وتكەندە ترەدستە “لەنينا 36” دەگەن كافەنىڭ اتاۋىنا قاتىستى شۋ شىقتى. كوپشىلىككە ءدامحانانىڭ اتاۋىن ۇناعان جوق. قولدانۋشىلار ءالى اشىلىپ ۇلگەرمەگەن ورىنعا كانسەلينگ جاساپ تاستادى. راس كەيىن كافە قوجايىندارى قاتەلىگىن ءتۇسىنىپ، اتاۋىن وزگەرتتى.

ءبىر جاعىنان مۇنداي كانسەلينگ قوعامنىڭ ويانعانىن، كەز كەلگەن دۇنيەگە وزىندىك ۇستانىمى بار ەكەنىن كورسەتسە دە، تاياقتىڭ ەكىنشى ۇشى بار. كەي جاعدايدا جەلى قولدانۋشىلارى ماسەلەنىڭ بايىبىنا بارماي شەشىم شىعارىپ جىبەرەدى.

بىلتىر شەرزات پولات كىسى قولىنان قازا تاپقاندا، قىلمىسكەرلەردىڭ ەسىمى الەۋمەتتىك جەلىگە جاريالانىپ كەتتى. سودان ادامدار اتى ءجونىن جازىپ، ۇقساس اككاۋنتتارعا شابۋىلدى باستادى دەيسىز. نەشە ءتۇرلى پىكىر جازىلدى. بىراق ءبىر-ەكى ادام ەشتەڭەگە قاتىسى جوق، تەك اتتاس بولعانى ءۇشىن عانا قارعىستىڭ استىنا قالدى.

ويلاپ قاراڭىزشى، ءوز وزىڭىزبەن كۇنىڭىزدى كورىپ جۇرەسىز. كۇندەردىڭ ءبىر كۇنى قىلمىسكەرمەن اتتاس بولعانىڭىز ءۇشىن عانا جەلى قولدانۋشىلارى قىسىم جاسايدى. قانداي سەزىمدە بولاسىز؟ كەشەگى تورت ماسەلەسىندە دە اسەل ەسىمدى ءبىراز بلوگەر ءوزىنىڭ وقيعاعا قاتىسى جوق ەكەنىن مالىمدەۋگە تۋرا كەلدى. نەمەسە ميراستى قاراڭىز. اعاسىنىڭ سوزىنە بولا، قىرعىن حەيتكە ۇشىرادى. ايتا بەرسەڭىز، مۇنداي مىسال جەتىپ ارتىلادى.

ەلىمىزدە كانسەلينگ مادەنيەتى قالىپتاسقانى دۇرىس. بىراق ماسەلەنىڭ اق-قاراسىن انىقتاپ، كوز جەتكىزگەننەن كەيىن عانا قاجەت. ايتپەسە، كەيبىرەۋلەر تەككە كۇيىپ كەتەدى. ال جەلى قولدانۋشىلارى ەشتەڭەنىڭ بايىبىنا بارماي قارعىس جاۋدىرادى.

سول سەبەپتى كانسەلينگتى “ساموسۋدپەن” شاتاستىرىپ الماۋ قاجەت. كانسەللينگ ءبىر جاعىنان قوعامدى جاۋاپكەرشىلىككە تاربيەلەيدى. بىراق ەكىنشى جاعىنان، ادىلەتسىز ايىپتاۋ، جاپپاي حەيتكە اكەلۋى مۇمكىن. ونى دا ويلانىپ قويعان ءجون- اۋ.

ءسابيت رىسباەۆتىڭ جەلىدەگى جازباسى

Abai.kz