ەندى اسكەري قىزمەتشىلەر وزدەرىنىڭ جەكە دەرەكتەرىن، قۇجاتتارى مەن قىزمەتتىك اقپاراتتارىن ونلاين قاداعالاي الادى.

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قورعانىس ءمينيسترىنىڭ ورىنباسارى دارحان احمەديەۆ مالىمدەدى.

ونىڭ ايتۋىنشا، اسكەري قىزمەتشىنىڭ بىرىڭعاي جەكە كابينەتى ىسكە قوسىلعان. جوبا ماقساتى eGov.kz پورتالىنا ۇقساس، بىراق اسكەري سالاعا بەيىمدەلگەن ىڭعايلى ءارى اشىق جۇيە قۇرۋ.

وندا اسكەري قىزمەتشى ءوزىنىڭ ەڭبەك ءوتىلىن، دەمالىس ۋاقىتىن، كەلەسى اسكەري شەننىڭ قاشان بەرىلەتىنىن، راپورتتار مەن بۇيرىقتاردى كورە الادى. سونداي-اق ءتۇرلى قىزمەتتەرگە ونلاين تۇردە قول جەتكىزۋ مۇمكىندىگى بولادى. مۇنىڭ ءبارى اسكەري eGov فورماتىنا كوشىرىلەدى،– دەدى احمەديەۆ.

سونىمەن قاتار، تاعى ءبىر ماڭىزدى تسيفرلىق باستاما – Jauynger.gov.kz پورتالى ىسكە قوسىلعان. ول كەلىسىمشارت بويىنشا اسكەري قىزمەتكە قابىلداۋ پروتسەسىن جەڭىلدەتۋگە باعىتتالعان.

جوبا 10-نان استام اقپاراتتىق جۇيەمەن بىرىكتىرىلىپ، قىزمەتكە قابىلداۋ مەرزىمىن 6 ايدان 1 ايعا دەيىن قىسقارتۋعا مۇمكىندىك بەرىپ وتىر.

ەسكە سالايىق، بۇعان دەيىن اسكەري وقۋ ورىندارىنا ءتۇسۋ جەڭىلدەگەنىن جازدىق.

1 قىركۇيەكتەن باستاپ جاڭا تسيفرلىق اسكەري وقۋ پلاتفورماسى قوسىلادى.

سونداي-اق، اسكەري-مەديتسينالىق جۇيە تسيفرلىق فورماتقا كوشتى.