانەرلەۋگە، تەكسەرۋگە جانە اۆتوماتتى ولشەۋگە ارنالعان جوعارى تەحنولوگيالىق جابدىقتارى بار ەكەنىن حابارلايدى.

جاڭعىرتۋ جۇمىستارى قىتاي، وزبەكستان جانە تۇرىكمەنستانمەن شەكارالاس 9 وتكىزۋ پۋنكتىندە جۇرگىزىلىپ جاتىر.

2025 جىلى قىتايمەن شەكارادا "كولجات" جانە "الاكول", وزبەكستانمەن شەكارادا "قاپلانبەك" جانە "اتامەكەن" وتكىزۋ پۋنكتەرى ىسكە قوسىلدى.

– جىلدىڭ سوڭىنا دەيىن "قازىعۇرت", "تاجەن", "تەمىر بابا", "مايقاپشاعاي" جانە "باقتى" بەس وتكىزۋ پۋنكتىن جاڭعىرتۋدى اياقتاۋ جوسپارلانىپ وتىر. جاڭا پۋنكتتەردە شەكارانى ىڭعايلى جانە قاۋىپسىز كەسىپ ءوتۋ ءۇشىن بارلىق جاعداي جاسالعان. كولىك قوزعالىسى جولاعىنىڭ سانى 2-دەن 6-عا دەيىن ۇلعايتىلدى، باقىلاۋ جۇرگىزۋشىنىڭ كابيناسىنان شىقپاي-اق وتەدى، ال پروتسەستەردىڭ تولىق اۆتوماتتاندىرىلۋىنىڭ ارقاسىندا شەكارادان ءوتۋ ۋاقىتى ورتا ەسەپپەن 30 مينۋتقا دەيىن قىسقارتىلدى. مۇنىڭ ەرەكشەلىگى – ء"بىر تەرەزە" قاعيداتى بويىنشا قوسىمشا توقتاتۋسىز باقىلاۋدىڭ بارلىق تۇرىنەن ۇزدىكسىز ءوتۋدى قامتاماسىز ەتەتىن بىرىڭعاي تەحنولوگيالىق ءدالىز سانالادى، – دەلىنگەن مينيسترلىك تاراتقان اقپاراتتا.

نەگىزىنەن قارجى مينيسترلىگى وتكىزۋ پۋنكتتەرىن جاڭعىرتۋ، كەدەندىك راسىمدەردى تسيفرلاندىرۋ جانە اۆتوماتتاندىرۋ، شەكارا ماڭى سەرۆيسىن دامىتۋ جونىندەگى شارالار كەشەنىن كەزەڭ-كەزەڭىمەن ىسكە اسىرۋدا.

بىلتىردان باستاپ 20 مودۋلمەن بىرىڭعاي تسيفرلىق پلاتفورما "كەدەن" جۇيەسى ەنگىزىلسە، بۇگىندە ونىڭ 13 ءمودۋلى جۇمىس ىستەپ تۇر. دەكلاراتسيالاۋدىڭ، فورماتتى-لوگيكالىق باقىلاۋدىڭ ەلەكتروندىق فورماتى ەنگىزىلدى، "قورعاس" شىحو-دا تاۋارلاردى ەسەپكە الۋ تولىق تسيفرلاندىرىلعان. ينتەگراتسيالانعان باقىلاۋ قىزمەتتەرى اۆتوماتتاندىرىلدى، ترانزيت ءراسىمى جەدەلدەتىلدى، جەكە كابينەت ارقىلى قاشىقتىقتان ءوزارا ءىس-قيمىل قامتاماسىز ەتىلدى.

ەرەكشە ايتا كەتەرلىك جايت، وتكىزۋ مۇمكىندىگى 2022 جىلى 640 مىڭ كولىك قۇرالى بولسا، 2024 جىلى بۇل 1,4 ميلليونعا دەيىن ارتقان.

Abai.kz