تۇركيا سوتى ىستامبۇل مەرى ءارى وپپوزيتسيا كوشباسشىسى ەكرەم يماموگلۋعا 20 ايعا باس بوستاندىعىنان ايىرۋ جازاسىن تاعايىندادى. بۇعان قالا پروكۋرورى اكين گيۋرلەكتى قورلاعانى تۋرالى ءىس سەبەپ بولعان. وقيعا 2025 جىلدىڭ قاڭتارىندا بولعان، الايدا يماموگلۋ ناقتى نە دەگەنى رەسمي تۇردە جاريالانبادى. سوت ساياساتكەردى قىزمەت بابىندا جۇرگەن پروكۋروردى قورلاپ، قوقان-لوقى كورسەتتى دەپ ايىپتادى. ال «قۋدالاۋ» بابى بويىنشا تاعىلعان ايىپ نەگىزسىز دەپ تانىلدى.

ءوز كەزەگىندە يماموگلۋ تاعىلعان ايىپتاردى جوققا شىعارىپ، ءىستىڭ ساياسي استارى بارىن جانە الداعى پرەزيدەنت سايلاۋى قارساڭىندا ونىڭ ىقپالىنىڭ ارتۋىمەن بايلانىستى ەكەنىن ايتتى. ول 19 ناۋرىزدا رەسپۋبليكالىق حالىق پارتياسىنداعى (رحپ) ىشكى پارتيالىق داۋىس بەرۋگە ساناۋلى كۇن قالعاندا تۇتقىندالدى. سوعان قاراماستان، پارتيا ونى 2028 جىلعى سايلاۋعا كانديدات رەتىندە ۇسىندى.

پرايمەريزگە رەكوردتىق 15 ميلليون ادام قاتىسىپ، ونىڭ 13,2 ميلليونى يماموگلۋعا قولداۋ ءبىلدىردى. وسىلايشا ول وپپوزيتسيا ىشىندەگى ءسوزسىز كوشباسشىعا جانە رەدجەپ تايىپ ەردوعاننىڭ ناقتى قارسىلاسىنا اينالدى.

الايدا بۇل ۇكىمنەن بولەك، مەرگە قاتىستى تاعى بىرنەشە قىلمىستىق ءىس قوزعالعان. ول جەمقورلىق، قىلمىستىق توپ قۇرۋ، جەكە دەرەكتەردى زاڭسىز جيناۋ جانە كۇرد سودىرلارىمەن بايلانىس ورناتتى دەگەن كۇدىككە ءىلىندى. بۇل ىستەر بويىنشا سوت وتىرىستارى ءالى باستالعان جوق.

ۇكىم شىققاننان كەيىن ىستامبۇل مەن تۇركيانىڭ وزگە دە قالالارىندا جاپپاي نارازىلىقتار ءورشىدى. يماموگلۋدىڭ مىڭداعان جاقتاسى كوشەگە شىقتى. ولار بۇل سوت ءىسىن ساياسي قۋدالاۋ دەپ باعالاپ، مەردى دەرەۋ بوساتۋدى تالاپ ەتتى.

بۇعان دەيىن تۇركياداعى نارازىلىقتاردىڭ ارتىندا كىمدەر تۇرۋى مۇمكىن ەكەنىن ۇلىسمەديا سارالاپ كورگەن بولاتىن.