ەلىمىزدە مەديتسينا كادرلارىنىڭ تاپشىلىعى بىرتىندەپ تومەندەدى.

دەرەكتە 2023 جىلمەن سالىستىرعاندا دارىگەرلەر تاپشىلىعى 20 پايىزعا، ال ورتا مەديتسينالىق پەرسونال تاپشىلىعى 7 پايىزعا قىسقارعانى اتاپ وتىلگەن.

مينيسترلىك مالىمەتىنشە، قازىرگى تاڭدا قازاقستاندا دارىگەرلەرمەن جانە ورتا مەديتسينا قىزمەتكەرلەرىمەن قامتاماسىز ەتۋ كورسەتكىشى ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرىنىڭ ورتاشا دەڭگەيىنەن اسىپ تۇسەدى.

– 2025 جىلى مەديتسينالىق جوعارى وقۋ ورىندارىن 11 626 تۇلەك بىتىرەدى دەپ كۇتىلۋدە. ولاردىڭ ۇشتەن ەكىسى وڭىرلەرگە ءبولىنىپ، جەرگىلىكتى مەديتسينالىق ۇيىمدارعا جۇمىسقا ورنالاسادى، – دەپ كورسەتىلگەن حابارلامادا.

كادر جەتىسپەۋشىلىگىن ازايتۋ ءۇشىن مەملەكەت تاراپىنان قولداۋ شارالارى قابىلدانىپ جاتىر. ماسەلەن، سۇرانىسقا يە ماماندىقتار بويىنشا اۋىلدىق جەرگە بەس جىلدان استام مەرزىمگە جۇمىس ىستەۋگە جىبەرىلگەن 254 دارىگەر جالپى سوماسى 2,1 ملرد تەڭگەدەن اساتىن كوتەرمە جاردەماقى (100 ەتج مولشەرىندە) العان.

سونداي-اق، مەديتسينالىق ءبىلىم الاتىن ستۋدەنتتەرىنىڭ ستيپەندياسى ورتا ەسەپپەن 20 پايىزعا ۇلعايتىلدى.

– وڭىرلىك سۇرانىستى ەسكەرە وتىرىپ، باكالاۆريات پەن رەزيدەنتۋراعا 5 مىڭنان استام ءبىلىم بەرۋ گرانتى ءبولىندى. سونىمەن قاتار، رەزيدەنتۋرا شەڭبەرىندە "پەدياتريا" باعىتى مەن بالالارعا ارنالعان 14 جاڭا ماماندىق ەنگىزىلگەن. بۇل شارالار بىلىكتى مەديتسينالىق كادرلاردىڭ تاپشىلىعىن جويۋعا مۇمكىندىك بەرەدى – دەلىنگەن مينيسترلىك اقپاراتىندا.