2025 جىلعى 10 تامىزدا تالدىقورعان قالاسىنىڭ «اباي» مەيرامحاناسىندا قازاقتىڭ ۇلى ويشىلى، اقىن جانە اعارتۋشىسى اباي قۇنانبايۇلىنىڭ 180 جىلدىعىنا ارنالعان «ۇلى حالىقتىڭ – ۇلى ابايى» اتتى 10 كۇندىك ءىس-شارالار اياسىندا «اباي – ماڭگىلىك عۇمىر» اتتى پوەزيا كەشى ۇيىمداستىرىلدى. 

ءىس-شارانىڭ ماقساتى – ۇلى اقىننىڭ رۋحاني مۇراسىن دارىپتەۋ، جاس ۇرپاقتىڭ بويىنا ۇلتتىق قۇندىلىقتار مەن مادەنيەتتى ءسىڭىرۋ، سونداي-اق اباي شىعارماشىلىعىن جاڭا قىرىنان تانىتۋ. كەش بارىسىندا قاتىسۋشىلارعا ابايدىڭ ولەڭدەرى وقىلىپ، اندەرى شىرقالدى، اقىننىڭ ءومىرى مەن شىعارماشىلىعىنا قاتىستى دەرەكتەر ۇسىنىلدى. سونىمەن قاتار، اباي قۇنانبايۇلىنا ارنالعان بەينەينستاللياتسيا مەن فوتوكورمە ۇيىمداستىرىلدى. اشىق ميكروفون فورماتىندا وتكەن شىعارماشىلىق پىكىر الماسۋ قوناقتارعا ءوز وي-پىكىرلەرىن بولىسۋگە مۇمكىندىك بەردى. پوەزيا كەشىنە جەرگىلىكتى اقىن-جازۋشىلار، ونەرپازدار، ستۋدەنتتەر مەن قالا تۇرعىندارى بەلسەندى قاتىستى. جاس ورىنداۋشىلاردىڭ مۋزىكالىق جانە پوەتيكالىق قويىلىمدارى كورەرمەندەردى ەرەكشە اسەرگە بولەدى. بۇل كەش – رۋحاني بايلىق پەن ۇلتتىق مادەنيەتىمىزدىڭ التىن قازىناسى سانالاتىن اباي مۇراسىن تەرەڭ تانىپ، ونى سەزىنۋ مۇمكىندىگىن بەرگەن ءماندى شارا بولدى. ءىس-شارا سوڭىندا قاتىسۋشىلار ابايدىڭ شىعارمالارىن ۇلىقتاۋ – ءاربىر ازاماتتىڭ پارىزى ەكەنىن اتاپ ءوتىپ، ونىڭ مۇراسىن كەڭىنەن ناسيحاتتاۋعا ءۇن قوستى.

Abai.kz