حۋرريات گازەتىندە 1918 جىلى 26 قاڭتاردا جاريالانعان وزبەك جاديد رەفورماتورلارى قوزعالىسىنىڭ باسشىسى ماحمۋدقوجا بەحبۋديدىڭ قازاق اعايىندارعا ۇندەۋى - اشىق حات:

قىمباتتى قازاق باۋىرلارىم!

مۇسىلمان اعايىندار، بارلىعىڭىزعا ءمالىم، تۇركىستان دەگەنىمىز تۇركىلەر ەلى بولىپ، مۇنداعى حالىقتىڭ قازاعى، قىرعىزى، وزبەگى، تۇركىمەن مەن تاتارى - بارلىعى تۇرىك-موعول بالالارى بولىپ، جاحاندى بيلەگەن شىڭعىس حان مەن تەمىردىڭ اۋلەتتەرى ياكي اعا-ىنىلەرى.

باۋىرلار! قازىرگى كۇندە تۇركىستانداعى بارلىق حالىقتار ءۇشىن مۇحتاريات (اۆتونوميا) جاريالاندى جانە بىلىڭىزدەر: «قۇقىق بەرىلمەيدى، ونى الۋ كەرەك ياعني، مۇحتارياتتى تۇركىستاننىڭ بالالارى، وزدەرى بىرىگىپ، كۇشپەن الا الادى، بىرەۋ بىزگە بەرمەيدى. باسقالار قولىنان كەلسە بىزگە بەرمەۋگە تىرىسادى».

جارقىندارىم! باسقا حالىقتار، ماسەلەن سەربتەر، يتالياندار، ارمياندار، سلاۆياندار، پولياكتار جانە باسقالار، ءتىپتى دۇنيەنىڭ ارعى شەتىندە بولسا دا باۋىرلارىمەن بىرلەسىپ جاتىر. باسقا ۇلكەن مەملەكەتتەرگە باعىنىشتى بولىپ، جۇتىلىپ، ءتىپتى ءتىلىن دە جوعالتقان ءتۇبى ءبىر باۋىرلاستارىن اجىراتىپ الىپ بىرىگۋگە بار كۇشى مەن جانىن سالىپ جاتىر. ءبىز دە ءوز ىشىمىزدەگى اعايىندارىمىزدان ايىرىلساق اقىماقشىلىق، ۇيات، تۇركى تامىرىنا بالتا شابۋ بولماق.

جانىم جارقىندارىم، بىرىگەيىك! كورىپ ءجۇرسىز، ورىستار دا بىرىگۋدە. بىرىگۋ زامانى كەلىپ تۇر. ەگەر ءسىز بولىنسەڭىز، تۇركىمەن اعايىن بولىنسە، تۇركىستان تۇرىكتەرى ءۇش جەرگە ءبولىنىپ كەتەدى جانە مۇحتارياتتان ەشكىمگە نەسىبە بۇيىرمايدى. جەتىسۋداعى مۇسىلمان اعايىندارعا دا ايتاتىن ءسوزىم وسى.

تۇسىنىكتەمە: بۇل حات 1917 ج. 28 قاراشادان 1918 ج. 22 اقپانعا دەيىن قوقاندا ءومىر سۇرگەن، مۇستاپا شوقاي باسقارعان تۇركىستان اۆتونومياسى (مۇحتارياتى) قولداۋعا شاقىرعان ۇندەۋ.

قازىرگى ارىپكە تۇسىرگەن كارىم اپپازوۆ

Abai.kz