استانادا قۇرىلتاي سايلاۋىنا قاتىساتىن جەتى ساياسي پارتيا وكىلدەرىنىڭ قاتىسۋىمەن وتكەن تەلەۆيزيالىق سايلاۋالدى دەبات جوباسى اياقتالدى. ءبىلىم بەرۋ جۇيەسىن دامىتۋ ماسەلەلەرىنە ارنالعان اۋقىمدى پىكىرتالاس جەتىنشى ارنانىڭ تىكەلەي ەفيرىندە كورسەتىلدى.

تەلەۆيزيالىق پىكىرتالاسقا «ادىلەت»، جسدپ، «بايتاق»، قازاقستان حالىق پارتياسى، «اۋىل»، «اق جول» جانە Respublica پارتيالارىنىڭ وكىلدەرى قاتىستى. ەفير بارىسىندا قاتىسۋشىلار ءبىلىم بەرۋ جۇيەسىن دامىتۋعا قاتىستى ۇستانىمدارىن ۇسىنىپ، سالانىڭ وزەكتى ماسەلەلەرى بويىنشا پىكىر الماستى جانە سايلاۋالدى باعدارلامالارىنداعى باسىم باعىتتاردى تانىستىردى.

دەبات باستالار الدىندا جەتىنشى ارنانىڭ تىكەلەي ەفيرىندە قاتىسۋشىلاردىڭ ءسوز سويلەۋ رەتىن انىقتايتىن اشىق جەرەبە تارتۋ ءراسىمى ءوتتى. جوبا ءتورت كەزەڭنەن تۇردى. ساياسي پارتيالار وزدەرىنىڭ سايلاۋالدى باعدارلامالارىنىڭ نەگىزگى باعىتتارىن تانىستىرىپ، ءبىلىم بەرۋ سالاسىن دامىتۋ جونىندەگى ۇسىنىستارىن ورتاعا سالدى، ءبىر-بىرىنە سۇراق قويىپ، كورەرمەندەردىڭ ساۋالدارىنا جاۋاپ بەردى جانە سايلاۋشىلارعا قورىتىندى ۇندەۋ جاسادى.

پىكىرتالاس بارىسىندا ءبىلىم بەرۋ جۇيەسىن تسيفرلاندىرۋ، جوعارى ءبىلىمنىڭ قولجەتىمدىلىگىن كەڭەيتۋ، بىلىكتى جۇمىسشى كادرلاردى دايارلاۋ، ەكولوگيالىق مادەنيەتتى دامىتۋ، اۋىل جاستارىن قولداۋ باعدارلامالارىن جەتىلدىرۋ، پەداگوگتەردىڭ مارتەبەسىن ارتتىرۋ جانە قازاقستاندىق جوعارى وقۋ ورىندارىنىڭ حالىقارالىق باسەكەگە قابىلەتتىلىگىن كۇشەيتۋ ماسەلەلەرى تالقىلاندى.

كەزەڭدەر اراسىنداعى ۇزىلىستەردە جەتىنشى ارنانىڭ شاعىن ستۋدياسىندا ساياساتتانۋشىلار مەن ءبىلىم سالاسىنىڭ ساراپشىلارى ۇسىنىلعان باستامالاردى تالداپ، پىكىرتالاس بارىسىنا قاتىستى ءوز باعالارىن بەردى.

ەفير بويى كورەرمەندەر QR-كود ارقىلى ۇيىمداستىرىلعان ونلاين داۋىس بەرۋگە قاتىسىپ، «قاي پارتيا سپيكەرىنىڭ ءسوزى سىزگە كوبىرەك ۇنادى؟» دەگەن سۇراققا جاۋاپ بەردى.

ونلاين داۋىس بەرۋ قورىتىندىسى:

ونلاين داۋىس بەرۋگە 73 628 كورەرمەن قاتىستى.

داۋىس بەرۋ ناتيجەسى تومەندەگىدەي بولدى:

1. «ادىلەت» پارتياسى — 45,48 %;

2. «اۋىل» پارتياسى — 15,58 %;

3. Respublica پارتياسى — 12,01 %;

4. جسدپ — 9,71 %;

5.  «اق جول» پارتياسى — 7,98 %;

6. قازاقستان حالىق پارتياسى — 6,96 %;

7. «بايتاق» پارتياسى — 1,58 %;

8. «ەشقايسىسىن قولدامايمىن» — 0,70 %.

جەتىنشى ارناداعى تەلەۆيزيالىق دەبات ساياسي پارتيالار، ساراپشىلار قاۋىمداستىعى مەن سايلاۋشىلار اراسىنداعى اشىق ديالوگ الاڭىنا اينالدى. ينتەراكتيۆتى فورمات كورەرمەندەرگە پىكىرتالاستى تاماشالاپ قانا قويماي، سۇراق قويىپ، پىكىر ءبىلدىرىپ جانە ونلاين داۋىس بەرۋ ارقىلى وعان تىكەلەي قاتىسۋعا مۇمكىندىك بەردى.

تەلەدەباتتىڭ تولىق جازباسى، ەفيردىڭ ۇزدىك ساتتەرى، ساحنا سىرتىنداعى ەكسكليۋزيۆتى ماتەريالدار جانە قوسىمشا بەينەماتەريالدار جەتىنشى ارنانىڭ رەسمي سايتى مەن الەۋمەتتىك جەلىلەردەگى رەسمي پاراقشالارىندا جاريالانادى.

تەلەۆيزيالىق دەبات قازاقستان رەسپۋبليكاسىنىڭ سايلاۋ تۋرالى زاڭناماسىنىڭ تالاپتارىنا سايكەس ۇيىمداستىرىلىپ، جەتىنشى ارنانىڭ تىكەلەي ەفيرىندە كورسەتىلدى.

Abai.kz