اق ءۇي قوجايىنى دونالد ترامپ "تاريف شوقپارىن" قايتا قولىنا الدى. سوپاقشا كابينەتىندە ىشىندە قازاقستاندا بار 60 ەلگە 10%-دان 12,5% مولشەرىندە كەدەندىك باج ەنگىزۋ تۋرالى مەموراندۋمعا قول قويدى.

ۆاشينگتوننىڭ ۋاجىنشە، بۇل ەلدەر ءماجبۇرلى ەڭبەكپەن وندىرىلگەن تاۋارلاردىڭ يمپورتىنا تىيىم سالۋ تالاپتارىن جەتكىلىكتى دەڭگەيدە ورىنداماعان.

اق ءۇيدىڭ مالىمەتىنشە، تەرگەۋدى اقش-تىڭ ساۋدا وكىلى باسقارماسى 1974 جىلعى ساۋدا تۋرالى زاڭنىڭ 301-بولىمىنە سايكەس جۇرگىزگەن. تەرگەۋ ناتيجەسىندە بىرقاتار مەملەكەتتەر ءماجبۇرلى ەڭبەكپەن وندىرىلگەن تاۋارلاردى يمپورتتاۋعا مۇلدە تىيىم سالماعان. كەيبىرى تىيىمنىڭ ورىندالۋىنا نيەت بىلدىرمەگەن. وسىعان بايلانىستى اقش اتالعان ەلدەردەن يمپورتتالاتىن تاۋارلارعا قوسىمشا كەدەندىك باج سالىعىن ەنگىزۋ تۋرالى شەشىم قابىلدادى.

Euronews-ءتىڭ جازۋىنشا، جاڭا كەدەندىك باج مولشەرلەمەلەرى 10%-دان 12,5%-عا دەيىن بولادى. ولار جۇما كۇنى كۇشىنە ەنىپ، بيىل ترامپ ەنگىزگەن بىرىڭعاي 10 پايىزدىق جاھاندىق ءتاريفتىڭ ورنىنا قولدانىلادى.

بەيسەنبى كۇنى جاريالانعان جاڭا باج سالىعى اقش-تىڭ ونداعان ساۋدا سەرىكتەسىنە، سونىڭ ىشىندە قىتاي، ءۇندىستان جانە ەۋروپالىق وداق سياقتى ءىرى ەكونوميكالارعا قاتىستى ەنگىزىلەدى. بۇل ەلدەر اقش يمپورتىنىڭ شامامەن 99 پايىزىن قامتاماسىز ەتەدى.

"اقش ءماجبۇرلى ەڭبەكپەن وندىرىلگەن تاۋارلاردىڭ يمپورتىنا ءجۇز جىلعا جۋىق ۋاقىت بويى تىيىم سالىپ، ونى قاتاڭ ورىنداپ كەلەدى. ەندى ءبىزدىڭ ساۋدا سەرىكتەستەرىمىزدىڭ دە وسى تالاپتى ۇستاناتىن ۋاقىتى جەتتى", – دەدى اقش-تىڭ ساۋدا وكىلى دجەيميسون گرير.

قازاقستانعا 12,5% مولشەرىندە قوسىمشا كەدەندىك باج سالىعى ەنگىزىلەدى. ءدال وسىنداي مولشەرلەمە رەسەيگە دە قولدانىلادى. تاعى 17 ەل ءۇشىن تومەندەتىلگەن 10% مولشەرلەمە بەلگىلەندى.

ولار:

ارگەنتينا، بانگلادەش، كامبودجا، كانادا، ەكۆادور، سالۆادور، گۆاتەمالا، گوندۋراس، ءۇندىستان، يندونەزيا، يوردانيا، مالايزيا، مەكسيكا، پاكىستان، شري-لانكا، ۇلىبريتانيا، سونداي-اق ترينيداد پەن توباگو.

ەۋروپالىق وداق پەن تايۆان ءۇشىن جالپى مولشەرلەمە، ادەتتەگى امەريكالىق باج سالىعىن ەسكەرگەندە، 10 پايىزدان اسپاۋى ءتيىس. جاپونيا، وڭتۇستىك كورەيا جانە شۆەيتساريا ءۇشىن شەكتى جالپى مولشەرلەمەسى 12,5 پايىز بولاتىن ۇقساس مەحانيزم ورناتىلدى.

قوسىمشادا قازاقستان ءۇشىن تىزىمدەگى ەلدەرگە قولدانىلاتىن جالپى ەرەكشەلىكتەر قاراستىرىلعان. ولاردىڭ قاتارىندا گۋمانيتارلىق تاۋارلاردىڭ جەكەلەگەن تۇرلەرى، اقپاراتتىق ماتەريالدار، كەيبىر ەنەرگەتيكالىق جانە ونەركاسىپتىك تاۋارلار، سونداي-اق اقش-تىڭ ارنايى ساۋدا رەجيمدەرىنە كىرەتىن ونىمدەر بار.

اقش-تىڭ ساۋدا وكىلى كەيىننەن باج سالىعى مەن ەرەكشەلىكتەردى وزگەرتە الادى نەمەسە كۇشىن جويا الادى، سونىڭ ىشىندە ەگەر ەل ءوز زاڭناماسىن نەمەسە ءماجبۇرلى ەڭبەككە قاتىستى تاۋارلاردى باقىلاۋ تاجىريبەسىن قايتا قاراسا.

قازاقستاننىڭ ساۋدا جانە ينتەگراتسيا مينيسترلىگى  امەريكالىق تاراپتىڭ شەشىمىنەن حاباردار ەكەنىن مالىمدەدى. ۆەدومستۆو قازىرگى ۋاقىتتا جاعدايدى زەردەلەپ، رەسمي تۇسىنىكتەمە دايىنداپ جاتىر.

Abai.kz