"قازاۆتوجول" ۇلتتىق كومپانياسىنىڭ جامبىل وبلىسىنداعى فيليالىنا قاتىستى پوليتسيا سوتقا شاعىم قالدىردى. بۇعان سەبەپ "الماتى-تاشكەنت-تەرمەز-2" اۆتوجولىنىڭ "كۇيىك ەسكى اسۋى" بولىگىندەگى جول قاۋىپسىزدىگى تالاپتارىنىڭ ساقتالماۋى. 

2025 جىلعى اقپاندا اكىمشىلىك پوليتسيا ينسپەكتورى اتالعان جول ۋچاسكەسىنىڭ تەحنيكالىق جاعدايىن تەكسەرگەن. تەكسەرۋ ناتيجەسىندە جول قاۋىپسىزدىگىنە قاتىستى 13 زاڭبۇزۋشىلىق انىقتالىپ، ولاردى جويۋ تۋرالى نۇسقاما بەرىلگەن. الايدا، اتالعان كەمشىلىكتەر جويىلماعان.

سوت وتىرىسىندا "قازاۆتوجول" فيليالىنىڭ وكىلى وزدەرىنە تاعىلعان ايىپپەن كەلىسپەيتىنىن جەتكىزدى. ونىڭ ايتۋىنشا، بۇل جول ۋچاسكەسىنە جاۋاپتى مەردىگەر ۇيىم، ال ۇلتتىق كومپانيا بۇل قۇقىقبۇزۋشىلىققا جاۋاپتى ەمەس. وسىعان بايلانىستى ءىس جۇرگىزۋدى توقتاتۋدى سۇرادى.

الايدا اكىمشىلىك پوليتسيا ينسپەكتورى جولدا جول-كولىك وقيعالارى ءجيى تىركەلەتىنىن، جۇرگىزۋشىلەر تاراپىنان كوپ شاعىم تۇسەتىنىن ايتىپ، جاۋاپكەرشىلىككە تارتۋدى سۇرادى.

سوتتا فيليالدىڭ كىناسى تەكسەرۋ اكتىلەرىمەن، نۇسقاما، انىقتاما، حاتتامالار جانە وزگە دە قۇجاتتارمەن دالەلدەندى.

سوت "قازاۆتوجول" فيليالىن كىنالى دەپ تانىپ، وعان 500 ايلىق ەسەپتىك كورسەتكىش مولشەرىندە، ياعني 1 ميلليون 966 مىڭ تەڭگە ايىپپۇل سالدى. رۇقسات ەتىلگەن قىزمەت تۇرلەرىن توقتاتۋ نەمەسە شەكتەۋ شارالارى قولدانىلعان جوق.

Abai.kz