ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەڭبەك كىتاپشاسىنىڭ ەندى قاجەت ەمەس ەكەنىن ايتتى.

بۇل ەسكىدەن ءبارىمىز بىرگە ارىلۋىمىز كەرەك. بۇگىندە جاستار ءۇشىن ەڭبەك شارتىنا قول قويىپ، ونى ەڭبەك شارتتارىن ەسەپكە الۋدىڭ بىرىڭعاي جۇيەسىنە ەلەكتروندى تۇردە تىركەپ، زەينەتاقى جارنالارىن اۋدارۋ جەتكىلىكتى. سەبەبى ەڭبەك ءوتىلى ءسىزدىڭ زەينەتاقى جۇيەسىنە قاتىسۋىڭىز ارقىلى ەسەپتەلەدى، – دەپ جاۋاپ بەردى سۆەتلانا جاقىپوۆا.

ءمينيستردىڭ ايتۋىنشا، قازىرگى زامان تالاپتارىنا ساي ەڭبەك قاتىناستارى تولىقتاي تسيفرلىق فورماتتا جۇرگىزىلەدى. بۇدان بىلاي ازاماتتاردىڭ ەڭبەك ءوتىلى ەلەكتروندى ەڭبەك شارتتارى مەن بىرىڭعاي ەسەپ جۇيەسىنە ەنگىزىلگەن زەينەتاقى جارنالارى ارقىلى ەسەپتەلەدى.

ەڭبەك كىتاپشاسى – ەسكىرگەن قۇجات. قازىرگى تاڭدا ونىڭ قاجەتى جوق. قالاعان ادام ونى ەستەلىك رەتىندە ساقتاپ قالا الادى، بىراق زاڭ جۇزىندە ول تالاپ ەتىلمەيدى، دەدى سۆەتلانا جاقىپوۆا.

بۇدان بىلاي جۇمىسقا ورنالاسۋ كەزىندە ەڭبەك كىتاپشاسىن كورسەتۋ نەمەسە تولتىرۋ مىندەتتى ەمەس. ەڭبەك شارتى ەلەكتروندى تۇردە راسىمدەلەدى. ەگەر جۇمىس بەرۋشى قىزمەتكەر ءۇشىن تۇراقتى تۇردە زەينەتاقى جارنالارىن اۋدارىپ وتىرسا، ەڭبەك ءوتىلى اۆتوماتتى تۇردە ەسەپتەلىپ وتىرادى.

مينيستر بۇل شەشىم ەڭبەك قىزمەتىن تىركەۋ ءراسىمىن ەداۋىر جەڭىلدەتىپ، ارتىق قاعازباستىلىقتان ارىلۋعا جول اشاتىنىن اتاپ ءوتتى.

Abai.kz