مەملەكەتتىڭ گۇلدەنۋى، قوعامنىڭ دامۋى ءار ادامنىڭ ءوز ىسىنە دەگەن جاۋاپكەرشىلىگى مەن سۇيسپەنشىلىگىنە جانە اق-ادال ەڭبەگىنە بايلانىستى. سول سەبەپتى دە پرەزيدەنت پارمەن بەرىپ، بيىلعى جىلدى – «جۇمىسشى ماماندىقتار جىلى» دەپ جاريالادى.

پرەزيدەنت: ەڭبەككەر ادام قاشاندا قۇرمەتتى! 

مەملەكەت باسشىسى: «ءبىز جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز! ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك»، – دەگەندى شەگەلەپ ايتتى.

شىندىعى سول – ادامدى ادام ەتكەن – ەڭبەك! ادىلدىك سالتانات قۇرىپ، ادالدىقتىڭ اتى شىعا باستاعان «جاڭا قازاقستاندا» ەڭبەك ادامىن – قوعامنىڭ لوكوماتيۆى دەپ تانىتۋ، ەڭبەكقور ادامدار مەن كاسىبي بىلىگى جوعارى مامانداردى جاس ۇرپاققا ۇلگە ەتىپ كورسەتۋ تەندەنتسياسى قالىپتاسىپ كەلەدى.

قر ۇلتتىق ستاتيستيكا بيۋروسىنىڭ 2025 جىلعى ەسەپ-قيسابىنا كوز جۇگىرتسەك، ەلىمىزدە 539 مىڭنىڭ ۇستىندە كاسىپكەرلىك سۋبەكتىسى تىركەلسە، ونىڭ 6,8 مىڭى ورتا، 2,4 مىڭى ءىرى كاسىپكەرلىك سۋبەكتىلەرى سانالادى. سونىڭ ىشىندە مىڭداعان ادامدى جۇمىسپەن قامتىپ وتىرعان ءىرى كاسىپكەرلىك سۋبەكتىلەرىنە توقتالساق، ەلىمىزدە بۇگىنگە تاڭدا 1,2 مىڭ مەملەكەتتىك، 1,01 مىڭ جەكە، 35 ورتاق كاسىپكەرلىك سۋبەكتىسى تىركەۋلى ءھام جۇمىس ىستەپ تۇر ەكەن.

سۋرەت: erg.kz.

الپاۋىت «ERG» ءھام 67 مىڭ جۇمىسشى

«ەرنازاردىڭ سەگىز ۇلى – ءبىر توبە، ەر توستىگى – ءبىر توبە»، - دەگەندەي، قازاقستانداعى ءىرىلى-ۇساقتى كاسىپكەرلىك سۋبەكتىلەرىنىڭ ىشىندە – «ERG» ءبىر توبە ەكەنى داۋسىز. بۇلاي دەۋىمىزدىڭ باستى سەبەبى – «ERG» – ەلىمىزدەگى الپاۋىت كومپانيانىڭ ءبىرى. ءتۇرلى-ءتۇستى مەتالدار وندىرەتىن بۇل كومپانيانىڭ قۇرامىنا «ساكولوۆ-سارىباي»، «قازپروم»، «قازاقستان-الليۋميني» سياقتى ۇلكەن ءوندىرىس وشاقتارى كىرەدى. قازىرگى تاڭدا بۇل كومپانيانىڭ 67 مىڭنان استام جۇمىسشىسى بار. «ERG» ەلىمىزدىڭ كەيبىر مونوقالالارىنداعى تۇرعىنداردى تۇتاستاي جۇمىسپەن قامتىپ وتىرعان كومپانيا.

ءسوزىمىز سۇيىق شىقپاسى ءۇشىن، ساندەرەك ۇسىنايىق: «Eurasian Resources Group» (ERG) – تابيعي رەسۋرستاردى ءوندىرىپ، وڭدەيتىن، ەنەرگەتيكا، لوگيستيكا جانە ماركەتينگ سالالارىندا تولىق بىرىكتىرىلگەن، الەمدەگى ەڭ ءىرى ارتاراپتاندىرىلعان كومپانيالاردىڭ ءبىرى.

