جاڭا وقۋ جىلىنان باستاپ ەلىمىزدەگى بارلىق ءبىلىم بەرۋ ۇيىمدارىندا، سونىڭ ىشىندە جەكەمەنشىك مەكتەپتەردە دە تاربيە جۇمىسى «ادال ازامات» اتتى ءبىرتۇتاس باعدارلاما نەگىزىندە جۇرگىزىلەدى.

بۇل – بۇرىن جۇزەگە اسىرىلعان «ءبىرتۇتاس تاربيە» تۇجىرىمداماسىنىڭ جالعاسى، بىراق مازمۇنى جاڭارتىلىپ، مەملەكەت باسشىسىنىڭ «ادال ازامات – ادال ەڭبەك – ادال تابىس» يدەولوگيالىق قاعيداسىمەن ۇندەستىرىلگەن.

باعدارلامانىڭ ۇيلەستىرۋشىسى ى. التىنسارين اتىنداعى ۇبا مالىمەتىنشە، قر وقۋ-اعارتۋ مينيسترلىگىنىڭ 2025 جىلعى 26 مامىرداعى №123 بۇيرىعىمەن رەسمي تۇردە جاڭا اتاۋى بەكىتىلگەن.

ونىڭ ماقساتى– ادال، ەڭبەكقور، ەلجاندى ازاماتتار تاربيەلەۋ. تاربيە جۇيەسى جالپىۇلتتىق قۇندىلىقتارعا نەگىزدەلىپ، مەكتەپ، اتا-انا جانە قوعام اراسىنداعى بايلانىستى نىعايتۋعا باعىتتالادى.

العاش رەت بۇل باعدارلاما جەكەمەنشىك مەكتەپتەر ءۇشىن دە مىندەتتى بولماق. بۇل تاربيە جۇمىسىنىڭ ەل كولەمىندە ءبىرىزدى ستاندارتپەن جۇرگىزىلۋىنە جانە بارلىق وقۋشىلار ءۇشىن تەڭ ورتا قالىپتاستىرۋىنا مۇمكىندىك بەرەدى.

بارلىق مەكتەپتەر ءۇشىن بىرىڭعاي ۆيزۋالدى ستاندارت – برەندبۋك ازىرلەنەدى. مەكتەپتىڭ ىشكى جانە سىرتقى كەلبەتى ۇلتتىق تاربيەلىك قۇندىلىقتار مەن مادەنيەتتى بەينەلەيتىن ورتاعا اينالادى.

تاربيە جۇمىسىن جۇزەگە اسىرۋدا بارلىق تاراپتاردىڭ ءوزارا بىرلەسە قىزمەت اتقارۋىنا ەرەكشە كوڭىل بولىنەدى. مەكتەپتەردەگى تاربيە ءىسى مەملەكەتتىك ورگاندارمەن، قۇقىق قورعاۋ، دەنساۋلىق ساقتاۋ، ىشكى ساياسات سالاسىنداعى قۇرىلىمدارمەن تىعىز جۇرگىزىلەدى.

اي سايىن بەلگىلەنگەن تاقىرىپتار ساباق پەن سىنىپتان تىس ءىس-شارالاردى ءبىر-بىرىمەن ساباقتاستىرادى. مىسالى: ادىلدىك، ەڭبەكقورلىق، پاتريوتيزم سىندى قۇندىلىقتار وقۋ پروتسەسىنىڭ وزەگىنە اينالماق. وسى باعىتتا مەكتەپ ومىرىنە «ونەگەلى 15 مينۋت»، كۇي اۋەنىمەن قوڭىراۋ سوعۋ، ۇلتتىق ويىندار سەكىلدى جاڭا فورماتتار ەنگىزىلەدى. سونىمەن قاتار، وقۋشىنىڭ مەكتەپ قابىرعاسىنان تىس ومىرلىك تاجىريبەسىن بايىتۋعا دا ەرەكشە كوڭىل بولىنەدى.

بۇعان دەيىن ىسكە اسقان «ءبىرتۇتاس تاربيە» باعدارلاماسى اياسىندا «قامقور» (ەكولوگيا جانە ۆولونتەرلىك), «ەڭبەگى ادال – جاس ورەن» (ەڭبەككە باۋلۋ جانە ماماندىققا باعدار), «Smart Bala» (IT جانە يننوۆاتسيالىق ويلاۋدى قولداۋ), «شابىت» (ونەر مەن مادەنيەت ارقىلى رۋحاني دامۋ), «ۇشقىر وي الاڭى» (پىكىرسايىس پەن زياتكەرلىك ويىندار), «بالالار كىتاپحاناسى» (وقۋ ساۋاتتىلىعى مەن كىتاپ مادەنيەتىن دامىتۋ) سەكىلدى التى ءىرى جوبا جۇزەگە اسقان بولاتىن.

سونىمەن بىرگە، بۋللينگتىڭ، قۇقىقبۇزۋشىلىق پەن بالالار اراسىنداعى قاۋىپتىڭ الدىن الۋعا باعىتتالعان جوبالار ءوز جۇمىسىن جالعاستىرادى. ولار:«تسيفرلىق الەمدە قاۋىپسىز قادام»، «بۋللينگتەن قورعان!»، «قاۋىپسىز قوعام».

بۇل باعدارلاما – ەلىمىزدىڭ بارلىق مەكتەپتەرىندە ءبىرتۇتاس تاربيەلىك ورتا قالىپتاستىرۋعا باعىتتالعان ماڭىزدى قادام.