«پرومپت-ينجينيرينگ نەگىزدەرى» 15 اكادەميالىق ساعاتتان تۇرادى جانە 6 ءمودۋلدى قامتيدى. ساباقتار تولىقتاي ونلاين فورماتتا وتەدى، ال كۋرس مازمۇنىنا تاۋلىك بويى قول جەتكىزۋگە بولادى. بۇل قاتىسۋشىلارعا ىڭعايلى كەستە قۇرىپ، وقۋدى كاسىبي قىزمەتىمەن قاتار الىپ جۇرۋگە مۇمكىندىك بەرەدى.

كۋرس باعدارلاماسى:

- ماماندىقپەن تانىسۋ. پرومپت-ينجەنەر دەگەن كىم، ونىڭ مىندەتتەرى مەن جاساندى ينتەللەكت داۋىرىندەگى ءرولى.
- نەگىزگى ۇعىمداردى ءتۇسىنۋ. ۇلكەن تىلدىك مودەلدەر (LLM) قالاي جۇمىس ىستەيدى، قالاي ۇيرەتىلەدى جانە بيزنەستە قايدا قولدانىلادى.
- پرومپت قۇرۋدىڭ باستاپقى داعدىلارى. جۇيەلىك پرومپتتاردى جاساۋ جانە جاساندى ينتەللەكتپەن دۇرىس ارەكەتتەسۋ.
- جەتىلدىرىلگەن تاسىلدەر. نەيروجەلىلەرمەن جۇمىس ىستەۋدىڭ ستراتەگيالارى مەن ۇلگىلەرى، دايىن پرومپت كىتاپحانالارى.
- اسسيستەنت جاساۋ تاجىريبەسى. Telegram-بوتپەن ينتەگراتسيالانعان، دەرەكتەر بازاسى بار جەكە AI-اسسيستەنت ازىرلەۋ.
- مودەرنيزاتسيا جانە جوبالار. اسسيستەنتتىڭ مۇمكىندىكتەرىن كەڭەيتۋ، Google كۇنتىزبەگە كىرىكتىرۋ، جوبالاردى GitHub-تا راسىمدەۋ.

اتالعان كۋرس Lerna كومپانياسىمەن سەرىكتەستىكتە ازىرلەندى، باستاما جاساندى ينتەللەكتىمەن جۇمىس ىستەۋدىڭ جاڭا داعدىلارىن مەڭگەرىپ، ولاردى تاجىريبەدە قولدانعىسى كەلەتىن جاندارەعا ارنالعان.

بۇل Astana Hub پەن Lerna-نىڭ العاشقى بىرلەسكەن جوباسى ەمەس. بىلتىر قىركۇيەكتە «جي نەگىزدەرى: ChatGPT» تەگىن كۋرسى ىسكە قوسىلىپ، قازاقستاندىقتاردىڭ جاساندى ينتەللەكت تەحنولوگيالارىنا دەگەن قىزىعۋشىلىعىن ارتتىرعان ەدى. بۇگىندە كۋرسقا 220 مىڭنان استام ادام تىركەلىپ، ولاردىڭ 120 مىڭنان استامى وقۋدى ءساتتى اياقتاپ، سەرتيفيكات الدى.

وقىتۋ قازاقستاندا جاساندى ينتەللەكتىنى دامىتۋعا باعىتتالعان اۋقىمدى AI Movement باستاماسى اياسىندا جۇزەگە اسىرىلادى. ەسكە سالساق، مەملەكەت باسشىسى قازاقستان حالقىنا جولداۋىندا: «قازاقستان جاساندى ينتەللەكتىنى كەڭىنەن قولداناتىن جانە تسيفرلىق تەحنولوگيالاردى دامىتىپ جاتقان ەلگە اينالۋعا ءتيىس» دەپ اتاپ وتكەن بولاتىن.

كۋرس تۋرالى تولىق اقپارات پەن قاتىسۋ شارتتارى Astana Hub پلاتفورماسىندا قولجەتىمدى.

Abai.kz