«ERG» قازاقستانداعى جۇمىس ىستەپ تۇرعان وندىرىستەردى دامىتۋعا جانە جاڭا كاسىپ ورىندارىن قۇرۋعا ۇزىن-ىرعاسى 14,6 ملرد دوللاردىڭ ينۆەستيتسياسىن سالسا, الەۋمەتتىك باعىتتاعى ينۆەستيتسيالارىنىڭ كولەمى 1,1 ملرد دوللاردى قۇراعان.

«ERG» كاسىپورىندارى – ءوز سالاسى بويىنشا ەڭ ءىرى جۇمىس بەرۋشىلەردىڭ ءبىرى. «ERG-ءدىڭ» نەگىزگى اكتسيونەرى (40%) قازاقستان ۇكىمەتى.

سايكەسىنشە، ەڭبەك ادامى دەگەن تاقىرىپتى ءسوز ەتكەندە، ەڭ ءىرى جۇمىس بەرۋشىلەردىڭ ءبىرى سانالاتىن «ERG» كاسىپورىندارىن اينالىپ وتە المايمىز.

يبراگيموۆ: ەلىمىزدى ەكونوميكالىق جانە مادەني باعىتتا دامىتۋ ماڭىزدى!

جۋىردا شەتەلدىك «Mەrkur.lu» سايتى «ERG» ۇيىمداستىرعان «جۇمىسشى ماماندىقتار جىلى» تۋرالى جازىپتى.

«Eurasian Resources Group» (ERG) دەمەۋشىلىك جاساپ، «Astana Opera» مەملەكەتتىك اكادەميالىق وپەرا جانە بالەت تەاترى ەلىمىزدىڭ ءىرى ونەركاسىپ قالالارىنا گاسترولدىك ساپار ۇيىمداستىرعان ەكەن. تۋر پاۆلودار، اقتوبە، حرومتاۋ جانە رۋدنىي قالالارىندا وتكەن. بۇل قالالاردا «ERG» كاسىپورىندارى ورنالاسقان. جەرگىلىكتى قاۋىم مەن ءوندىرىس ورىندارىنىڭ جۇمىسشىلارى بار، جالپى سانى 7 مىڭعا جۋىق ادامعا كونسەرتتىك باعدارلامالار ۇيىمداستىرىلعان.

«ERG» كومپانياسىنىڭ باس ديرەكتورى جانە ديرەكتورلار كەڭەسىنىڭ توراعاسى شۋحرات يبراگيموۆ سونىمەن قاتار «Astana Opera» قامقورشىلار كەڭەسىنىڭ مۇشەسى.

«ERG-دەگى» جۇمىسىمىزدىڭ ماڭىزدى بولىگى – قازاقستاندى تەك ەكونوميكالىق تۇرعىدان عانا ەمەس، سونىمەن قاتار الەۋمەتتىك جانە مادەني باعىتتا دامىتۋ. «Astana Opera» تەاترىنىڭ جارقىن جوبالارىن قولداۋ – ءبىز ءۇشىن ءاردايىم باسىمدىق»، – دەيدى شۋحرات يبراگيموۆ.

وسى رەتتە ءبىز «ERG» ديرەكتورلار كەڭەسىنىڭ توراعاسى شۋحرات يبراگيموۆپەن بىرگە ەلىمىزدەگى جۇزدەگەن اق ادال ەڭبەك ەتىپ، وتباسىن اسىراپ وتىرعان ءىرى كاسىپورىنداردى ارالاپ كوردىك. ونداعى ەڭبەك ادامدارىنىڭ جاي-كۇيىمەن، جۇمىس بارىسىمەن تانىسىپ قايتتىق.

سۋرەت: erg.kz.

اقسۋ ساپارى: اياداي قالانىڭ جاھاندىق پوتەنتسيالى

ساپارىمىز قارا ەرتىستىڭ جاعاسىندا ورنالاسقان اقسۋدان باستالدى (پاۆلودار وبلىسى). اقسۋدىڭ جالپى تاريحى – وندىرىستەن باستالادى. انىعى ەكىباستۇزداعى كومىر كەنىنىڭ اشىلۋىمەن تىعىز بايلانىستى. بۇگىندە قالانىڭ جان سانى 72 مىڭ ادامنان اسادى (2023 جىلعى ەسەپ).

