بۇگىن «اق جول» دەمپارتياسىنىڭ پارلامەنتتىك فراكتسياسى ەلىمىزدىڭ شاعىن جانە ورتا بيزنەس وكىلدەرىمەن كەزدەسۋ وتكىزدى. كەزدەسۋ استانا قالاسىنىڭ ورتالىعىنداعى «كەرۋەن» ساۋدا-ويىن-ساۋىق ورتالىعىندا وتكەن.

اتالعان جيىندا ۇلتتىق تاۋارلار كاتالوگى مەن ەسف اقپاراتتىق جۇيەلەرىنىڭ ءوزارا ينتەگراتسيانباۋى، سونداي-اق كولىك كوميتەتى مەن مەملەكەتتىك كىرىستەر كوميتەتى جۇيەلەرىندەگى وسىعان ۇقساس ماسەلەلەر تالقىلانعان.

كاسىپكەرلەردىڭ كوكەيتەستى سۇراقتارىنا ساۋدا مينيسترلىگى، قارجى مينيسترلىگى، مەملەكەتتىك كىرىستەر كوميتەتى، ونەركاسىپ مينيسترلىگى، كولىك مينيسترلىگى، تسيفرلىق ەكونوميكانى دامىتۋ ورتالىعىنىڭ وكىلدەرى مەن «اتامەكەن» ۇكپ توراعاسىنىڭ ورىنباسارى تيمۋر جاركەنوۆ جاۋاپ بەرگەن.

ايتا كەتەيىك، بۇعان دەيىن وسىعان ۇقساس باسقوسۋلار شىمكەنت، قاراعاندى، سەمەي جانە ورال قالالارىنىڭ كاسىپكەرلەرىمەن دە وتكىزىلگەن.

"تاۋارلار كاتالوگىنا قاتىستى ساۋدا مينيسترلىگى، مەملەكەتتىك كىرىستەر كوميتەتى، ۇكپ جانە جۇيە وپەراتورىنىڭ وكىلدەرى اتالمىش جۇيەنى جەتىلدىرۋ جۇمىستارى قارقىندى جۇرگىزىلىپ جاتقانىن جانە وسى وتپەلى كەزەڭدە بيزنەسكە ەشقانداي قارجىلىق سانكتسيالار قولدانىلمايتىنىن ءبىراۋىزدان مالىمدەدى (نازارعا الىپ قويامىز).

اۆتوتاسىمالداۋشىلار كولەڭكەلى نارىقپەن جانە سالىق تولەۋدەن جالتارۋمەن كۇرەس، شەتەلدىك كولىك كومپانيالارى تاراپىنان تۋىنداپ وتىرعان جوسىقسىز باسەكەلەستىك، سونداي-اق زاڭ تالاپتارىن اينالىپ وتۋگە مۇمكىندىك بەرەتىن قۇقىقتىق رەتتەۋدەگى ولقىلىقتار سەكىلدى وتكىر ماسەلەلەردى كوتەردى. سونىمەن قاتار، قاۋىمداستىق وكىلى وكسانا سوروكينا حالىقارالىق تاسىمالدارعا رۇقسات بەرۋ ءتارتىبىن جولعا قويعانى جانە شەكاراداعى ەلەكتروندىق كەزەك ءۇشىن اۆتوكولىك كوميتەتى مەن مەملەكەتتىك كىرىستەر كوميتەتىنە العىسىن ءبىلدىردى.

اۆتوكولىك تىركەمەلەرى مەن جول جابىندىسىنا ارنالعان حيميالىق رەاگەنتتەر وندىرۋشىلەرى وتاندىق وندىرۋشىلەر ءتىزىلىمى مەن ونەركاسىپتىك قۇراستىرۋ تۋرالى كەلىسىمدەرگە قويىلاتىن تالاپتاردى سارالاۋدى سۇرادى. سونداي-اق ولار حيميالىق رەاگەنتتەردىڭ سايكەستىگىن راستاۋعا ارنالعان زەرتحانالىق بازانىڭ جوقتىعىنا بايلانىستى سىن-پىكىرلەرىن جەتكىزدى.

بۇدان بولەك، سالىق كونسۋلتانتتارى مەن اۋديتورلار قاۋىمداستىعى بىرقاتار وزەكتى ماسەلەلەردى كوتەرگەنمەن، مەملەكەتتىك ورگاندار ناقتى جاۋاپ بەرە المادى. «اق جول» دەمپارتياسىنىڭ دەپۋتاتتارى رەسمي تۇردە ساۋالدار دايىندايتىن بولادى.

پىكىرتالاس ايتارلىقتاي وتكىر ءارى ناقتى بولدى. جۇمىستى جالعاستىرامىز",- دەدى ءماجىلىس دەپۋتاتى ازات پەرۋاشەۆ.

Abai.kz