قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا حالىقتىڭ كرەديتىن كەشىرۋگە قاتىستى سۇراققا جاۋاپ بەردى، دەپ حابارلايدى Ulysmedia.kz.

- جوق، كەشىرىلمەيدى. ونداي جوسپار جوق. قازىر باسقا مەحانيزمدى ەنگىزدىك. بۇل – كرەديتورلار تاراپىنان بەرەشەكتى مىندەتتى تۇردە رەتتەۋ تەتىگى. قازىر زاڭ بويىنشا پروبلەمالىق كرەديت بولسا، بانككە نەمەسە ميكروقارجىلىق ۇيىمعا ءوتىنىش بەرۋگە بولادى. بۇل بانكروت سيستەماسى ەمەس. ءبىز سول زاڭ بويىنشا بىرىڭعاي ءتارتىپ جاسادىق. ءوتىنىش كەلگەن سوڭ بانكتەر سول مەحانيزم بويىنشا مىندەتتى تۇردە پروبلەمالىق بەرەشەكتى ازايتۋ مۇمكىندىگىن قاراستىرۋى كەرەك، پايىزدىق مولشەرلەمەنى تومەندەتۋدى نەمەسە نەسيەنى وتەۋ مەرزىمىن ۇزارتۋدى تالقىلاۋى ءتيىس. بۇدان بولەك، زاڭدى ىسكە اسىرۋ اياسىندا ءبىز جاڭا نقا قابىلدادىق. وندا ءتيىمدى قايتا قۇرىلىمداۋدىڭ وسىنداي كريتەريى قاراستىرىلعان. بۇل وتە ماڭىزدى، سەبەبى بۇعان دەيىن بانكتەر نەمەسە ميكروقارجى ۇيىمدارى پروبلەمالىق قارىز الۋشىعا جۇگىنگەن كەزدە، قايتا قۇرىلىمداۋ ءۇشىن ءارتۇرلى شارتتاردى ۇسىنا الاتىن، دەيدى ابىلقاسىموۆا.

ەندى قايتا قۇرىلىمداۋعا قويىلاتىن تالاپتار اناعۇرلىم ناقتى ءارى بىرىڭعاي بولادى.

- مىندەتتى تۇردە نەگىزگى قارىزدىڭ ازايۋى جۇزەگە اسۋى ءتيىس. بۇدان باسقا، ءبىز ۇجىمدىق رەتتەۋ تەتىگىن ىسكە قوسىپ وتىرمىز. ياعني، ەگەر ادامنىڭ ەكى نەمەسە ودان دا كوپ نەسيەسى بولسا، وندا كرەديتورلار وعان بىرىڭعاي تولەم كەستەسىن ۇسىنۋى قاجەت. ءبىر ۇيىم پروبلەمالىق نەسيە بويىنشا جاعدايدى جاقسارتسا، ال ەكىنشىسى وعان ەشقانداي ۇسىنىس جاسامايتىن جاعداي بولماۋى ءتيىس. سول سەبەپتى ءبىز ۇجىمدىق رەتتەۋ ءۇشىن ارنايى پلاتفورما ازىرلەدىك.

قارجى ۇيىمدارىنا قويىلاتىن تالاپ

- ءبىز، ەڭ الدىمەن، قارجى ۇيىمدارى پروبلەمالىق بەرەشەكتى رەتتەۋدە ازاماتقا كومەك كورسەتۋگە جاۋاپتى بولۋى كەرەك دەپ ەسەپتەيمىز. سونىمەن قاتار بانكتەر مەن ميكروقارجى ۇيىمدارىندا قازىرگى ۋاقىتتا قارىزدى رەتتەۋ بويىنشا عانا ەمەس، ەڭ وسال توپتار ءۇشىن بولەك ۇسىنىستار بار. ولار ءوز قاراجاتى ەسەبىنەن قارىزدى ەسەپتەن شىعارۋ تەتىگىن قاراستىرادى. مۇنداي جاعدايدا ەڭ الدىمەن قارجى ۇيىمىنا جۇگىنۋ قاجەت، دەيدى اگەنتتىك توراعاسى.

مادينا ابىلقاسىموۆا بۇعان دەيىن 2019 جىلى بىرقاتار پروبلەمالىق نەسيەلەردى مەملەكەت كەشىرگەننەن كەيىن قارجى سەكتورىندا نەسيەلەردىڭ سانى قايتادان ءوسىپ كەتكەنىن ايتقان.

«وكىنىشكە قاراي، 2019 جىلى كرەديت كەشىرىلگەننەن كەيىن ءبىزدىڭ قارجى سەكتورىندا كرەديت كولەمى قايتادان ءوسىپ كەتتى. ونىڭ ىشىندە پروبلەمالىق كرەديتتەر دە ءوسىپ كەتتى. ەگەر مەملەكەت قاراجاتىن ءبولىپ، قايتا-قايتا كەشىرە بەرسەك، ودان دا كوپ جاڭا كرەديتتەر كوبەيەد»ى، - دەگەن ول.

2019 جىلى 3 ميلليون تەڭگەگە دەيىن قارىزى بار 500 مىڭ ازاماتتىق نەسيەسى كەشىرىلگەن. ول ءۇشىن مەملەكەت قازىناسىنان 115 ميلليارد تەڭگە جۇمسالعان.

Abai.kz