بۇگىنگى اقسۋ — بۇل پاۆلودار وبلىسىنداعى ونەركاسىپتىك قالا. قالانىڭ وندىرىستىك ينفراقۇرىلىمىن ەكى الىپ كاسىپورىن: اقسۋ فەرروقورىتپا زاۋىتى مەن ەەك ااق ەلەكتر ستانتسياسى قۇرايدى.

بۇل قوس كاسىپورىن دا «ERG» قۇرامىنا كىرەتىن كاسىپورىندار. اقسۋ فەرروقورىتپا زاۋىتىندا جالپى سانى 6520 ادام جۇمىس ىستەسە، «ەۋروازياتتىق ەنەرگەتيكالىق كورپوراتسياسى» 4528 ادامدى جۇمىسپەن قامتىپ وتىر.

سۋرەت: erg.kz.

ال ءبىز ساپارىمىزدى اقسۋ فەرروقورىتپا زاۋىتىنا جاسادىق. بۇل – الەمدەگى ەڭ ءىرى فەرروقورىتپا وندىرۋشىلەرىنىڭ ءبىرى. ىرگەتاسى 1968 جىلى قالانعان اتالمىش كاسىپورىندا جىلىنا 1,1 ملن توننادان اساتىن ءونىم شىعارىلادى. شىعارىلعان ءونىم تۇرلەرى ىشكى نارىقتى عانا قامتىپ قويماي، الىس شەت ەلدەرگە دە ەكسپورتتالۋدا. قازىرگى تاڭدا زاۋىت ءوندىرىستى جاڭعىرتىپ، قۋاتتىلىعىن ارتتىرۋدى جۇزەگە اسىرۋدا. سول ماقساتتا №6 بالقىتۋ تسەحىن رەننوۆاتسيالاپ، تولىق گەرمەتيزاتسيالانعان №64 فەرروقورىتپا پەشىن ىسكە قوسقان.

«پەشتىڭ كۇمبەزى وقشاۋلانىپ، بارلىق فەرروقورىتپا گازى جينالىپ، كادەگە جاراتىلادى، ال ونىڭ ءبىر بولىگى شيكىزاتتى جانە شومىشتەردى الدىن الا جىلىتۋعا پايدالانىلادى. بۇل يننوۆاتسيا بالقىتۋ كەزىندەگى ەلەكتر ەنەرگياسىن تۇتىنۋدى ازايتىپ، مەتاللدى تەحنولوگيالىق ىدىستاردان تيىمدىرەك الۋعا مۇمكىندىك بەرەدى»، - دەيدى كاسىپورىن باسشىلىعى.

اتالعان كاسىپورىن جۇمىسشىلارىمەن جولىعىپ، ەڭبەك ادامدارىن ماراپاتتاعان «ERG» ديرەكتورلار كەڭەسىنىڭ توراعاسى شۋحرات يبراگيموۆ: «الەمدەگى قازىرگىدەي ەكونوميكالىق داعدارىس قارقىن الىپ تۇرعان تۇستا، ءبىزدىڭ زاۋىت جۇمىسكەرلەرى سەكىلدى بىلىكتى مامانداردىڭ تىنىمسىز ءارى قاجىرلى ەڭبەگىنىڭ ارقاسىندا ەلىمىزدىڭ ەكونوميكاسى دامۋدا. ءادىلىن ايتقاندا، قازىر «ERG-دە» ەلىمىزدەگى ەڭ كاسىبي، ەڭ بىلىكتى ماماندار قىزميەت ەتۋدە»، - دەدى.

«ERG» باسشىلىعى ءھام ەڭبەككەرلەر تاندەمى

وسى تۇستا تاقىرىپقا تۇزدىق رەتىندە ايتا كەتەيىك: «ERG» - ەلىمىزدەگى ونداعان كاسىپورىننىڭ باسىن بىرىكتىرىپ وتىرعان الپاۋىت كاسىپورىن ەكەنىن جوعارىدا ايتتىق. دەسە دە، «ERG» تىزگىنىن ۇستاعان ەسكى باسشىلىق قاراپايىم جۇمىسشىلارمەن مۇنشالىق ەتەنە ارالاسىپ كەتپەگەن ەدى. ونى وسى جولى شۋحرات يبراگيموۆپەن جولىققان جۇمىسشىلاردىڭ وزدەرى دە اقتارىلىپ ايتتى.

