قازاقستاندا تۇرعىلىقتى مەكەنجاي بويىنشا تىركەۋ ەرەجەلەرىنە جاڭا وزگەرىستەر كۇشىنە ەندى. ءتيىستى زاڭعا 2025 جىلعى 17 شىلدەدە پرەزيدەنت قول قويدى.

تىركەلگەن ادام سانىنا شەكتەۋ ەنگىزىلەدى

ءبىر پاتەرگە نەمەسە ۇيگە تىركەلەتىن ادامداردىڭ سانىنا شەكتەۋ قويىلادى. ەندى ءبىر مەكەنجايعا قالاعانشا ادامدى تىركەۋگە بولمايدى.

الايدا بۇل شەكتەۋدىڭ ناقتى نورمالارى ازىرگە كورسەتىلمەگەن، ءار ءوڭىردىڭ ءماسليحاتتارى جەكە انىقتايتىن بولادى.

Krisha.kz ماماندارىنىڭ ايتۋىنشا، الماتى مەن شىمكەنتتەگى تىركەۋ ليميتتەرى ءارتۇرلى بولۋى مۇمكىن.

شەكتەۋلەر بىرگە تۇراتىن جۇبايلارعا، بالالارعا جانە جاقىن تۋىستارىنا قولدانىلمايدى. بۇل “رەزەڭكە پاتەرلەرمەن” كۇرەسۋدىڭ جولى رەتىندە ەنگىزىلۋدە.

جالعان تىركەۋ ءۇشىن ايىپپۇل

زاڭداعى وزگەرىستەر تىركەۋدى باقىلاۋدى كۇشەيتەدى.

پوليتسيا پاتەرلەردى تۇرعىندار سانى مەن تۇرۋ شارتتارىنا ساي ما، جوق پا تەكسەرۋگە قۇقىلى. ەگەر تىركەلگەن ادامدار مەن ناقتى تۇراتىن ادامدار سايكەس كەلمەسە، ياعني جالعان تىركەۋ انىقتالسا ءۇي يەسى دە، تىركەلگەن ادام دا ايىپپۇل تولەيدى.

ايىپپۇل كولەمى – 10 اەك (شامامەن 40 مىڭ تەڭگە).

ەگەر ادام پاتەرگە تىركەلگەنىمەن، وندا شىن مانىندە تۇرماسا، بۇل جالعان تىركەۋ دەپ تانىلادى. ەندى زاڭدا بۇل تۇسىنىك رەسمي تۇردە ەنگىزىلگەن.

كىمدەرگە ۋاقىتشا تىركەۋ قاجەت ەمەس؟

ايتا كەتەيىك، قازاقستان ازاماتتارى جاڭا مەكەنجايدا 30 كۇننەن ارتىق تۇرسا، ۋاقىتشا تىركەۋ راسىمدەۋى مىندەتتى. بۇل قوناققا بارۋ، ءۇي جالداۋ، وقۋ نەمەسە قىزمەتتىك ءىسساپارلار سياقتى جاعدايلارعا قاتىستى.

الايدا جاڭا وزگەرىستەرگە سايكەس، ەندى كەلەسى ساناتتاعى ازاماتتار ۋاقىتشا تىركەۋسىز تۇرا الادى:

• تۇراقتى مەكەنجايىنان تىس جەردە وقيتىن ستۋدەنتتەر;
• قىزمەتتىك ىسساپارمەن كەلگەن قىزمەتكەرلەر;
• ۇزاق مەرزىمدى ەم الىپ جاتقان ناۋقاستار.

زاڭ 2025 جىلعى 17 شىلدەدە كۇشىنە ەندى، بىراق ناقتى وزگەرىستەر ءالى ەنگىزىلگەن جوق.

ءار ايماقتاعى ءماسليحاتتار ليميتتەردى بەكىتۋى، ال ۋاكىلەتتى ورگاندار باقىلاۋ تەتىكتەرى مەن تەكسەرۋ راسىمدەرىن دايىنداۋى ءتيىس.

Abai.kz