اقپاراتتىق ورتادا قازاق ءتىلىن ۇيرەتەتىن، ءتىلدى ءوز بەتىنشە وقۋعا ارنالعان ءتۇرلى قۇرالداردىڭ جارناماسى كوبەيىپ كەلەدى. ونداي قۇرالداردىڭ كوبەيگەنى قۇپتارلىق جايت. بىراق، سونىڭ اراسىندا ءتىلدىڭ زاڭدىلىعى مەن قالىپتاسقان عىلىمي نەگىزىن ەسكەرمەيتىن، ءتىلدىڭ قادىرىن قاشىرىپ، تىلشىلەر قاۋىمىن ۇيالتاتىن ادىستەمەلىك قۇرالداردىڭ كەزدەسۋى — حالىقارالىق «قازاق ءتىلى» قوعامىن الاڭداتىپ وتىر.

اۆتورىنىڭ كاسىبي بىلىگى كۇمان تۋعىزاتىن وسىنداي وقۋ قۇرالى تۋرالى اقپارات بۇگىن Tengrinews سايتى ارقىلى تارادى.

ءتىل مارتەبەسىنە نۇقسان كەلتىرىپ، ونى ۇيرەنگىسى كەلگەن ورتانىڭ ىقىلاسىن بۇزاتىن مۇنداي وقۋلىقتاردىڭ تارالۋىن شەكتەۋ — ءتىل جاناشىرلارىنىڭ ورتاق مىندەتى. قازاق ءتىلىن ۇيرەتۋ – ءتىل ارقىلى قازاق مادەنيەتى مەن رۋحانياتىنا قۇرمەت قالىپتاستىراتىن اسا جاۋاپتى مىندەت. سوندىقتان ءتىل ۇيرەتۋشى قۇرال دا سول بيىك جاۋاپكەرشىلىككە ساي بولۋى قاجەت.

مەكتەپ پەن وقۋ ورىندارىنا ۇسىنىلعان وقۋلىقتار ارنايى تەكسەرىستەن وتەتىنى بەلگىلى. الايدا، جەكە تۇتىنۋشىلارعا ارنالعان وقۋ قۇرالدارىندا ونداي تالاپ جوق. بۇل ەركىن نارىق تالابى، تۇتىنۋشىنىڭ تاڭداۋ ەرەجەلەرىنە شىعادى.

دەگەنمەن دە، ءتىلىمىزدىڭ مارتەبەسىن كوتەرىپ، ونىڭ قولدانىس اياسىن كەڭەيتۋدى ماقسات تۇتقان جاۋاپتى ەل ءۇشىن ماڭىزدى مىندەت. حالىقارالىق «قازاق ءتىلى» قوعامى ءوز تاراپىنان وقۋ قۇرالدارىنا عىلىمي-ادىستەمەلىك ساراپتاما جاساپ، قولدانىسقا ۇسىنىلاتىن وقۋ قۇرالدارىنىڭ تىزبەسىن ۇسىنادى. جاقىن ۋاقىتتا Til.kz سايتىندا وسىنداي وقۋ قۇرالدارى جيناقتالعان بولەك پاراقشا شىعادى.

سونىمەن قاتار، قازاق ءتىلىن ۇيرەنۋشى ورتاعا مىنانى ەسكەرتكىمىز كەلەدى:

بىرىنشىدەن، ءتىل ۇيرەنۋگە ارنالعان قۇرالدىڭ اۆتورىنا نازار اۋدارىڭىز. ول كىم؟ عىلىمي دارەجەسى بار ما؟ وسى سالادا ناقتى تاجىريبەسى مەن زەرتتەۋلەرى جارىق كورگەن بە؟ بۇل سۇراقتاردى قويۋ ارقىلى ءسىز ءتىل ۇيرەتۋشى قۇرالعا نەمەسە ادامعا دەگەن ناقتى تالاپتارىڭىزدى انىقتاي الاسىز.

ەكىنشىدەن، بۇل قۇرال قاي باسپادان شىققان؟ قانداي ماماندار قاراپ، ساراپتاپ، ماقۇلداعان؟ لينگۆيستيكالىق نەمەسە ادىستەمەلىك كەڭەستەردىڭ سۇزگىسىنەن وتكەن بە؟ بۇل سۇراقتار ءسىزدىڭ تاڭداۋىڭىزدى جەڭىلدەتىپ، تاڭداعان قۇرالىڭىزدىڭ ساپاسىن ايقىندايدى. ەگەر وقۋ قۇرالى سەنىمدى باسپادان، بىلىكتى رەداكتورلار مەن سالا ماماندارىنىڭ ساراپتاۋىنان وتپەسە، ونىڭ جاقسى وقۋلىق بولۋى ەكىتالاي.

Abai.kz