بۇگىن سەمەي قالاسىندا «مەملەكەت – بيزنەس – ۇكىمەتتىك ەمەس ۇيىم – ءتيىمدى ءوزارا ارەكەتتەسۋ جانە سەرىكتەستىك» تاقىرىبىندا وڭىرلىك ازاماتتىق فورۋم ءوتتى. شاراعا وبلىس اكىمى بەرىك ءۋالي، پارلامەنت سەناتىنىڭ دەپۋتاتى بيبىگۇل جەكسەنباي، مادەنيەت جانە اقپارات مينيسترلىگىنىڭ ازاماتتىق قوعام ىستەرى كوميتەتى توراعاسىنىڭ ورىنباسارى ەلدار ساپاروۆ، «قازاقستان رەسپۋبليكاسىنىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى بانۋ نۇرعازيەۆا، وزگە وڭىرلەردەن كەلگەن دەلەگاتسيالار، مەملەكەتتىك ورگانداردىڭ، ساياسي پارتيالار مەن قوعامدىق ۇيىمداردىڭ وكىلدەرى قاتىستى.

سۋرەت: اباي وبلىسىنىڭ اكىمدىگىنەن الىندى.

فورۋمنىڭ اشىلۋىندا ءسوز سويلەگەن ايماق باسشىسى القالى جيىننىڭ مەملەكەت، بيزنەس جانە ازاماتتىق قوعام اراسىنداعى سىندارلى ديالوگتىڭ، ءوزارا تۇسىنىستىك پەن سەرىكتەستىكتىڭ ماڭىزدى الاڭى ەكەنىن اتاپ ءوتتى.

«وزدەرىڭىزگە بەلگىلى، بيىل ءبىزدىڭ ءوڭىرىمىز مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس ۇلى ويشىل، ۇلتتىڭ رۋحاني تۇعىرى – اباي قۇنانبايۇلىنىڭ 180 جىلدىق مەرەيتويىن لايىقتى دەڭگەيدە، كەڭ كولەمدە اتاپ ءوتتى. ەلىمىزدىڭ تۇكپىر-تۇكپىرىنەن 50 مىڭنان استام قوناقتار كەلدى. بۇل ايتۋلى مەرەيتويدى جوعارى دەڭگەيدە ۇيىمداستىرۋدا مەملەكەتتىك قۇرىلىمدارمەن قاتار بيزنەس قاۋىمداستىعى مەن قوعامدىق ۇيىمداردىڭ بەلسەندى ايرىقشا قولداۋىن سەزىندىك. پرەزيدەنت اتاپ وتكەندەي، ەلىمىزدىڭ دامۋى ءۇشىن سانالى ازاماتتىق بەلسەندىلىكتى ارتتىرىپ، مەملەكەت پەن قوعام اراسىنداعى سەنىمدى سەرىكتەستىكتى نىعايتۋ قاجەت. مەملەكەت – بيزنەس – ۇكىمەتتىك ەمەس ۇيىمدار اراسىنداعى سەرىكتەستىك تەك الەۋمەتتىك ماسەلەلەردى شەشۋدىڭ قۇرالى عانا ەمەس، ول قوعامدىق تۇراقتىلىقتىڭ، ىنتىماق پەن ءوزارا سەنىمنىڭ نەگىزى. سوندىقتان ءبىز ارقاشان اشىق ديالوگقا، ورتاق ماقساتقا جۇمىلۋعا دايىنبىز. الداعى ۋاقىتتا بىرلەسكەن باستامالارىمىز ارتىپ، ءوڭىرىمىزدىڭ وركەندەۋىنە، حالىقتىڭ ءال-اۋقاتىن جاقسارتۋعا بىرگە ۇلەس قوساتىندارىڭىزعا سەنەمىز. فورۋم جۇمىسىنا ساتتىلىك تىلەيمىن» دەدى وبلىس اكىمى.

سۋرەت: اباي وبلىسىنىڭ اكىمدىگىنەن الىندى.

فورۋمدا قاتىسۋشىلار مەملەكەت – بيزنەس – ۇكىمەتتىك ەمەس ۇيىمدار اراسىنداعى ىنتىماقتاستىقتى جەتىلدىرۋ ماسەلەلەرىن تالقىلادى. سونىمەن قاتار ازاماتتىق قوعام ينستيتۋتتارىنىڭ دامۋىنداعى وزەكتى ماسەلەلەرگە نازار اۋداردى.قازىر وبلىس اۋماعىندا 300-دەن استام قوعامدىق ۇيىم بەلسەندى جۇمىس ىستەيدى. 2023 جىلدان بەرى «ازاماتتىق باستامالاردى قولداۋ ورتالىعى» اشىلىپ، كوپتەگەن جوبالار ىسكە اسىرىلدى.

سۋرەت: اباي وبلىسىنىڭ اكىمدىگىنەن الىندى.

فورۋم اياسىندا قوعام ءومىرىنىڭ ءتۇرلى سالالارىندا بەلسەندىلىك تانىتىپ جۇرگەن ۇكىمەتتىك ەمەس ۇيىمدار وكىلدەرى «قۇقىق قورعاۋ سالاسىنداعى ۇزدىك ۇكىمەتتىك ەمەس ۇيىم»، «ۆولونتەرلىك قىزمەت سالاسىنداعى ۇزدىك ۇكىمەتتىك ەمەس ۇيىم»، «زەرتتەۋ قىزمەتى سالاسىنداعى ۇزدىك ۇكىمەتتىك ەمەس ۇيىم»، «شىعارماشىلىق قىزمەت سالاسىنداعى ۇزدىك ۇكىمەتتىك ەمەس ۇيىم»، «جاستار ساياساتى سالاسىنداعى ۇزدىك ۇكىمەتتىك ەمەس ۇيىم»، «جۇمىسشىلاردىڭ قۇقىقتارىن قورعاۋ سالاسىنداعى ۇزدىك ۇكىمەتتىك ەمەس ۇيىم»، «دەنساۋلىق ساقتاۋ سالاسىنداعى ۇزدىك ۇكىمەتتىك ەمەس ۇيىم»، «اۋىلدىق ۇزدىك ۇكىمەتتىك ەمەس ۇيىم» نوميناتسيالارى بويىنشا ماراپاتتالدى.

Abai.kz