«شۋحرات مىرزانىڭ وسىعان دەيىن سۇحباتىن وقىپ تانىستىق. ەۋرازيا توبىنا كىرەتىن كومپانيالار مەن ءوندىرىستى مودەرنيزاتسيالاۋ،  قازاقستاندا ءوندىرىستى دامىتۋ تۋرالى جوسپارى كوڭىلگە قونىمدى. ءبىز وسى ەلدىڭ ازاماتىمىز، وسى جەردە ادال ەڭبەك ەتىپ، وتباسىمىزدى اسىراپ وتىرمىز. ارينە، مۇنداي باستامالار بىزگە ۇنايدى»، - دەيدى زاۋىت جۇمىسشىسى.

«ERG-ءدىڭ» ەسكى باعىتىن وزگەرتىپ، جاڭا وندىرىستەر اشۋ ماقساتىندا ءتۇرلى جوبالارعا اقشا قۇيىپ وتىرعانىن ءوزىمىز دە كوزبەن كورىپ وتىرمىز. سونىڭ ءبىر دالەلى – ءبىزدىڭ زاۋىتتاعى مودەرنيزاتسيالىق جۇمىستار. جاسىراتىنى جوق، ش.يبراگيموۆ مىرزانىڭ ءبىزدى قاراپايىم جۇمىسشى دەپ ساناماي، ورتامىزعا ءوزى كەلىپ، بولاشاق جوبا-جوسپارلارىمەن ءبولىسىپ وتىرعانى، ءبىزدىڭ جۇمىسشىلارعا قوسىمشا ىنتا بەرەدى»، - دەيدى بالقىتۋ تسەحىنىڭ مامانى.

سۋرەت: erg.kz.

پاۆلودار ساپارى: 10 جاس مامانعا ءۇي بەرىلدى

ءارى قاراي ساپارىمىز پاۆلودار قالاسىنداعى الليۋميني زاۋىتىندا جالعاستى.

جالپى پاۆلودار وبلىسىندا «ERG-ءدىڭ» 7 كاسىپورىنى ورنالاسقان. بۇل كاسىپورىندار جيىنتىعى 30 مىڭعا جۋىق ادام جۇمىس جاسايدى.

ال ءبىز جۇمىس بارىسىمەن تانىسىپ قايتقان پاۆلودارداعى الليۋميني زاۋىتى – جىلىنا 1.4 ملن توننا Al2O3 اليۋميني توتىعىن وندىرەدى ەكەن. ىرگەتاسى 1964 جىلى قالانعان بۇل كاسىپورىندا ۇزىن-سانى 8 مىڭعا جۋىق ادام جۇمىسپەن قامتىلعان.

قۇرامىنا پاۆلودار اليۋميني زاۋىتى، جەو-1, كراسنووكتيابر كەنىش باسقارماسى (قوستاناي وبلىسى), «كەرەگەتاس» اكتاس كەنىشى (پاۆلودار وبلىسى) كىرەتىن «قازاقستان ءاليۋمينيى» اق – قازاقستاندا اليۋميني توتىعىن شىعاراتىن، ءاليۋمينيى ءوندىرىسى ءۇشىن شيكىزات وندىرەتىن بىردەن-ءبىر كاسىپورىن. ول سونداي-اق، پاۆلودار وبلىسىنداعى ءىرى جۇمىس بەرۋشى سانالادى.

«ERG-ءدىڭ» ديرەكتورلار كەڭەسىنىڭ توراعاسى شۋحرات يبراگيموۆ مىرزا اتالمىش زاۋىتقا جاساعان ساپارى بارىسىندا زاۋىت ۇجىمىمەن كەزدەسىپ، الدا كەلە جاتقان مەتاللۋرگتەر كۇنىمەن قۇتتىقتادى. جۇمىسشىلاردى ىنتالاندىرۋ ءھام ەڭبەكتەرىن باعالاۋ ماقساتىندا جاس ماماندارعا 10 بىردەي ءۇيدىڭ كىلتىن تابىستادى.

