اقش مەملەكەت ىستەر حاتشىسى ماركو رۋبيو "Fox" تەلەارناسىنا بەرگەن سۇحباتىندا ۋكراينا-رەسەي سوعىسى، اقش پەن قىتاي قاتىناسى، قىتاي، رەسەي، يران، سولتۇستىك كورەيا - تورتتىگى تۋرالى ەگجەي-تەگجەيلى توقتالدى.

تىزگىنشىنىڭ: "ترامپ پۋتينگە سوعىستى توقتاتۋعا 50 كۇن ۋاقىت بەردى، ويتپەگەندە 100 پايىز كەدەندىك سالىق بەلگىلەيتىن بولدى. بۇل شارا ناتيجە بەرە مە؟ ءپۋتيننىڭ وعان كوزقاراسى قانداي؟ جاعداي قالاي وزگەرۋى مۇمكىن؟" دەگەن سۇراعىنا رۋبيو بىلاي دەپ جاۋاپ بەردى:

"ەڭ الدىمەن، مەنىڭ ويىمشا ءاربىر سانالى ازامات پرەزيدەنت ترامپتىڭ بەيبىتشىلىك ورناتۋعا تالپىنىسىنا راحمەت ايتۋى ءتيىس. ونىڭ بەيبىت كەلىسىم ورناتقىسى، سوعىستى توقتاتقىسى، الدىن العىسى، اياقتاتقىسى كەلەدى. انىعىندا بۇل ونىڭ سوعىسى ەمەس. بيلىككە كەلگەن سوڭ سوعىستى توقتاتۋعا تالپىندى. پۋتينمەن ءوزارا اڭگىمەلەر ءساتتى بولعانمەن ەشقانداي ناتيجە بەرمەدى. قازىر ترامپتىڭ ءتوزىمى سارقىلۋعا جاقىن" دەدى.

رۋبيو سونداي-اق جىل باسىنان بەرى رەسەيدىڭ 100 مىڭ اسكەرىنەن ايىرىلعانىن العا تارتىپ، پۋتيننىڭ كەلىسە ءجۇرىپ سوعىستى جالعاستىرۋ تاكتيكاسىنىڭ ەندىگارى وتپەيتىنىن، ترامپتىڭ ونداي شىرعاعا الدانبايتىنىن، بيزنەس مايدانىنان ساياسات مايدانىنا كەلگەن اق ءۇي باسشىسىنىڭ ونداي قۋلىقتارعا ىشىنەن كۇلىپ وتىرعانىن اشىق ايتتى.

رۋبيونىڭ ويىنشا قىتاي رەسەي مۇنايىن ساتىپ الماعاندا پۋتين سوعىستى بۇگىنگى كۇنگە دەيىن جالعاستىرا الماس ەدى. ءوز سوزىمەن ايتساق: "قىتايدىڭ كومەگى بولماسا سوعىس ۇزارماس ەدى. مۇنى ەۋروپالىقتار ءبىرىنشى اڭعاردى. قىتاي تارابى سوعىستىڭ جالعاسۋىنا مۇددەلى. سول ارقىلى ءبىزدىڭ نازارىمىزدى شاشىراتىپ، ءوزىنىڭ باسقا ايماقتارداعى كوزدەگەنىنە قول جەتكىزبەكشى. قىتاي رەسەيمەن عانا شەكتەلمەي يران مۇنايىن دا كوپتەپ ساتىپ الۋدا. بىراق ءبىزدىڭ يراننىڭ يادرولىق نىساندارىنا جاساعان سوققىمىزدان كەيىن قىتاي بولسىن، رەسەي، سولتۇستىك كورەيا، باسقاسى بولسىن ساقتانا باستادى. يرانعا كومەك قولىن سوزۋدان قاشقاقتادى"

رۋبيو پرەزيدەنت ترامپ ەڭ جويقىن بومبالارمەن يرانعا سوققى جاساۋ ارقىلى امەريكانىڭ دۇنيەدەگى ەڭ وزىق، ەڭ جويقىن، ەڭ قۋاتتى اسكەري كۇشكە يە ەكەنىن الەم جۇرتىنىڭ ەسىنە قايتا سالىپ، ديكتاتورلارعا ەسكەرتۋ جاسادى دەپ ەسەپتەيدى.

Abai.kz