قازاقستاندىقتاردىڭ دەرەكتەرى قالاي قولدى بولدى؟!
جاساندى ينتەللەكت جانە تسيفرلىق دامۋ ءبىرىنشى ۆيتسە-ءمينيسترى روستيسلاۆ كونياشكين ۇكىمەتتە وتكەن بريفينگتە قازاقستاندىقتاردىڭ جەكە دەرەكتەرىنىڭ تاراپ كەتۋىنە قاتىستى پىكىر ءبىلدىردى.
جۋرناليستەر جەكە دەرەكتەردى ساتقان توپتىڭ قۇرامىندا كىمدەر بولعانىن جانە ولار بۇل مالىمەتتەرگە قالاي زاڭسىز قول جەتكىزگەنىن ناقتىلادى.
– قازىرگى ۋاقىتتا تەرگەۋ شارالارى جۇرگىزىلىپ جاتىر، سوندىقتان ازىرگە ەشقانداي اقپاراتتى جاريالاي المايمىز. بارلىق تەرگەۋ اياقتالىپ، قاجەتتى شارالار قابىلدانعاننان كەيىن ءتيىستى اقپارات بەرىلەدى دەپ ويلايمىن. قازىر، وكىنىشكە قاراي، ەشتەڭە ايتا المايمىن، – دەپ جاۋاپ بەردى كونياشكين.
سونداي-اق باق وكىلدەرى قولدانىستاعى دەربەس دەرەكتەردى قورعاۋ تەتىكتەرى نەگە ولاردىڭ جاپپاي زاڭسىز جينالىپ، ساتىلۋىنا جول بەرمەگەنىن سۇراپ، بۇعان حقكو قىزمەتكەرلەرى نەمەسە مەملەكەتتىك ورگاندار قاتىسى بولۋى مۇمكىن بە دەگەن ماسەلەنى كوتەردى.
– مەن مۇنى ءدال حقكو قىزمەتكەرلەرى دەپ ناقتىلاماس ەدىم. ءبىز اقپاراتتىق جۇيەلەردەگى دەرەكتەرگە قولجەتىمدىلىك ءار قولدانۋشىعا بەرىلەتىن رولدەرگە سايكەس بولىنەتىنىن ءتۇسىنۋىمىز كەرەك. ەگەر ناقتى ءبىر قولدانۋشى زاڭدى بۇزىپ، العان اقپاراتتى زاڭسىز پايدالانسا، وندا وعان قاتىستى قۇقىق قورعاۋ ورگاندارى ءتيىستى شارالاردى قابىلدايدى. جەكە دەرەكتەردىڭ دۇرىس ەمەس جينالۋى كوبىنە فيشينگتىك سىلتەمەلەر، قوڭىراۋلار نەمەسە QR-كودتار ارقىلى جۇزەگە اسادى. مۇنداي كودتار ادامداردى زاڭسىز سايتتارعا باعىتتاپ، سول جەردە مالىمەتتەر جينالادى، – دەدى ۆيتسە-مينيستر.
ونىڭ ايتۋىنشا، بۇعان دەيىن ايتىلعان دەرەكتەردىڭ سىرتقا تارالۋى كوبىنە ميكروقارجى ۇيىمدارى مەن جەكە اقپاراتتىق جۇيەلەردەن بولعان.
– مينيسترلىك رەتىندە ءبىز جەكە دەرەكتەردىڭ قاۋىپسىزدىگىن قامتاماسىز ەتۋ تالاپتارىن بەلگىلەيمىز. قازىر اقپاراتتىق جۇيەلەردىڭ قاۋىپسىزدىگىن قامتاماسىز ەتپەگەنى ءۇشىن، سونداي-اق جەكە دەرەكتەرگە قاتىستى زاڭسىز ارەكەتتەر ءۇشىن جاۋاپكەرشىلىكتى بارىنشا كۇشەيتۋ باعىتىندا جۇمىس ىستەپ جاتىرمىز. ايىپپۇلدار بىرنەشە ەسە ۇلعايتىلدى، بۇل باعىتتاعى جۇمىس جالعاسادى. سونىمەن قاتار ءىرى كولەمدەگى دەرەكتەردىڭ جاپپاي تارالۋىنا جول بەرگەنى ءۇشىن جاۋاپكەرشىلىكتى قىلمىستىق دەڭگەيگە دەيىن كۇشەيتۋ ماسەلەسى دە قاراستىرىلىپ جاتىر، – دەدى كونياشكين.
Abai.kz