«ERG» - بۇل جاي عانا كومپانيا، كاسىپورىن ەمەس، بۇل – الىپ جانۇيا. مۇندا ەڭبەك ەتەتىن ءاربىر ادام – ۇلكەن ورگانيزمنىڭ ءبىر بولشەگى. ءبىز ءاربىر ەڭبەك ادامىنىڭ ادال ەڭبەگىن لايىقتى باعالاۋدى باسىمدىق سانايمىز. سول سەبەپتى دە، ارىپتەستەرىمىزدى قوسىمشا ىنتالاندىرۋ ماقساتىندا 10 ءۇيدىڭ كىلتىن تابىستاعاندى ءجون سانادىق»، - دەيدى شۋحرات يبراگيموۆ.

سۋرەت: پاۆلودار وبلىسى اكىمدىگىنەن الىندى.

وبلىس اكىمى: ءاربىر جۇمىسشى ءوڭىر ەكونوميكاسىنا ەلەۋلى ۇلەس قوسۋدا

تاقىرىپقا تۇزدىق رەتىندە ايتا كەتەيىك: وتكەن اپتادا ەۋرازيالىق توپ (ERG) قۇرامىنداعى – «ERG Service» قىزمەتكەرلەرى دە كوپ جىلعى ادال ەڭبەكتەرى، ءوڭىردىڭ مەتاللۋرگيا جانە ماشينا جاساۋ سالاسىنىڭ دامۋىنا قوسقان ۇلەستەرى ءۇشىن مەملەكەتتىك جانە كورپوراتيۆتىك ناگرادالارمەن ماراپاتتالعان ەدى.

اتاپ ايتقاندا: كومپانيانىڭ ۇزدىك قىزمەتكەرلەرى III دارەجەلى «ەڭبەك داڭقى» توسبەلگىلەرىمەن جانە «ERG ادالداعى ءۇشىن»، «وندىرىستىك سالاداعى سىڭىرگەن ەڭبەگى ءۇشىن» ت.ب. ناگرادالارمەن ماراپاتتالدى. كومپانيا باسشىلىعى جوندەۋشى سلەسارلاردان باستاپ، ساپا باقىلاۋشىلارى مەن دانەكەرلەۋشىلەرگە دەيىن جاڭا «JAC» اۆتوكولىكتەرى مەن پاتەر كىلتتەرىن تابىستاپ، ءاربىر ەڭبەك ماماندىعىنىڭ ماڭىزدىلىعىن جانە كومپانياداعى الەۋمەتتىك قولداۋدىڭ جوعارى دەڭگەيىن اتاپ وتكەن.

كاسىپورىن قىزمەتكەرلەرىن قۇتتىقتاي بارعان پاۆلودار وبلىسىنىڭ اكىمى اسايىن بايحانوۆ: «ERG» - بۇل مىڭداعان بىلىكتى مامان، مىڭداعان تابىستى ىسكە اسىرىلعان جوبالار جانە ءوڭىر ەكونوميكاسىنا ەلەۋلى ۇلەس. ەڭبەك ۇجىمىن ەرەكشە اتاپ وتكەن ءجون. سىزدەردىڭ قاجىرلى ەڭبەكتەرىڭىز جوعارى قۇرمەتكە لايىق. سىزدەر قازاقستاندا كۇردەلى تەحنيكالار جاساپ، يننوۆاتسيالاردى ەنگىزۋدەسىزدەر»، - دەگەن بولاتىن.

سۋرەت: erg.kz.

اقتوبە ساپارى: الەمدىك رەكورد ورناتقان كاسىپورىن

پاۆلودارداعى زاۋىتتاردان كەيىن، ساپارىمىز ەلىمىزدىڭ باتىسىنداعى اقتوبە وبلىسىندا جالعاستى...

اقتوبە وبلىسىندا «قازحروم-عا» قاراستى اقتوبە فەرروقورىتپا زاۋىتى ورنالاسقان. بۇل – قازاقستاننىڭ قارا مەتاللۋرگياسىنىڭ تۇڭعىشى دەسەك قاتەلەسپەيمىز.

ىرگەتاسى 1943 جىلى قۇرىلعان بۇل زاۋىت بۇگىندە بۇل جىلىنا 700 مىڭ توننادان استام فەرروقورىتپا وندىرەتىن، تۇراقتى دامىپ كەلە جاتقان زاماناۋي كاسىپورىن.

