اباي وبلىسىندا ابايدىڭ 180 جىلدىعىنا ارنالعان مەرەيتويلىق شارالار لەگى جالعاسۋدا. ونكۇندىكتىڭ توعىزىنشى كۇنىندە سەمەيدەگى شاكارىم ۋنيۆەرسيتەتىندە «ادامزاتتىڭ ابايى: رۋحانيات، پاراسات، تانىم» اتتى حالىقارالىق عىلىمي-تاجىريبەلىك كونفەرەنتسيا ۇيىمداستىرىلدى. وعان تۇركيا، نيدەرلاندى، رەسەي، قىرعىزستان، وزبەكستان سەكىلدى الىس-جاقىن شەتەلدەردەن جانە ەلىمىزدىڭ ءار وڭىرىنەن ابايتانۋشىلار مەن ادەبيەتتانۋشىلار، فيلوسوفتار مەن تاريحشىلار قاتىسۋدا.

وبلىس اكىمى بەرىك ءۋالي، قازاقستان رەسپۋبليكاسى عىلىم جانە جوعارى ءبىلىم ءمينيسترى ساياسات نۇربەك، مۇحتار اۋەزوۆتىڭ نەمەرەسى، تۇركىتانۋشى عالىم زيفا-الۋا مۇراتقىزى، لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ كونفەرەنتسيانىڭ اشىلۋىندا قۇتتىقتاۋ ءسوز سويلەدى. 

 «مەملەكەت باسشىسى قاسىم-جومارت كەمەلۇلى توقاەۆ «اباي جانە ءححى عاسىرداعى قازاقستان» اتتى ماقالاسىندا: «ابايدى قالاي دارىپتەسەك تە جاراسادى. ونىڭ عيبراتتى عۇمىرى مەن شىنايى شىعارماشىلىعى – قازاق حالقىنىڭ عانا ەمەس، جاھان جۇرتىنا دا ۇلگى-ونەگە.  ابايدىڭ ادام مەن قوعام، ءبىلىم مەن عىلىم، ءدىن مەن ءداستۇر، تابيعات پەن قورشاعان ورتا، مەملەكەت پەن بيلىك، ءتىل مەن قارىم-قاتىناس تۋرالى ايتقان وي-تۇجىرىمدارى عاسىرلار وتسە دە ماڭىزىن جوعالتپايدى. ويتكەنى اقىننىڭ مۇراسى – بۇكىل ادامزات بالاسىنىڭ رۋحاني ازىعى» دەپ اتاپ كورسەتكەن بولاتىن. «ادامزاتتىڭ ابايى: رۋحانيات، پاراسات، تانىم» حالىقارالىق عىلىمي-تاجىريبەلىك كونفەرەنتسياسىندا ايتۋلى عالىمدار مەن بىلىكتى ماماندار جينالىپ، اباي ويىنىڭ تەرەڭىنە دەن قويىپ، سيپاتىنىڭ سىرىنا ۇڭىلگەلى وتىر. كونفەرەنتسياعا تۇركيا ەلىنەن، نيدەرلاندى كورولدىگىنەن كەلگەن جانە ەلىمىزدىڭ، ءوڭىرىمىزدىڭ ايتۋلى عالىمدارىنا ريزاشىلىعىمدى بىلدىرگىم كەلەدى. اباي قۇنانبايۇلىنىڭ رۋحاني مۇراسىن تەرەڭ زەردەلەۋ، اقىننىڭ شىعارماشىلىعى مەن وي-تولعامدارىن قازىرگى زامان تۇرعىسىنان قايتا پايىمداۋ، اباي ءىلىمىنىڭ ۇلتتىق سانانى قالىپتاستىرۋداعى، ءبىلىم مەن تاربيەدەگى، تۇلعا دامىتۋدىڭ مادەني-فيلوسوفيالىق نەگىزى رەتىندەگى ورنىن ايقىنداۋ ءۇشىن جينالعان بارلىق بىلىمپازدارعا دا دانىشپاننىڭ سۇراعى ورتاق دەپ ويلايمىن»، – دەدى ايماق باسشىسى.

كونفەرەنتسيادا تۇركياداعى پامۋككالە ۋنيۆەرسيتەتىنىڭ پروفەسسورى نەرگيز بيراز، نيدەرلاندىدان كەلگەن تۇركىتانۋشى روبەرت ەرمەرس، فيلولوگيا عىلىمدارىنىڭ دوكتورلارى تۇرسىن جۇرتباي، اراپ ەسپەنبەتوۆ جانە باسقا دا عالىمدار بايانداما جاسادى. 

ەرەكشە اتاپ وتەرلىگى، كونفەرەنتسيا اياسىندا 9 بىردەي كىتاپتىڭ تۇساۋكەسەر ءراسىمى ءوتتى. سونىڭ ءبىرى –  بەلگىلى ادەبيەتتانۋشى عالىم، ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ قۇراستىرعان «اباي شىعارمالارىنىڭ ءۇش تومدىق اكادەميالىق جيناعى». «اباي» باسپاسىنان اقىننىڭ مەرەيتويىنا وراي بۇرىن-سوڭدى جارىق كورمەگەن بىرنەشە كىتاپ تانىستىرىلدى. عالىم، مادەنيەتتانۋشى بازاربەك اتىعايدىڭ «ابايدىڭ اۋدارما مەكتەبى» مونوگرافياسى، شəكəرىم تۋرالى ەستەلىكتەر مەن جاڭا دەرەكتەردى قامتيتىن «شەيىت» جيناعى، اقبەرەن ەلگەزەك، مەرەي قارت، جاننا Əدىلبەكقىزىنىڭ قۇراستىرعان احات شاكəرىمۇلىنىڭ «جالىنعا مالعان جۇرەگىن» جيناعى، اسەت مەدەۋحانۇلىنىڭ «حاليوللا» حيكاياتى، دانيال ىسقاقوۆتىڭ شىعارمالارى، شاكارىم ۋنيۆەرسيتەتىندەگى «اباي جانە ۇلتتىق رۋحانيات» عىلىمي ورتالىعىنىڭ ماماندارى دايىنداعان AR «قاراسوز» كىتابى وقىرمانعا جول تارتتى. بۇل تۋىندىلار العاش رەت كوپشىلىك وقىرمانعا ۇسىنىلىپ وتىر.

Abai.kz