«اقتوبە فەرروقورىتپا زاۋىتىنىڭ ەڭ جاڭا قۇرىلىمى – №4 بالقىتۋ تسەحى. 2014 جىلى ىسكە قوسىلعان بۇل تسەحتىڭ ارقاسىندا زاۋىت تۇراقتى توق پەشتەرىن دامىتۋدا الەمدىك كوشباسشىلىققا ۇمتىلۋدا»، - دەيدى زاۋىت باسشىلىعى.

4280 ادام ەڭبەك ەتەتىن بۇل ۇجىم – بيىل 30 جىلدىق مەرەيتويىن اتاپ وتپەك. زاۋىت جۇمىسشىلارىمەن جولىققان «ERG-ءدىڭ» ديرەكتورلار كەڭەسىنىڭ توراعاسى شۋحرات يبراگيموۆ: «وسى رەتتە بيىل ءبىزدىڭ «قازحروم» ءۇشىن مەرەيتويلىق جىل. بىزگە 30 جىل. وسى دوڭگەلەك داتاعا وراي ءبىز ۇزىن-ىرعاسى 40 ملن تونناعا جۋىق ءونىم وندىرگەلى وتىرمىز. وسى وتىز جىلدا ءوندىرىلىپ وتىرعان 40 ملن توننا ونىمدە ءاربىر جۇمىسشىنىڭ، ءاربىر ماماننىڭ جەكە-جەكە ۇلەسى بار. بۇل 40 ملن توننا ءونىم – ەلىمىزدىڭ ەڭبەك ادامدارىنىڭ ەل ەكونوميكاسىنا قوسقان ۇلەسى دەپ باعالانادى»، - دەدى.

بيىل فەرروقورىتپا وندىرۋدەن قازاقستان رەكورد ورناتتى. ول رەكوردتى جانە ءدال وسى  اقتوبە فەرروقورىتپا زاۋىتى ورناتتى. اتالمىش كاسىپورىن – ءبىر تەحنولوگيالىق تسيكل بارىسىندا تۇراقتى توكتى ەلەكتر دوعالى پەشتەن 177 توننادان استام فەرروحروم ءوندىردى. بۇل جەتىستىك «WORLD BOOK OF RECORDS» ۇيىمىمەن رەسمي تۇردە تىركەلىپ، تاۋەلسىز ساراپشىلاردىڭ قاتىسۋىمەن قۇجاتتالدى.

اتاپ ايتقاندا: اقتوبە فەرروقورىتپا زاۋىتىنىڭ №43 پەشىنەن ءبىر تەحنولوگيالىق تسيكلدە 177 288 كەلى جوعارى كومىرتەكتى فەرروحروم الىندى.

«№4 تسەحتىڭ پەشتەرى ءوز كلاسىندا الەمدەگى ەڭ قۋاتتى پەشتەر بولىپ سانالادى. زاۋىت ماماندارى جۇزەگە اسىرعان بىرەگەي تەحنيكالىق شەشىمدەردىڭ ارقاسىندا جابدىق جوبالىق كورسەتكىشتەردەن الدەقايدا جوعارى قۋاتپەن جۇمىس ىستەپ تۇر. ورتا ەسەپپەن ءبىر پەش ءبىر تسيكلدە 50-60 توننا فەرروقورىتپا بەرسە، بۇل جولى ودان ەداۋىر ارتىق كولەم ءوندىرىلدى»، - دەيدى №43 پەش جۇمىسشىلارى.

سۋرەت: sputnik.kz.

اتالعان جاعدايعا بايلانىستى سالتاناتتى شاراعا ارنايى قاتىسقان اقتوبە وبلىسىنىڭ اكىمى اسحات شاحاروۆ: «بۇگىن ءبىز تاريحي وقيعانىڭ كۋاسى بولدىق. اقتوبە فەرروقورىتپا زاۋىتى ءونىم ءوندىرۋ كولەمى بويىنشا الەمدىك رەكورد ورناتتى. زاۋىت جۇمىسشىلارى كۇندىز-ءتۇنى، ىستىق-سۋىققا قاراماي ەڭبەك ەتىپ، ءوندىرىستى الەمدىك دەڭگەيگە شىعاردى. بۇل جەتىستىك – كاسىپورىننىڭ عانا ەمەس، بۇكىل قازاقستاندىق ونەركاسىپتىڭ حالىقارالىق ستاندارتتارعا ساي ەكەنىن جانە سول ستاندارتتاردى ءوزى ورناتىلاتىنىن كورسەتتى. بۇل – تەك اقتوبە ءوڭىرى مەن زاۋىتتىڭ ەمەس، بۇكىل قازاقستان ونەركاسىبى الەۋەتىنىڭ قۋاتتى دالەلى»، – دەدى وبلىس اكىمى.

ال «ERG» ليرەكتورلار كەڭەسىنىڭ توراعاسى شۋحرات يبراگيموۆ: «بۇل جەتىستىكتىڭ ارتىندا تەك مەتالل، ساندار مەن جابدىق قانا تۇرعان جوق، ەڭ الدىمەن، بۇل – ءبىزدىڭ ادامدار. ءبىزدىڭ ەڭبەك ادامدارىنىڭ كاسىبيلىگى، جانكەشتىلىگى مەن ءوز ىسىنە دەگەن ادالدىعى ارقاسىندا ناعىز تەحنولوگيالىق جەڭىسكە جەتىپ وتىرمىز»، - دەدى.

باستى پرينتسيپ – ەڭبەك ادامىنا جاعداي جاساۋ

تاقىرىپقا تۇزدىق: ءسوز سوڭىندا قازاقستان بويىنشا 67 مىڭعا جۋىق ادامدى تۇراقتى جۇمىس، لايىقتى ەڭبەكاقىمەن قامتىپ وتىرعان «ERG» باسشىلىعى – «ەڭبەك ادامىنا» جاعداي جاساۋ، ولاردى الەۋمەتتىك قامتاماسىز ەتۋ جانە لايىقدى دەمالىسپەن قامتۋدى باسشىلىققا الاتىنىن كورسەتەتىن 2 فاكتىنا اتاپ وتكەنىمىز ءجون.

«ERG-ءدىڭ» باستاماسى: 4 مىڭ ادام پاتەرلى بولدى...

ءبىرىنشىسى: «ERG» باسشىلىعى ءوز قىزمەتكەرلەرىنە ارناپ اقتوبە جانە قوستاناي اۋماقتارىندا قوس بىردەي دەمالىس بازاسىن ساتىپ الىپ، كۇردەلى جوندەۋدەن وتكىزگەن. بيىلدان باستاپ اتالعان دەمالىس ورىندارىندا «ERG» قۇرامىنداعى كاسىپورىنداردا ەڭبەك ەتەتىن ازاماتتار مەن ولاردىڭ وتباسى مۇشەلەرى دەمالاتىن بولادى.

ەكىنشىسى: «ERG» بىرنەشە جىل بۇرىن وتباسى بانكپەن بىرلەسىپ ارنايى تۇرعىن ۇيمەن قامتى باعدارلاماسىن ىسكە قوسقان. بۇل باعدارلاماعا «ERG» قىزمەتكەرلەرى قاتىسادى. جانە جەڭلدەتىلگەن تارتىپپپەن سۋ جاڭا نەمەسە قوسالقى نارىقتان يمپوتەكاعا تۇرعىن ءۇي الادى. قازىردىڭ وزىندە «ERG-دە» جۇمىس ىستەيتىن 4 مىڭعا جۋىق ەڭبەك ادامى اتالعان باعدارلامانىڭ يگىلىگىن كورىپ ۇلگەرگەن. ياعني، «ERG-ءدىڭ» كومەگىمەن 4 مىڭعا جۋىق ادام باسپانالى بولعان.

ءتۇيىن: شىنتۋايتىنا كەلگەندە، قوعامدا ىستەگەن ىسىنە ادال، ەڭبەكقور، جاۋاپتى، ادىلەتتى ازامات بەينەسىن ءدال وسىنداي قاراپايىم جۇمىسشىلار جاسايدى. ال ءاربىر ادال ەڭبەككەردىڭ تاباق اقى، ماڭداي تەرىن ءادىل باعالاۋ – «ERG» ۇستاناتىن باستى پرينتسيپتەردىڭ ءبىرى ەكەنىنە وسى ساپار بارىسىندا كوزىمىز جەتتى.

Abai.kz